Read Ma'anyan ROMA 12 Bible Online

ROMA 12 - Ma'anyan bible

ROMA 12

¹Pulaksanai katuluh! Alatalla tuu maeh anri takam. Daya sabab yiru aku ilaku tatuu nampan naun nyarah diri naun yalah isa parapah sa welum hulung ma Alatalla nelang sa ngampi sanang ateini. Ibadat naun ma Alatalla saharusni kala yiru.

²Ada budas ngalut lagu-lampah dunia yiti. Elahni Alatalla nyamau pribadi naun, nampan naun baubah. Anri kala yiru naun sanggup mantaru kabahumen Alatalla-hanyeyiru inun sa maeh nelang sa ngampi sanang ateini nelang sa paruna.

³Alatalla haut ngami ahi lelo ma aku. Yiru sababni aku ngami nasehat ma naun katuluhni: Ada kaingkam diri labis ambau teka sa sabujurni. Wuah naun ngakira kaadaan diri naun anri randah atei; tiap ulun ngakira dirini manurut kamampuan sa naami Alatalla ma hanye daya hanye parisaya ma Yesus.

⁴Tenga takam naan wahai anggota. Tiap anggota naan tugasni maisasaan.

⁵Kala yiru pada anri takam. Biar takam katuluhni rama, kude takam yalah isa tenga daya takam mira baya hang Kristus. Nelang tiap takam bahubungan isa anri sa lain yalah kawan anggota teka isa tenga.

⁶Tiap takam maisasaan naan kawan karunia palayanan sa balainan. Kawan karunia naami daya Alatalla ma takam manurut leloni. Daya yiru takam harus makai kawan karunia yiru. Ulun sa naan karunia neu iwara Kabar teka Alatalla, harus iwara Kabar teka Alatalla yiru manurut kamampuan sa naan hang hanye.

⁷Ulun sa naan karunia neu ngarawah ulun lain, harus tuu-tuu ngarawah ulun lain. Ulun sa naan karunia neu ngajar, harus tuu-tuu ngajar.

⁸Ulun sa naan karunia neu ngami samangat ma ulun lain, harus tuu-tuu ngami samangat ma ulun lain. Ulun sa naan karunia neu ngami ma ulun lain inun sa namilikini, harus nampalus yiru anri pikaeh atei sa wajar. Ulun sa naan karunia neu mamimpin, harus tuu-tuu mamimpin. Ulun sa naan karunia neu ngalalea ahi lelo ma ulun lain, harus nampalusni anri sanang atei.

⁹Sinta anri kapinuu atei. Marikang sa jahat, nelang itegei hang inun sa maeh.

¹⁰Wuah Pulaksanai katuluh ipasinta isa anri sa lain anri tuu-tuu atei kala kawan ulun ipulaksanai hawuang isa kulawaraga, nelang wuah naun saawe dahulu ngami hormat.

¹¹Bagawi anri rajin. Ada mawule. Bagawi ma Tuhan anri samangat teka Roh Alatalla.

¹²Wuah Pulaksanai harap ma Tuhan anri arai atei, sabar hawuang kasusahen, nelang utul badoa.

¹³Karawah nyansukup kaparluan kawan ulun Kristen lain nelang tarime kawan pulaksanai mira kaparisayaan sa puang naun kataru, anri sanang atei hawuang lewunu.

¹⁴Laku ma Alatalla nampan hanye mamberkat kawan ulun sa kejam anri hanyu. Hiai, laku Alatalla mamberkat here, ada nyapa.

¹⁵Umba arai anri kawan ulun sa arai, nelang nungkau anri here sa nungkau.

¹⁶Welum rukun isa anri sa lain. Ada sakah, kude sansameh dirinu anri ulun sa imbe kadudukanni. Ada ngingkam diri labis pandai teka sa sabujurni.

¹⁷Amun ulun ngulah jahat ma hanyu, ada iwalehni makai kajahaten. Ulah inun sa naanggap maeh daya ulun katuluh.

¹⁸Teka pihak naun, ngakali iyuh anri iyuh nampan welum damai anri katuluh ulun.

¹⁹Kawan Pulaksanaiku! Ada budas iwaleh dendam, elahni Alatalla sa nukum. Daya hawuang Surat Barasis nasurat, “Aku sa iwaleh. Aku sa sagar nukumni, eau Tuhan.”

²⁰Kabalikanni, amun musuhnu kajuju, ami hanye kuman; nelang amun hanye malah, ami hanye nguut. Daya anri ngulah kala yiru, naun sagar ngulah hanye umangan.

²¹Ada maladar dirinu nasantalau daya sa jahat, kude wuah naun nyantalau kajahaten makai pikaeh.