Read Ma'anyan KESAH KAWAN RASUL 27 Bible Online

KESAH KAWAN RASUL 27 - Ma'anyan bible

KESAH KAWAN RASUL 27

¹Dami haut natukas kami harus balayar ma Italia, hi Paulus baya papire tahanan sa lain nasarah ma hi Yulius, perwira pasukan tantara Roma sa naantuh “Resimen Kaisar”.

²Kami sungkat ma kapal sa hawi teka Adramitium, balalu tulak makai kapal yiru sa sagar balayar ma kawan palabuhan hang propinsi Asia. Hi Aristarkhus, ulun Makedonia sa hawi teka Tesalonika, balayar pada sinrah baya kami.

³Hang anrau keat unini kami hampe hang Sidon. Hi Yulius maeh tatuu anri hi Paulus. Hanye naami izin ganta kawan hengauni nampan here kaiyuh ngami ma hanye inun sa naparlu dayani.

⁴Teka yiru kami nampalus palayaran. Daya gana kapal kami nyunsung riwut, kami balalu balayar tarus manyisir pantai pulau Siprus sa tasalindung teka riwut.

⁵Udi hie kami nyabarang laut sa bahadapan anri Kilikia nelang Pamfilia balalu hampe hang Mira negeri Likia.

⁶Hang yaru perwira yiru kahaba kapal teka Aleksandria sa ngunu balayar ma Italia. Hanye balalu mindah kami ma kapal yiru.

⁷Papire anrau lawahni kami balayar bagamat tuu, anri rara kapatei akhirni kami hampe hang rite tumpuk Knidus. Daya gana riwut magun puang maeh, kami puang kaiyuh nampalus palayaran. Kami balalu balayar ma tiba selatan pulau Kreta mitah Tanjung Salmone nampan hang yaru kami pasalindung teka riwut.

⁸Magun anri rara kapatei kami balayar manyisir pantai pulau yiru balalu akhirni kami hampe hang isa unengan bangaran Palabuhan Bungas, puang lawit teka tumpuk Lasea.

⁹Tawuk yiru haut udi Hari Raya Pardamaian wat ulun Yahudi. Wahai tuu waktu kami taumpe, hampe puang uweng hilani lagi tau kaiyuh balayar anri aman. Daya yiru hi Paulus ngami nasehat ma here kalayiti,

¹⁰“Pulaksanai katuluh, manurut pandapatku, babahaya tuu amun takam tarus balayar. Takam tau kaingkam rugi hante puang ekat muatan atawa kapal takam, kude hewuk takam pada tau wawai.”

¹¹Kude perwira yiru labis parisaya ma jurumudi anri kapten kapal teka nyanrengei lengan Paulus.

¹²Palabuhan hang yiru samula puang hampe maeh unengan kawan kapal tarie hang musim dingin. Daya gana yiru kawahaian awak kapal satuju balayar lagi nanan palabuhan yiru daya here hamen nampan hampe hang Feniks balalu muneng hang yaru salawah musim dingin. Feniks hanyeyiru palabuhan hang Kreta sa nadap tiba barat daya anri tiba barat laut.

¹³Hang tawuk yiru riwut teka tiba selatan puang kajut mehet. Daya yiru kawan ulun kapal minda here haut tau balayar lagi. Here balalu narik jangkar palus tulak balayar manyisir pantai pulau Kreta.

¹⁴Kude puang lawah udi yiru salenga hawi riwut barat-hanyeyiru riwut sa naantuh riwut Timur Laut mehet tatuu hawi teka tiba pampang,

¹⁵Balalu nampuh kapal kami. Daya puang tau pada kapal balayar nawan riwut, balalu kami ekat basarah nelang ngaret kapal kami hanyut nainsing daya riwut.

¹⁶Kami pasalindung butit, tawuk kami mitah hang tiba selatan pulau Kauda sa rumis yiru. Hang yiru anri rara kapatei kami kaiyuh ngarawah sakoci kapal kami.

¹⁷Udi sakoci yiru kaiyuh naenat ma kapal, kapal yiru balalu naampisegah nahuruk makai tadi. Daya takut ireket hang gusung karasik Sirtis sa mahak, layar naului balalu kapal napaladar umba riwut.

¹⁸Riwut magin bahimat, hampe hang kaetuni anrauni kawan muatan kapal mulai naumpe mawuang laut.

¹⁹Hang karuan anrauni lagi kawan ulun kapal yiru ngumpe lagi kawan karangkapen kapal mawuang laut makai tangan here raerai.

²⁰Papire — anrau lawahni kami puang kadinung matei anrau anri wawahiang, nelang riwut magun magin bahimat. Akhirni harapan kami tau salamat puang uweng lagi.

²¹Papire waktu lawahni kawan ulun yiru puang uweng kuman. Hi Paulus minri hang penah here balalu kaeau, “Pulaksanai katuluh! Atikala naun nuu ngalut nasehatku, puang balayar teka Kreta, takam puang hampe wuah katuluh karusaken anri karugian yiti.

²²Kude itati aku ilaku tatuu nampan naun tatap anri, daya puang uweng sunah erang kaulun teka naun sa sagar matei, takam ekat kawawaian kapal yiti.

²³Daya hangkamalem malekat teka Alatalla sa nasambahku, hanyeyiru Alatalla sa kaampun aku, hawi nunung aku.

²⁴Malekat yiru kaeau, ‘Paulus, ada takut! Daya hanyu sagar mangadap Kaisar. Nelang daya pikaeh atei Alatalla anri hanyu, katuluh ulun sa balayar sinrah baya hanyu sagar salamat daya gana hanyu.’

²⁵Daya yiru, Pulaksanai katuluh, wuah naun sanang atei! Daya aku parisaya ma Alatalla ala katantuluhni sagar jari kala inun sa naeauni ma aku.

²⁶Kude takam die sagar angkeng hang pantai isa pulau.”

²⁷Hang malem kaampat balas kami rahat gilang-gilup hang laut Adria. Leu penah malem ulun kapal kataru himat kapal magin rite anri pampang.

²⁸Here balalu ngului tadi natamatu makai watu pakai ngukur lalem laut. Dami naukur hang yiru lalemni ane epat pulu meter. Puang lawah udi hie here ngukur lagi, lalem laut hang yiru ane telumpulu meter.

²⁹Daya here takut kapal tau ireket hang batu karang, here balalu ngului epat kawua jangkar teka buritan kapal nelang harap gere anrau hinang kaanrau.

³⁰Kude kawan ulun kapal anri suni-suni mansuba rari teka kapal yiru. Here balalu ngampinau sakoci ma ranu, nelang papura bagawi yalah here hamen ngului papire jangkar hang haluan.

³¹Kude hi Paulus kaeau ma perwira anri kawan parajurit hang kapal yiru, “Amun kawan ulun kapal yiti puang muneng hang kapal, naun katuluh puang kaiyuh salamat.”

³²Daya yiru kawan parajurit balalu natas tadi sakoci yiru, sakoci yiru balalu hanyut.

³³Kapihuan matei anrau hulet, hi Paulus nunyu nampan here katuluh kuman. Hi Paulus kaeau, “Haut ampat balas anrau lawahni naun katuluhni ekat nganrei anri kaadaan gugup gupuh nelang puang uweng nguta inun-inun.

³⁴Nasehatku, ware naun kuman sunah butit. Yiru maeh ma naun, nampan naun wigas lagi. Daya naun katuluh sagar salamat anri puang kurang inun heneng.”

³⁵Udi kaeau kalayiru hi Paulus balalu ngalap rote balalu ngantuh tarima kasih ma Alatalla hang hadapan here katuluh. Udi hie hanye mambagi rote yiru balalu nguta rote yiru.

³⁶Here katuluh uras kaingkam sanang atei balalu umba ikuta pada.

³⁷Katuluh ulun sa naan hawuang kapal yiru ramani rueh jatuh pitumpulu enem kaulun.

³⁸Udi katuluhni haut ikuta sidahadani, here balalu ngumpe kawan muatan gandum ma laut nampan kapal madinei.

³⁹Dami anrau haut kaanrau, ulun kapal kadinung pampang, kude here puang karasa pampang inun yiru. Here kadinung naan isa teluk anri pantaini. Balalu here ngunu ngakali gere kaiyuh nginsing kapal ma iring pampang hang yiru.

⁴⁰Here netek kawan tadi jangkar balalu kawan jangkar yiru na paladar leteng ma laut. Sinrah anri yiru pada here nguka tadi sa pakai nuruk kamudi. Udi hie here ngansang layar hang haluan kapal nampan riwut nginsing kapal yiru maju nuju pantai.

⁴¹Kude here nebu gusung karasik. Haluan kapal balalu ireket nelang puang kaiyuh bagarak lagi balalu buritanni hansur daya hebu galumbang mehet.

⁴²Kawan parajurit hang kapal yiru ngunu munu katuluh tahanan, daya here takut kawan tahanan yiru rari katambah nuju pampang.

⁴³Kude perwira yiru nahalang aheng here yiru daya hanye ngunu nyalamat hi Paulus. Hanye nunyu katuluh ulun sa tau katambah mitun dahulu balalu katambah nuju pampang,

⁴⁴kawan sa lainni ngapung anri itegei hang kawan papan atawa parakaian kapal yiru. Anri kalayiru kami katuluh salamat hampe ma pampang.