Read Ma'anyan KESAH KAWAN RASUL 6 Bible Online

KESAH KAWAN RASUL 6 - Ma'anyan bible

KESAH KAWAN RASUL 6

¹Kawan ulun sa umba Yesus magin lawah magin batambah rama. Tawuk yiru kawan ulun Yahudi sa makai basa Yunani, balalu puang sanang ma kawan ulun Yahudi sa asli. Here sa makai basa Yunani yiru kaeau, “Kawan waweian kami sa haut walu puang kaiyuh bagian biaya ma tiap anrau sa nabagi ma kawan ulun rama.”

²Daya gana yiru, kadua walas rasul yiru ngumpul papire kaulun umba here balalu kaeau ma here, “Puang maeh amun kami tarie iwara lengan Alatalla, daya harus ngurus kawan sual kutaen.

³Jari, ware naun midi teka padang naun pitu kaulun sa ngaranni maeh puang uweng cacat sa nakuasa daya Roh Alatalla nelang bijaksana, sa iyuh kami ngami tugas pakai ngurus kawan sual yiti;

⁴daya kami ekat ngunu badoa nelang iwara lengan Alatalla.”

⁵Katuluh ulun satuju anri gurayang teka kawan rasul yiru. Here balalu midi hi Stefanus, erang kaulun sa tuu-tuu parisaya ma Yesus nelang nakuasa daya Roh Alatalla. Pada tapidi: hi Filipus, hi Prokhorus, hi Nikanor, hi Timon, hi Parmenas anri hi Nikolaus teka Antiokhia; hanye puang ulun Yahudi, kude haut masuk agama Yahudi.

⁶Pitu kaulun yiru nausul ma kawan rasul, balalu kawan rasul yiru badoa nelang laku berkat Tuhan ma here.

⁷Daya yiru kabar teka Alatalla magin tayap nelang kawan ulun sa umba Yesus hang Yerusalem magin batambah rama. Nelang rama pada kawan imam sa parisaya ma Yesus.

⁸Hi Stefanus tuu-tuu naberkat daya Alatalla, hampe hanye kaiyuh ngulah wahai kawan kaajaiban anri kawan-hal sa luar biasa hang penah masyarakat.

⁹Kude naan pada kawan ulun sa nawan hanye; hanyeyiru here teka kawan anggota lewu sumbayang sa naantuh Lewu Sumbayang Kawan ulun Bebas. Kawan anggota lewu sumbayang yiru hanyeyiru kawan ulun Yahudi teka Kirene anri teka Aleksandria. Here anri kawan ulun Yahudi teka Kilikia anri Asia basual nawan hi Stefanus.

¹⁰Kude here puang kaiyuh mambantah inun sa naeau daya Stefanus, daya Roh Alatalla ngami ma hanye kabijaksanaan neu bapaner.

¹¹Daya yiru here nyuruk papire kaulun pakai bapaner, “Kami karengei ulun yiru mahina hi Moses nelang Alatalla!”

¹²Kalayiru here nantiring ulun rama anri kawan pamimpin Yahudi, baya kawan guru agama. Balalu here tulak nyamba hi Stefanus, udi hie nginsing hanye mangadap Pangadilan Agama.

¹³Nelang here pada nginsing papire saksi sa ngami kawan katarangan sa puang tuu neu hi Stefanus. Kawan saksi yiru kaeau, “Ulun yiti saratang mahina Lewu Tuhan sa barasis nelang mahina kawan-parentah Alatalla itetei hi Moses.

¹⁴Kami haut karengei hanye kaeau Yesus teka Nazaret yiru sagar nyanruntun Lewu Tuhan yiti, balalu ngubah katuluh adat istiadat sa naami daya Moses ma takam!”

¹⁵Katuluh ulun sa hawi hang sidang Pangadilan Agama yiru wauh ma hi Stefanus. Nelang tawuk yiru uruwawa Stefanus nadinung kala uruwawa malekat.