Read Ma'anyan ROMA 14 Bible Online

ROMA 14 - Ma'anyan bible

ROMA 14

¹Ulun sa puang yakin neu inun sa naparisayani harus natarime anri maeh hang penah naun katuluh. Ada basual anri hanye neu kawan pandirianni.

²Naan ulun sa bapandirian, hanye iyuh nguta kawan inun-inun. Kude naan ulun lain sa maleme kayakinanni; hanye kaingkam hanye ekat iyuh nguta kawan sayur.

³Ulun sa nguta kawan ala inun-inun ada nganggap randah ulun sa ekat nguta kutaen sa bapidi ulun sa ekat nguta kutaen sa bapidi, ada pada ngahalaen ulun sa nguta kawan ala katuluh kutaen, daya Alatalla haut narime hanye.

⁴Naun yena hie hampe naun harus mangadili walah ulun lain? Hau walah yiru tumbang atawa minri, yiru uras urusan tuanni. Nelang walah yiru samula sagar minri mawitu, daya Tuhan sanggup ngulah hanye minri mawitu.

⁵Naan ulun sa kaingkam anrau saisa labis penting teka kawan anrau sa lain, kude ulun lain kamulek nganggap kawan anrau yiru sameheleh. Elahni tiap ulun nukas pandirianni raerai.

⁶Ulun sa mamenting kawan anrau bapidi, ulun yiru ngulah kala yiru neu mahormat Tuhan. Ulun sa nguta ala katuluhni, ngulah kala yiru neu mahormati Tuhan, daya hanye batarima kasih ma Alatalla gana anakuta yiru. Kala yiru pada anri ulun sa nguta ekat kutaen bapidi; ulun yiru pada mahormat Tuhan nelang batarima kasih ma Alatalla.

⁷Puang sunah erang kaulun teka takam welum ma dirini raerai; nelang puang sunah erang kaulun teka takam sa matei ma dirini raerai.

⁸Amun takam welum, takam welum ma Tuhan. Nelang amun takam matei, takam pada matei ma Tuhan. Jari welum atawa matei, takam samula milik Tuhan.

⁹Kristus haut matei nelang welum kamulek. Yiru sababni hanye jari Tuhan ma kawan ulun sa welum nelang pada ma kawan ulun sa haut matei.

¹⁰Jari, Pulaksanai katuluh! Inun gunani ngahalaen pulaksanainu sa sameh parisaya? Nelang inun gunani naun nganggap hanye randah? Takam katuluh sagar nadap Alatalla nampan naadili.

¹¹Hawuang Surat Barasis nasurat, “Kapinuuni,” eau Tuhan, “tiap ulun sagar ileku nyambah hang hadapanku; nelang tiap ulun sagar mangaku aku Alatalla.”

¹²Jari tiap takam maisasaan harus mananggung jawab katuluh pagawian takam ma Alatalla.

¹³Daya sabab yiru ada takam ipamada-pangampihala. Likan patut ngakali nampan naun puang ngulah hal sa tau nyantawang pulaksanai mira kaparisayaan tagoda palus badosa.

¹⁴Daya aku mira baya anri Tuhan Yesus, aku parisaya tuu puang uweng sunah isa sabujurni najis; kude hal yiru najis ma ulun, amun ulun yiru nganggapni najis.

¹⁵Kude amun gana inun sa nakuta naun, erang kaulun pulaksanai mira kaparisayaan mahanang ateini, batantu naun puang lagi batindak makai sinta. Amun Kristus haut matei ma erang ulun, ada maladar ulun yiru natanrusak gana inun sa nakuta naun.

¹⁶Daya yiru ada budas maladar inun sa maeh ma naun, naanggap puang maeh daya ulun lain.

¹⁷Daya amun Alatalla marentah pamelum ulun, inun sa iyuh nakuta atawa nauut, puang penting lagi. Sa penting hanyeyiru ulun yiru nampalus kabahumen Alatalla, kaingkam sanang atei nelang narime kaaraien sa naami daya Roh Alatalla.

¹⁸Ulun sa malayanni Kristus anri sara kala yiru, ulun yiru ngampi sanang atei Alatalla nelang nahargai daya kawan ulun lain.

¹⁹Daya yiru tujuan takam patut saratang neu nampalus kawan sanimbul karukunen nelang sameh-sameh mambangun.

²⁰Ada daya gana sual anakuta, naun nanrusak inun sa haut naulah daya Alatalla. Katuluh anakuta samula halal neu nakuta; kude amun inun sa nakuta naun ngulah sabab ulun lain badosa, yiru naun hala.

²¹Labis maeh puang usah nguta daging atawa nguut anggur atawa nampalus inun heneng amun hal yiru ngulah sabab erang kaulun pulaksanai mira kaparisayaan jari badosa.

²²Elahni inun sa naparisaya naun yiru, naun nampalusni hang hadapan Alatalla ma naun raerai. Ulun sa puang uweng sabab neu kaingkam bakahalaen gana inun sa naanggapni bujur, ulun yiru sanang marauh.

²³Kude ulun sa kaingkam bembang neu nguta ala inun-inun. Kude sika nguta anakuta yiru, ulun yiru naampihala daya Alatalla; daya ulun yiru puang batindak manurut kayakinanni neu inun sa bujur nelang isa hala. Nelang inun sa natampalus puang anri kayakinan sayiru dosa.