Read Ma'anyan KESAH KAWAN RASUL 24 Bible Online

KESAH KAWAN RASUL 24 - Ma'anyan bible

KESAH KAWAN RASUL 24

¹Dime anrau udi yiru, Imam Hante Ananias anri kawan pamimpin Yahudi tulak ma Kaisarea baya erang kaulun pangacara bangaran hi Tertulus. Here mangadap Gubernur Feliks palus nampe pangaduan here nadap hi Paulus.

²Tawuk hi Tertulus naherau ma muka, hanye nawa hi Paulus kalayiti, “Tuan Gubernur sa Mulia! Hang imbe pimpinan Tuan negeri kami aman. Nelang daya kabijaksanaan Tuan pada haut wahai parbaikan sa natampalus ma bangsa kami.

³Katuluh yiru kami saratang nyambut anri ngantuh tarima kasih nelang panghargaan satinggi-tinggini hang awe-awe jua.

⁴Kude nampan ada ngumpe wahai waktu Tuan, aku ilaku nampan tuan hamen nyanrengei pangaduan kami sa imbe yiti.

⁵Kami kasasat ulun yiti ngulaa ridu sa babahaya. Hang awe-awe hanye saratang ngulah karawekan hang penah ulun Yahudi nelang hanye jari pamimpin gerakan kawan ulun Nazaret.

⁶Hanye likan haut mansuba ngampi najis Lewu Tuhan, kude kami nyamba hanye. (Bahum kami mangadili hanye manurut hukum agama kami raerai.

⁷Kude komandan Lisias hanrabut hanye teka kami,

⁸balalu marentah nampan kawan ulun sa mangadu hanye mangadap Tuan.) Amun Tuan mariksa ulun yiti, Tuan raerai sagar karengei teka hanye kawan pangaduan kami nadap hanye samula uras tuu bujur.”

⁹Kawan ulun Yahudi sa naan hang yiru pada umba nawa hi Paulus nelang kaeau uras tuu inun sa naeau daya Tertulus.

¹⁰Balalu Gubernur yiru ngami isyarat ma hi Paulus sa hanye iyuh bapaner. Balalu hi Paulus kaeau, “Aku karasa Tuan haut jari hakim negeri yiti bataun-taun lawahni. Daya gana yiru aku kaingkam sanang iwara pambelaanku yiti hang hadapan Tuan.

¹¹Tuan iyuh mariksa raerai himat puang labis teka dua walas anrau sa haut paitah aku tulak ma Yerusalem lepuh sumbayang.

¹²Nelang puang suah kawan ulun Yahudi yiru kasasat aku naan basual anri sunah erang kaulun atawa ngumpul ulun nampan ngulah karawekan hau hang Lewu Tuhan atawa hang kawan lewu sumbayang atawa hang awe-awe hawuang tumpuk.

¹³Here sika puang kaiyuh mambukti kawan dawaan nadap aku sa natahampe here ma Tuan.

¹⁴Aku mangaku hang hadapan Tuan aku samula nyambah Alatalla datu nini kami manurut ajaran Yesus sa naanggap here ajaran yiru hala. Kude aku magun parisaya ma katuluh inun sa naan nasurat hawuang buku Moses nelang hawuang buku kawan Nabi.

¹⁵Sameh kala here pada, aku naan kaharapen ma Alatalla, himat katuluh ulun sagar welum mulek udi matei-kawan ulun sa mawitu bujur atawa kawan ulun sa jahat!

¹⁶Yiru sababni aku saratang ngakali mamaeh, nampan kawan atei akalku barasis nadap Alatalla nelang pada barasis nadap murunsia.

¹⁷Udi papire taun puang uweng hang Yerusalem, aku mulek ma yaru lepuh nginsing bantuan duit ma bangsaku nelang nampan nyarah parapah ma Alatalla.

¹⁸Tawuk aku nampalus hal yiru, here panalu aku hang Lewu Tuhan, udi aku luput nampalus upasara ngabarasis tenga. Puang uweng ulun rama baya aku, nelang puang uweng karawekan tawuk yiru hang yiru.

¹⁹Ekat naan papire kaulun Yahudi teka propinsi Asia hang yaru. Saharusni here yiru naan hang yiti neu nampe pangaduan here ma Tuan, amun here naan pangaduan nadap aku.

²⁰Atawa elahni kawan ulun yiti raerai iwara kajahaten inun sa haba here hang aku tawuk aku nainsing mangadap Pangadilan Agama.

²¹Here kahaba ekat isa lengan yiti sa naantuhku hang hadapan here, hanyeyiru lengan sa kaeau: Aku naadili anrau yiti daya gana aku parisaya himat kawan ulun matei sagar nasamelum kamulek.”

²²Balalu hi Feliks sa haut karasa wahai neu ajaran Yesus, nutup sidang parkara yiru, hanye kaeau, “Aku sagar mutus pakara yiti, amun komandan Lisias haut hawi.”

²³Balalu hanye marentah perwira sa batanggung jawab nari hi Paulus yiru nampan tatap nahan hi Paulus, kude anri ngami butit kabebasan ma hanye nelang ngami izin ma kawan hengauni ngami ma hanye inun sa naparlu dayani.

²⁴Papire anrau udi yiru hi Feliks hawi, baya matueh waweini bangaran hi Drusila; hanye erang kaulun Yahudi. Hi Feliks nunyu ulun ngalap hi Paulus, balalu hi Feliks nyanrengei hi Paulus bapaner neu parisaya ma Kristus Yesus.

²⁵Kude tawuk hi Paulus nampalus papaneranni neu kajujuren anri tahan nafsu nelang neu hukuman hang anrau Kiamat, hi Feliks balalu takut palus kaeau, “Hanyu itati iyuh tulak. Aku sagar nerau hanyu lagi amun naan kasampatan.”

²⁶Padingian yiru hi Feliks harap sagar kaiyuh duit teka hi Paulus. Daya yiru hanye papire kali nunyu ulun ngalap hi Paulus nampan bapaner anri hanye.

²⁷Udi rueh taun dami, hi Perkius Festus nganti hi Feliks jari Gubernur. Balalu daya hi Feliks hamen ngalap atei kawan ulun Yahudi, hanye maladar hi Paulus tatap muneng hawuang panjara.