Read Ma'anyan KESAH KAWAN RASUL 25 Bible Online

KESAH KAWAN RASUL 25 - Ma'anyan bible

KESAH KAWAN RASUL 25

¹Telu anrau udi hi Festus hampe hang daerah yiru, hanye tulak teka Kaisarea ma Yerusalem.

²Hang yaru kawan imam kapala anri kawan pamimpin Yahudi nampe pangaduan here ma hanye nadap hi Paulus. Here saratang ngatau hi Festus

³nampan daya pikaeh ateini anri here, hanye hakun nunyu ulun nginsing hi Paulus ma Yerusalem; daya hang yaru here haut mapakat nampan munu hanye hang penah lalan.

⁴Kude hi Festus nuing, “Hi Paulus rahat natahan hang Kaisarea nelang aku pada sika puang lawah lagi sagar mulek ma yaru.

⁵Jadi, elahni kawan pamimpin naun tulak sinrah anri aku ma Kaisarea nelang nguka pakarani hang yaru, amun samula hanye naan ngulah kahalaen.”

⁶Udi muneng hang Yerusalem leu walu atawa sapuluh anrau, hi Festus mulek ma Kaisarea. Hang anrau keatunini hanye ngulah sidang pangadilan balalu marentah nampan hi Paulus nainsing mangadap.

⁷Dami hi Paulus hawi, kawan ulun Yahudi sa hawi teka Yerusalem minri ngawuriung hanye, balalu mulai nampe kawan dawaan sa maweat nadap hanye. Kude here puang kaiyuh mambukti kawan dawaan yiru.

⁸Hawuang pambelaanni hi Paulus kaeau, “Aku puang uweng ngulah sunah isa kahalaen anri hukum Moses atawa ma Lewu Tuhan atawa ma Kaisar Roma.”

⁹Kude daya hi Festus hamen ngalap atei kawan ulun Yahudi, hanye balalu nunti ma hi Paulus, “Hakun hanyu tulak ma Yerusalem nampan naadili hang yaru hang hadapanku neu kawan dawaan yiru?”

¹⁰Hi Paulus nuing, “Aku itati minri hang hadapan pangadilan Kaisar Roma; balalu hang unengan yiru aku harus naadili. Tuan karasa aku puang uweng kahalaen ma ulun Yahudi.

¹¹Amun aku haut malangar hukum nelang ngulah ulahan sa patut nahukum anri hukuman mati, aku rela matei. Kude amun kawan dawaan here yiru puang tuu, puang uweng sunah erang kaulun sa iyuh nyarah aku ma here. Aku laku naadili hang pangadilan Kaisar!”

¹²Udi barunding anri kawan panasehatni, hi Festus kaeau, “Hanyu ilaku naadili hang pangadilan Kaisar, jadi hanyu harus tulak mangadap Kaisar.”

¹³Puang hampe lawah udi yiru, Raja Agripa anri hi Bernike hawi ma Kaisarea neu lepuh ngantuh salamat ma hi Festus.

¹⁴Udi here papire anrau lawahni hang yaru, hi Festus iwara pakara wat Paulus ma Raja Agripa. Hi Festus kaeau, “Naan hang yena erang kaulun tahanan sa natahan daya Feliks.

¹⁵Tawuk aku naan hang Yerusalem, kawan imam kapala anri kawan pamimpin Yahudi nampe pangaduan here nadap ulun yiru nelang ilaku nampan aku nyanawu hukuman ma hanye.

¹⁶Kude aku nuing kawan ulun Roma puang tau babaran nyarah kawan ulun sa nadawa nampan nahukum, amun sa nadawa yiru huan bahadapan anri ulun sa nawa hanye nelang naami kasampatan mambela dirini.

¹⁷Balalu, tawuk here hawi ma yati, aku puang nganrei lawah. Hang anrau keat unini aku balalu ngulah sidang pangadilan nelang marentah nampan ulun yiru nainsing mangadap.

¹⁸Tawuk kawan ulun sa nawa hanye minri nampe pangaduan here, here puang uweng nampe sunah isa masam kajahaten kala sanapindaku natahampe daya here.

¹⁹Here ekat balain pikiran anri hanye neu agama here raerai nelang neu erang kaulun sa bangaran Yesus. Ulun yiru haut matei, kude hi Paulus bakaras himat ulun yiru haut welum kamelek.

²⁰Daya aku bingung neu kewangun aku tau kaiyuh kawan katarangan neu pakara yiru, aku nunti ma hi Paulus inun hanye hakun tulak ma Yerusalem balalu naadili hang yaru neu pakarani yiru.

²¹Kude hi Paulus ilaku naik banding; hanye ilaku nampan hanye tatap muneng hang tahanan hampe pakarani naputus daya Kaisar. Daya gana yiru aku marentah nampan hanye tatap natahan, hampe aku kaiyuh kasampatan ngirim hanye ma Kaisar.”

²²Balalu hi Agripa kaeau ma hi Festus, “Aku pada sindi karengei ulun yiru.” “Anrau kauni Tuan kaiyuh nyanrengei hanye,” tuing Festus.

²³Hang anrau keatunini hi Agripa anri hi Bernike hawi anri upasara kebesaran. Here masuk ruang sidang baya anri kawan pambesar angkatan perang anri kawan ulun takamuka hang tumpuk yiru. Manyu parentah Festus, hi Paulus nainsing masuk.

²⁴Balalu hi Festus kaeau, “Baginda Agripa nelang katuluh sa naan hang yiti! Ulun yiti haut nakadu ma aku daya katuluh bangsa Yahudi, hau sa hang Yerusalem atawa sa hang yiti. Here ilaku nelang nantiak kaeau, hanye puang patut napaladar welum.

²⁵Kude aku puang kahaba sunah isa sa haut naulahni sa tau nahukum anri hukuman mati. Nelang daya gana hanye raerai haut ilaku nampan pakarani naadili hang pangadilan Kaisar, aku haut nukas nampan ngirim hanye ma Kaisar.

²⁶Kude aku huan uweng kaiyuh katarangan sa batantu neu hanye nampan tau nasurat hawuang suratku nampe Kaisar. Yiru sababni aku nginsing hanye ma hadapan tuan-tuan katuluhni, sa mambantang ma Yang Mulia Baginda Agripa! Maksudku hanyeyiru nampan udi pamariksaan yiti, naan bahan ma aku ngulah surat.

²⁷Daya manurut pangingkamanku, puang patut ngirim erang kaulun tahanan anri puang iwara kawan kahalaen sa nadawa nadap hanye.”