Read Ma'anyan KESAH KAWAN RASUL 28 Bible Online

KESAH KAWAN RASUL 28 - Ma'anyan bible

KESAH KAWAN RASUL 28

¹Dami haut hampe pampang anri salamat, wau kami karasa pulau yiru bangaran Malta.

²Panduduk pulau yiru tuu maeh anri kami. Here nyambut kami katuluh anri maeh balalu nyamelum apui ma kami daya anrau nuku uran nelang udara tuuni marisak.

³Hi Paulus ngumpul kayu, balalu ngandak kawan kayu yiru ma ambau apui. Hentek hanye manruk apui yiru, erang kaukui anipe kaluar teka wuang kayu yiru, daya laing apui, balalu matuk tanganni.

⁴Tawuk panduduk pulau yiru kadinung anipe yiru ireket gagueng hang tangan Paulus, here kaeau anri sameh here, “Ulun yiti batantu erang kaulun pamunu ulun, daya biar hanye haut lapas teka bahaya hang laut, Dewa Piadil puang ngaret hanye welum.”

⁵Kude hi Paulus mitik anipe yiru mawuang apui anri puang kaingkam mahanang sunah hena butit.

⁶Pikir here puang lawah lagi tangan Paulus sagar bakah atawa hanye sagar hamituan matei. Kude dami here nganrei papire lawahni nelang puang uweng sa luar biasa sa wuah hi Paulus, pikiran here balalu baubah nelang kaeau himat hi Paulus yiru dewa.

⁷Puang lawit teka yiru naan tane wat Publius, pajabat sa bakuasa hang pulau yiru. Hanye narime kami jari tamuni anri maeh tatuu salawah telu anrau.

⁸Tawuk yiru ambahni rahat sakit, daya mekum nelang daya disentri. Hi Paulus tulak nunung ulun sakit yiru balalu badoa hanrapak tanganni hang ambau hanye ulun yiru balalu ware.

⁹Daya gana kajadian yiru katuluh ulun sa sakit hang pulau yiru hawi ma hi Paulus, balalu here nasamare.

¹⁰Here ngami ma kami kawan pangamian wahai tatuu, nelang tawuk kami kai balayar, here nginsing ma kapal katuluh inun sa naparlu daya kami hang pakiaan kami.

¹¹Udi telu wulan lawahni kami hang yaru, kami balalu tulak teka pulau yiru sungkat kapal teka Aleksandria sa salawah musim marisak tarie hang pulau yiru. Kapal yiru makai tanda “Dewa Kembar Kastor anri Poluks”.

¹²Kami tarie hang tumpuk Sirakusa balalu muneng hang yaru telu anrau lawahni.

¹³Teka yiru kami balayar lagi manyisir pantai hampe ma tumpuk Regium. Hang anrau keatunini riwut mulai hawi teka tiba selatan, rueh anrau udi yiru kami hampe hang tumpuk Putioli.

¹⁴Hang yaru kami panalu papire kaulun sa parisaya ma Yesus, nelang here ilaku kami muneng baya here salawah erang minggu. Udi yiru kami balalu tulak ma Roma.

¹⁵Kawan pulaksanai hang Roma sa parisaya ma Yesus karengei kabar neu kami, balalu hawi hampe ma Pasar Apius anri Pasanggarahan Tiga neu nahalu kami. Tawuk hi Paulus panalu anri here, hanye ngantuh tarima kasih ma Alatalla nelang ateini balalu mansing.

¹⁶Tawuk hampe hang Roma, hi Paulus naelah muneng raerai anri najaga daya erang kaulun parajurit.

¹⁷Udi telu anrau, hi Paulus nerau kawan tokoh ulun Yahudi hang yiru. Dami here haut bakumpul, hanye kaeau ma here, “Pulaksanai katuluh! Aku puang uweng kahalaen inun-inun anri bangsa takam, atawa malangar adat kabiasaan sa natarime takam teka datu nini takam. Kude biar kalayiru aku sika najamba hang Yerusalem balalu nasarah ma kawan ulun Roma.

¹⁸Udi pakaraku napariksa, here ngunu napas aku, daya bawilah tuu aku puang uweng ngulah kahalaen sunah isa, sa tau nahukum anri hukuman mati.

¹⁹Kude daya kawan ulun Yahudi nawan, aku tapaksa ilaku pakaraku naadili hang pangadilan Kaisar Roma. Aku ngulah kalayiru puang daya aku naan pangaduan nadap bangsaku raerai.

²⁰Balalu daya gana yiru aku ilaku panalu anri naun nampan bapaner anri naun; daya aku yiti narantai, budas daya gana Panyalamat isa naharap daya bangsa Israel.”

²¹Here balalu kaeau ma hanye, “Kami huan uweng narime sunah erang karawen surat neu hanyu teka Yudea. Nelang puang uweng sunah erang kaulun pulaksanai sa hawi teka yaru sa nginsing kabar neu hanyu atawa bapaner sa puang maeh neu hanyu.

²²Kude kami pada hamen nyanrengei neu kaparisayaannu, daya kami katuluh karengei rama kawan ulun mada ajaran sa nategeinu yiru.”

²³Balalu here anri hi Paulus nukas anrau nampan panalu lagi. Hang anrau sa natukas yiru rama ulun hawi ma paunengan Paulus. Teka kaiyat hampe kariwe hi Paulus manarang nelang iwara ma here kabar neu kewangun Alatalla marentah yalah Raja. Anri makai kawan ayat teka buku Moses anri Buku kawan Nabi, hi Paulus ngakali nampan here parisaya neu Yesus.

²⁴Naan sa parisaya ma inun sa naeau Paulus, kude naan pada sa puang parisaya.

²⁵Anri kunuan sa balawanan here tulak nanan unengan yiru, udi hi Paulus kaeau kalayiti ma here, “Samula bujur tuu inun sa haut naeau daya Roh Alatalla itetei Nabi Yesaya ma datu nini naun!

²⁶Alatalla kaeau, ‘Hulu tulak wara ma bangsa yiti: Naun sagar tarus nyanrengei, kude puang kataru; naun sagar tarus naniuh kude puang karasa inun sa jari

²⁷Daya pikiran bangsa yiti haut tumpul, silu here haut marengen nelang matei here haut naangkirum. Hal yiti jari, nampan matei here ada kadinung, silu here ada karengei, pikiran here ada kataru, nelang ada mulek nunung aku, balalu aku sagar nyamare here.’ ”

²⁸Akhirni hi Paulus kaeau, “Pulaksanai katuluh harus karasa kabar neu salamat teka Alatalla itati haut nawara ma kawan bangsa lain sa puang Yahudi. Here sagar narimeni!” (

²⁹Udi hi Paulus kaeau kalayiru, kawan ulun Yahudi yiru nanan unengan yiru nelang basual sameh pada here.)

³⁰Rueh taun lawahni hi Paulus muneng hang Roma, hang lewu sa nasewani raerai. Hanye sanang narime katuluh ulun sa hawi ganta hanye.

³¹Nelang anri heei hanye iwara ma here neu kewangun Alatalla marentah yalah Raja nelang neu Tuhan Yesus Kristus. Hi Paulus nampalus katantuluh yiru anri bebas, puang uweng nahalang-halangi.