Read Ma'anyan ROMA 10 Bible Online

ROMA 10 - Ma'anyan bible

ROMA 10

¹Pulaksanai katuluh! Aku kakunus tuu nampan bangsaku nasalamat. Aku bahimat badoa ma Alatalla neu here.

²Aku heei kaeau here tuu basamangat ngampu ma Alatalla. Kude samangat here yiru puang miandan pangatahuan sa teka Alatalla.

³Here puang karasa sarani Alatalla ngulah hubungan murunsia anri hanye jari maeh kamulek. Nelang daya here hamen manurut sara here raerai, balalu here puang tunduk ma sara sa natutui Alatalla.

⁴Hukum agama haut galis natampalus daya Kristus. Jari tiap ulun sa parisaya ma Kristus, hubunganni anri Alatalla jari maeh kamulek.

⁵Hi Moses nyurat amun ulun ikaeh anri Alatalla itetei hukum agama, ulun yiru sagar welum daya ngalut nuu ma hukum agama yiru.

⁶Kude neu sara ulun ikaeh anri Alatalla itetei parisaya ma Alatalla, Surat Barasis kaeau kala yiti, “Puang usah hanyu kaeau hawuang ateinu, ‘Hie sa sagar mambai ma surga?’ (aratini nginsing Kristus minau),

⁷atawa ‘Hie sa sagar minau ma dunia ulun matei?’ (aratini ngenat Kristus mambai teka pampatei).”

⁸Maksudni hanyeyiru kala yiti, “Kabar teka Alatalla yiru rite tatuu anri hanyu; hang mulutnu nelang hawuang ateinu.” Yiru kabar sa nawara kami; kabar neu ulun harus parisaya.

⁹Daya amun naun mangaku makai wawa naun “Yesus yiru Tuhan”, nelang naun parisaya hawuang atei naun Alatalla haut nyamelum Yesus teka pampatei, himat naun sagar salamat.

¹⁰Daya makai ateini ulun parisaya, hampe Alatalla narime hanye yalah ulun sa ikaeh anri Alatalla. Nelang makai wawani ulun mangaku, hampe hanye nasalamat.

¹¹Hawuang Surat Barasis nasurat, “Ulun sa parisaya puang sagar teun.”

¹²Yiru jari ma katuluh ulun, daya puang uweng bedani kawan ulun Yahudi anri kawan ulun bangsa lain. Alatalla isa yiru samula Tuhan ma katuluh ulun. Hanye ngami berkat sa jubung ma katuluh ulun sa laku karawah ma hanye.

¹³Hawuang Surat Barasis nasurat, “Katuluh ulun sa nanterau Tuhan, sagar salamat.”

¹⁴Kude kalaawe ulun tau nanterau Tuhan amun here huan parisaya? Nelang kalaawe here tau parisaya ma Tuhan amun here huan karengei neu hanye? Kamulek, kalaawe here tau karengei neu Tuhan, amun puang uweng sa iwara?

¹⁵Nelang kalaawe ulun tau nginsing kabar yiru amun here puang nautus? Hawuang Surat Barasis nasurat kala yiti, “Tuu leha kaehni pihawian kawan ulun sa nginsing Kabar Maeh teka Alatalla!”

¹⁶Kude puang katuluh ulun narime Kabar Maeh yiru. Daya hi Yesaya kaeau, “Tuhan, hie sa parisaya ma kabar sanawara kami?”

¹⁷Yiru sababni kawan ulun tau jari parisaya daya here karengei kabar, nelang kabar yiru rengei, daya naan ulun sa iwara neu Kristus.

¹⁸Kude aku nunti: Inun here samula huan karengei kabar yiru? Himat haut! Daya hawuang Surat Barasis nasurat kala yiti, “Lengan here haut maeung erang litar alam, kawan lengan here haut hampe pusing dunia.”

¹⁹Aku nunti lagi: Inun bangsa Israel huan karasa yiru? Elahni tuntian yiru samambatang natuing daya Moses. Hi Moses kaeau, “Kala yiti eau Alatalla, ‘Aku sagar ngulah naun kasiwa anri isa bangsa sa puang ulun pidian nelang aku sagar ngulah naun sangit anri isa bangsa sa budu.’ ”

²⁰Hi Yesaya labis heei lagi. Hanye kaeau, “Kala yiti eau Alatalla, ‘Kawan ulun sa puang ngantara aku, haut panalu aku; nelang aku nantarang tengaku ma here sa puang itunti neu aku.’ ”

²¹Kude neu bangsa Israel hi Yesaya kaeau, “Kala yiti eau Alatalla, ‘Hapus anrau aku nyurung tanganku ma isa bangsa sa mape silu nelang puang ngalut nuu.’ ”