Read Ma'anyan ROMA 13 Bible Online

ROMA 13 - Ma'anyan bible

ROMA 13

¹Tiap ulun harus ngalut nuu ma pamarentah, daya puang uweng pamarentah sa puang kaiyuh kakuasaanni teka Alatalla. Nelang pamarentah sa naan itati, manjalan kakuasaanni atas parentah teka Alatalla.

²Yiru sababni ulun sa nawan pamarentah sameh anri nawan inun sa haut natantu daya Alatalla. Nelang ulun sa ngulah kala yiru sagar narime hukuman.

³Daya ulun sa ngulah maeh puang suah takut ma pamarentah. Ekat ulun sa ngulah jahat sa harus takut. Amun naun hamen nampan naun puang kaingkam takut ma pamarentah, naun harus ngulah sa maeh, balalu naun sagar natawat.

⁴Daya pamarentah samula walah Alatalla sa bagawi ma pikaehnu. Kude amun naun ngulah jahat, samula naun harus takut ma hanye, daya puang kawai tuu eleh hanye bakuasa neu nukum ulun. Hanye samula walah Alatalla, sa nyanawu hukuman Alatalla ma kawan ulun sa ngulah jahat.

⁵Yiru sababni naun harus ngalut nuu ma pamarentah-puang ekat daya naun puang hakun nahukum, kude pada daya suara kunuan ateinu.

⁶Yiru pada sababni wuah inun Pulaksanai bayar pajak, daya pamarentah samula pagawai Alatalla sa nampalus tugas sa hulung yiru.

⁷Jari bayar ma pamarentah inun sa harus nabayar naun ma hanye. Bayar pajak, amun naun harus bayar pajak; nelang bayar sukai amun Pulaksanai harus bayar sukai. Hargai here sa harus nahargai nelang hormat here sa harus nahormati.

⁸Ada bautang ala inun-inun anri hie-hie, kasuali bautang sinta ma isa anri sa lain. Daya ulun sa sinta sasameh murunsia, haut nampalus hukum Moses.

⁹Daya hukum agama Yahudi, hanyeyiru: Ada ibela, ada munu ulun, ada ngalat, ada bahiri inun sa naan wat ulun lain; katantuluhni yiru mira anri kawan hukum sa lain, haut natamulat jari isa hukum, hanyeyiru, “Sinta sasameh murunsia kala hanyu sinta dirinu raerai.”

¹⁰Ulun sa sinta ulun lain, puang sagar ngulah jahat ma ulun yiru. Jari ulun sa sinta sasamehni samula ulun sa haut nampalus katantuluh syarat hukum agama.

¹¹Lain hengka katuluhni yiru naun karasa sa wayah yiti samula wayah ma naun nampan kaelan teka manre. Daya tawukni ma naun nasalamat haut labis rite itati teka tawuk takam wau nuku parisaya.

¹²Malem haut kai paitah; nelang puang lawah lagi sagar kaanrau. Jari, ware takam taduh nampalus kawan pagawian piieng. Takam harus nampenu diri takam makai panrape piraai.

¹³Takam harus nampalus kawan hal terhormat kala sa biasani naulah ulun tawuk kaanrau; ada pesta bararami lewat batas, atawa mahamui. Ada cabul, atawa bakalakuan puang sanunuh. Ada babur, atawa bahiri.

¹⁴Elahni Tuhan Yesus Kristus sa nukas inun sa harus naulah naun. Nelang ada manurut pidasaran murunsia sa badosa neu mulur kabahirien atei.