Read Ma'anyan KESAH KAWAN RASUL 8 Bible Online

KESAH KAWAN RASUL 8 - Ma'anyan bible

KESAH KAWAN RASUL 8

¹Nelang hi Saulus sanang gana hi Stefanus nawunu. Teka tawuk yiru ungkup hang Yerusalem mulai nakahanangen nasasah, hampe katuluh kawan ulun parisaya, salain hengka kawan rasul, uras tulak rari bahamuran ma litar daerah Yudea anri Samaria.

²Kawan ulun sa takut ma Alatalla masar hi Stefanus nelang nangis hanye anri tuu mahanang atei.

³Kude hi Saulus puang taduh haut ngakali ngampi hansur ungkup. Hanye masuk ma kawan lewu nelang nyujut ma luar kawan ulun sa parisaya, balalu namasuk here mawuang panjara.

⁴Kawan ulun parisaya sa haut tulak bahamuran yiru iwara Kabar Maeh teka Alatalla maawe-awe.

⁵Hi Filipus tulak ma Samaria nelang iwara ma kawan ulun hang yaru neu Raja Panyalamat sa najanji Alatalla.

⁶Dami kawan ulun karengei hi Filipus bapaner nelang here kadinung kawan kaajaiban sa naulahni, rama teka here sa mantaru inun sa naeau daya Filipus.

⁷Daya kawan roh jahat haut kaluar nelang ngiak teka rama ulun sa karasukan setan. Kawan ulun lumpuh anri kepa pada rama sa nasamare.

⁸Daya yiru kawan ulun hang Samaria yiru tuu arai.

⁹Hang tumpuk yiru naan erang kaulun upu bangaran hi Simon, sa haut papire lawahni haut ngulah rama ulun hang Samaria wauh neu ilmu sihirni. Hanye kaeau ma here hanye ulun sa luar biasa.

¹⁰Balalu katuluh ulun hang tumpuk yiru teka katuluh lapisan masyarakat naniuh hanye. “Hang ulun yiti naan kakuaten Alatalla sa taru tuu samula ‘Kakuaten Hante’ yiru,” eau here.

¹¹Haut lawah tuu hanye mampangaruhi ulun rama makai kakuaten sihirni, hampe ulun uras naniuh hanye tatuu.

¹²Kude hi Filipus iwara ma here neu Kabar Maeh neu kewangun Alatalla sagar marentah yalah Raja nelang neu Yesus Kristus, Raja Panyalamat yiru. Balalu here parisaya neu inun sa nawara daya Filipus, balalu here nabaptis-hau upu atawa wawei.

¹³Hi Simon pada parisaya, nelang dami udi nabaptis, hanye saratang baya anri hi Filipus. Hanye mandam kadinung katuluh kawan kaajaiban.

¹⁴Tawuk kawan rasul hang Yerusalem karengei kawan ulun Samaria haut narime lengan Alatalla. Here balalu ngutus hi Petrus anri hi Yohanes mayaru.

¹⁵Tawuk hi Petrus anri hi Yohanes hampe, here balalu badoa ma kawan ulun Samaria yiru nampan here kaiyuh Roh Alatalla,

¹⁶daya Roh Alatalla huan hawi nguasa sunah erang kaulun teka here; here ekat nabaptis hawuang ngaran Tuhan Yesus.

¹⁷Balalu hi Petrus anri hi Yohanes hanrapak tangan here ma ambau kawan ulun Samaria yiru; balalu here narime Roh Alatalla.

¹⁸Hi Simon kadinung daya kawan Rasul hanrapak tangan hang ambau kawan ulun yiru, Roh Alatalla naami ma here. Daya yiru hi Simon ngami duit ma hi Petrus anri hi Yohanes,

¹⁹balalu kaeau, “Ami pada maaku kuasa yiru nampan amun aku hanrapak tanganku hang ambau hie-hie, ulun yiru sagar narime Roh Alatalla.”

²⁰Kude hi Petrus nuing, “Silaka hanyu sinrah kawan duitnu! Hanyu minda pangamian Alatalla tau nawidi makai duit?

²¹Hanyu puang uweng hak umba hawuang pagawian kami, daya ateinu puang tuu-tuu nadap Alatalla.

²²Daya yiru umpe kunuannu sa puang maeh yiru balalu laku anri Alatalla nampan hanye ngampun kunuannu sa puang maeh yiru.

²³Daya aku karasa himat ateinu penu anri kabahirien nelang haut nasamalah daya kajahaten.”

²⁴Balalu hi Simon kaeau ma hi Petrus anri hi Yohanes, “Karawah ilaku ma Alatalla nampan puang uweng sunah isa teka inun sa naeau daya naun yiru wuah ma aku.”

²⁵Udi yiru here ngami kasaksian nelang iwara firman Tuhan, hi Petrus anri hi Yohanes mulek ma Yerusalem. Balalu hang pakiaanni, here iwara Kabar Maeh yiru hang kawan tumpuk hang Samaria.

²⁶Erang kaulun malekat Tuhan kaeau ma hi Filipus, “Hulu tulak! Kia ma tiba salatan ma lalan sa nuju Yerusalem anri Gaza.” Lalan yiru suni!

²⁷Hi Filipus balalu tulak. Hang tawuk yiru naan erang kaulun pagawai istana Etiopia rahat hang pakiaanni mudi ma tumpukni. Ulun yiru erang kaulun pagawai tinggi sa bertanggung jawab atas katuluh panatau wat Kandake, ratu negeri Etiopia. Ulun yiru haut tulak ma Yerusalem lepuh nyambah Alatalla nelang itati hanye mudi makai karetani. Padingian hanye maharung hang karetani yiru, hanye mambasa buku Nabi Yesaya.

²⁹Roh Alatalla kaeau ma hi Filipus, “Hulu tulak ma yaru palus sanrite kareta yiru!”

³⁰Balalu hi Filipus tulak nyanrite kereta yiru, balalu hanye karengei ulun mambasa Buku Yesaya. Hi Filipus nunti ma hanye, “Inun Tuan kataru ala sa nabasa Tuan yiru?”

³¹Ulun yiru nuing, “Kewangun aku tau kataru, amun puang uweng ulun sa manarangni ma aku?” Balalu hanye nuntut hi Filipus sungkat ma kareta palus maharung baya hanye.

³²Kawan ayat sa nabasani yiru, kalayiti, “Hanye yalah babiri sa naayak neu nasamalis, kala anak babiri sa puang maeau tawuk wuluni nagunting, kalayiru hanye puang ngaluar sunah erang kawusi lengan.

³³Hanye nahina nelang naulah sibabahum anri puang adil. Hewukni nabunat teka ambau tane hampe puang uweng sunah erang kaulun sa kaiyuh nyarita neu katurunanni.”

³⁴Pagawai tinggi teka Etiopia yiru kaeau ma hi Filipus, “Karawah wara ma aku, hie sa namaksud daya nabi yiti? Hanye raerai atawa ulun lain?”

³⁵Hi Filipus balalu mulai bapaner; makai kawan ayat yiru hanye mulai iwara Kabar Maeh neu Yesus ma pagawai tinggi yiru.

³⁶Hang tawuk pakiaan yiru, here hampe hang isa unengan sa naan ranu. Pagawai yiru kaeau, “Dinung iru naan ranu! Inun lagi sa kurang nampan mambaptis aku?” [

³⁷Hi Filipus kaeau, “Amun Tuan parisaya anri sagalis atei, Tuan iyuh nabaptis.” “Aku parisaya Yesus Kristus hanyeyiru Anak Alatalla,” eau pagawai tinggi teka Etiopia yiru.]

³⁸Balalu hanye nunyu karetani tarie; udiyiru here rueh, hi Filipus anri pagawai yiru, minau mawuang ranu balalu hi Filipus mambaptis hanye.

³⁹Tawuk here kaluar teka ranu, Roh Alatalla ngalap hi Filipus teka yiru. Pagawai tinggi teka Etiopia yiru puang kadinung hanye lagi. Anri atei sa mihewu pagawai tinggi yiru nampalus pakiaanni.

⁴⁰Hi Filipus salenga naan hang Asdod. Nelang tawuk yiru hanye nampalus pakiaanni. Hanye iwara Kabar Maeh neu Yesus hang katuluh tumpuk hampe hanye hampe hang Kaisarea.