Read Ma'anyan KESAH KAWAN RASUL 4 Bible Online

KESAH KAWAN RASUL 4 - Ma'anyan bible

KESAH KAWAN RASUL 4

¹Ganjah hi Petrus anri hi Yohanes bapaner anri kawan ulun yiru, kawan imam kapala anri komandan pangawal Lewu Tuhan baya kawan ulun Saduki hawi nunung hi Petrus anri hi Yohanes.

²Here sangit daya hi Petrus anri hi Yohanes kaeau ma kawan ulun yiru Yesus haut welum mulek teka pampatei. Nelang yiru mambukti himat ulun matei sagar welum mulek.

³Balalu here nyamba karueh rasul yiru palus namasuk here ma wuang panjara. Kude daya anrau haut kamalem, balalu hi Petrus anri hi Yohanes natahan hang yiru hampe kaanrau keatunini.

⁴Kude kawan ulun sa haut karengei ajaran kawan rasul yiru, rama sa parisaya. Balalu jumalah here batambah hampe jari leu dime ribu kaulun.

⁵Hang kaiyat unini kawan tokoh pangadilan agama, kawan pamimpin Yahudi anri kawan guru agama bakumpul hang Yerusalem.

⁶Here panalu anri Imam Hante Hanas, baya hi Kayafas, hi Yohanes, hi Aleksander nelang katuluh sa tamasuk kaluwarga Imam Hante yiru.

⁷Hi Petrus anri hi Yohanes nainsing ma hadapan here, balalu here nunti, “Kewangun sarani naun nyamare ulun lumpuh yiru? Anri kakuaten inun nelang makai kakuasaan teka hie naun ngulah kalayiru?”

⁸Hi Petrus sa nakuasa daya Roh Alatalla, nuing, “Tuan-tuan pamimpin bangsa anri Tuan-tuan anggota pangadilan!

⁹Kami naadili anrau yiti daya ngulah pikaeh, ngarawah erang kaulun sa lumpuh, nelang daya Tuan-tuan katuluhni hamen karasa kewangun ulun yiru nasamare.

¹⁰Nah, Tuan-tuan katuluh harus karasa nelang katuluh ulun Israel pada harus karasa itati ulun yiti minri anri sehat hang hadapan Tuan-tuan, daya gana kakuaten anri kakuasaan teka Yesus Kristus ulun Nazaret yiru. Tuan-tuan haut nyalib Yesus yiru, kude Alatalla haut nyamelum hanye mulek.

¹¹Yesus yiti sa namaksud daya ayat hawuang Surat Barasis, ‘Watu sa puang napakai daya kawan tukang bangunan, satuuni jari watu sa mambatang.’

¹²Ekat itetei Yesus Kristus ulun tau salamat. Daya hang litar dunia teka katuluh ulun murunsia puang uweng sunah erang kaulun sa lain kaiyuh kakuasaan teka Alatalla neu nyalamat takam.”

¹³Kawan anggota sidang pangadilan yiru wauh kadinung kaheian Petrus anri hi Yohanes, duanni here karasa sa kararueh rasul yiru hanyeyiru kawan ulun sa puang bapandidikan. Balalu here karasa kararueh rasul yiru hanyeyiru kawan ulun sa umba Yesus.

¹⁴Kude here puang tau kaeau inun-inun, daya ulun sa haut nasamare yiru naan minri hang yiru hang hadapan here baya hi Petrus anri hi Yohanes.

¹⁵Here balalu nunyu kararueh rasul yiru kaluar teka ruang sidang, udi yiru here balalu bagurayang.

¹⁶Here kaeau, “Inun sa naulah takam ma ulun yiti? Katuluh ulun sa muneng hang Yerusalem haut karasa, kaajaiban sa luar biasa yiti, naulah daya here rueh. Takam puang kaiyuh ngidim neu hal yiru.

¹⁷Kude nampan hal yiti ada tawantar lagi ma penah rama, mara takam ngancam here rueh nampan here puang iyuh budas bapaner sunah anri erang kaulun makai ngaran Yesus.”

¹⁸Here balalu nerau kararueh rasul yiru masuk kamulek, balalu iwara ma here budas puang iyuh ngantuh atawa ngajar makai ngaran Yesus.

¹⁹Kude hi Petrus anri hi Yohanes nuing, “Kunu naun saawe sa bujur hang hadapan Alatalla: nuu parentah tuan-tuan, atawa parentah Alatalla.

²⁰Daya kami puang tau tarie maner inun sa haut nadinung nelang nasanrengei daya kami.”

²¹Kawan anggota sidang yiru puang kahaba sunah isa tujuan pakai nukum hi Petrus anri hi Yohanes. Balalu here ngancam kararueh rasul yiru, udiyiru napas here, daya katuluh ulun nawat mahormat Alatalla daya gana kajadian yiru.

²²Ulun sa haut ware teka lumpuhni itetei hal sa ajaib yiru, umurni labis teka epat pulu taun.

²³Udi hi Petrus anri hi Yohanes nalapas, here mulek nunung kawan hengau here balalu nyarita katuluh inun sa haut naeau kawan imam kapala anri kawan pamimpin Yahudi ma here.

²⁴Dami kawan hengau here yiru karengei, here balalu sameh-sameh badoa anri bulat atei ma Alatalla. Here kaeau, “Tuhan, hanyu sa ngulah langit anri tane, laut anri katuluh hawuangni.

²⁵Makai Rohnu hanyu suah bapaner anri datu nini kami, hi Dawid walahnu; hanyu kaeau. ‘Wuah inun kawan ulun sa puang kataru Tuhan, sangit; wuah inun kawan bangsa ngulah ransana sa puang bariran?

²⁶Kawan raja hang dunia batatap neu paparangan, nelang kawan pamimpin mapakat nawan Tuhan anri Raja Panyalamat.’

²⁷Daya samula hi Herodes anri hi Pontius Pilatus haut ngulah partemuan anri kawan ulun sa puang kataru Tuhan nelang anri kawan ulun Israel hang tumpuk yiti. Here bakumpul nampan nawan Yesus walahnu sa barasis yiru sa haut naangkatnu jari Raja Panyalamat.

²⁸Here mapakat nampan ngulah ala katantuluh, sa haut natukas dayanu labis dahulu ala yiru sagar tulus. Nelang hanyu nukas yiru makai kakuasaan nelang kabahumennu raerai.

²⁹Itati, Tuhan, dinung kewangun here ngancam kami. Kude huyu kami kawan walahnu yiti, nampan iwara kabar neu hanyu anri puang takut.

³⁰Ami pangarawahennu nampan kawan ulun sa sakit nasamare nelang kawan kaajaiban anri kawan hal sa luar biasa jari itetei kakuasaan anri kakuaten teka ngaran Yesus, walahnu sa barasis yiru.”

³¹Udi here jumpuh badoa, unengan here bakumpul yiru balalu gaguyuh. Here katuluh nakuasa daya Roh Alatalla, nelang mulai heei tuu bapaner neu kabar teka Alatalla.

³²Katuluh ulun sa parisaya yiru welum mira pakat bulat atei. Puang uweng sunah erang kaulun teka here nganggap kawan inun sa naan hang here milik here raerai. Katuluh sa naan hang here, napakai here sameh-sameh.

³³Anri kuasa sa hante, kawan rasul yiru ngami kasaksian neu Yesus haut welum mulek. Alatalla mamberkat here.

³⁴Nelang puang uweng sunah erang kaulun teka here sa kakurangen inun heneng. Daya here sa naan tane atawa lewu, ngari tane atawa lewu here; balalu kawan duit haragani insing here

³⁵palus sarah here ma kawan rasul. Kamulek kawan duit yiru balalu nabagi here ma tiap ulun manyu kaparluanni.

³⁶Kalayiru pada hi Yosef. Hanye pada ngari tane milikni, balalu duit haraga tane yiru, insingni balalu amini ma kawan rasul. Hi Yosef yiti hanyeyiru erang kaulun katurunan Lewi; teka Siprus kawan rasul nerau hanye pada hi Barnabas (aratini: Pangarariu).