Read Ma'anyan ROMA 15 Bible Online

ROMA 15 - Ma'anyan bible

ROMA 15

¹Takam sa tuu-tuu yakin neu inun sa naparisaya daya takam, harus sabar nadap kawan kabaratan ulun sa mahak kayakinanni. Ada takam hamen ngampi sanang atei takam raerai.

²Kabalikanni tiap takam harus ngampi sanang atei sasameh pulaksanai takam ma pikaehni, nampan kayakinanni batambah mansing.

³Daya Kristus budas puang mamikir kasanangen dirini raerai. Hawuang Surat Barasis nasurat kala yiti, “Katuluh lengan wadaan sa natuju ma hanyu haut lawu ma ambau aku.”

⁴Katuluh sa nasurat hawuang Surat Barasis samula pakai ngajar takam. Daya pangajaran sa natarime takam teka Surat Barasis ngulah takam tabah nelang mansing hampe takam kaiyuh harap ma Alatalla.

⁵Mudahan Alatalla, sa ngami katabahan nelang rariu ma murunsia, ngarawah naun nampan welum anri bulat atei, manurut suntu Kristus Yesus.

⁶Anri bulat atei naun katuluhni sameh-sameh tau nawat Alatalla, Ambah Tuhan takam Yesus Kristus.

⁷Daya yiru wuah naun katuluh narime isa anri sa lain anri sanang atei, sameh kala Kristus pada narime naun nampan nawat nante Alatalla.

⁸Daya, itung, Kristus haut malayanni ulun Yahudi nampan nantarang Alatalla satia hawuang nampalus kawan janjini ma datu nini takam.

⁹Yesus pada ngulah kawan bangsa lain nawat nante Alatalla daya pikaeh ateini ma here. Hawuang Surat Barasis nasurat kala yiti, “Daya yiru aku sagar nawat hanyu hang penah kawan bangsa, aku sagar manyanyi tawat hormat ma ngarannu.”

¹⁰Naan pada nasurat kala yiti, “Hewu harui baya ulun pidian Alatalla, u kawan bangsa!”

¹¹Nelang yiti pada, sa naeau daya Yesaya, “Tawat Alatalla, u katantuluh bangsa, wuah katantuluh ulun nawat hanye!”

¹²Nelang yiti pada sa naeau daya Yesaya, “Hengka katurunan Isai sagar hawi erang kaulun sa sagar marentah kawan bangsa; kawan bangsa yiru sagar baharap ma hanye.”

¹³Alatalla samula unengan kaharapen naun. Mudahan hanye nuang atei naun makai katuluh kaaraien nelang kasanangen daya naun parisaya ma hanye, nampan makai kuasa Roh Alatalla naun magin harap ma Alatalla.

¹⁴Pulaksanaiku katuluh! Aku yakin himat naan wahai tatuu hal sa maeh hang naun. Naun pada karasa ala katantuluhni nelang tau ngajar isa anri sa lain pada.

¹⁵Kude neu kawan hal sa batantu, aku ngampi itung naun anri tegas hawuang surat yiti, daya Alatalla haut ngami ma aku tugas yiru.

¹⁶Hanye haut ngulah aku jari palayan Kristus Yesus nampan nautus ma kawan bangsa sa puang Yahudi. Nelang aku batindak yalah imam, sa iwara Kabar Maeh teka Alatalla, nampan kawan ulun sa puang Yahudi jari isa parapah ma Alatalla sa tau natarime dayani. Mudahan Roh Alatalla ngulah here jari isa parapah sa hulung ma Alatalla.

¹⁷Jari, daya aku haut mira baya anri Kristus Yesus, balalu aku tau kaingkam arai gana pagawianku ma Alatalla.

¹⁸Aku heei kaeau kala yiru ekat neu inun sa haut naulah Kristus itetei aku nampan nanyari kawan ulun sa puang Yahudi ngalut nuu ma Alatalla. Aku nampalus yiru anri kawan lengan atawa makai pagawian,

¹⁹sa nasinrah anri kawan kaajaiban nelang kawan hal sa luar biasa; katuluhni yiru daya kuasa Roh Alatalla. Kabar Maeh neu Kristus haut waraku katuluhni ma rama ulun, mulai teka Yerusalem hampe ma Ilirikum.

²⁰Bahumku hanyeyiru iwara Kabar Maeh teka Alatalla hang kawan unengan hang awe ulun huan karengei neu Kristus. Daya aku puang hamen ngulah pagawian hang ambau pondasi sa naandak daya ulun lain.

²¹Hawuang Surat Barasis nasurat, “Kawan ulun sa huan suah narime kabar neu hanye, sagar kadinung; nelang here sa huan suah karengei, sagar kataru.”

²²Yiru sababni aku haut gaha bahalangan lepuh ganta naun.

²³Kude itati pagawianku hang kawan daerah yiru haut luput. Bataun-taun lawahni aku hamen ganta naun.

²⁴Die amun aku mitah tumpuk naun hawuang pakiaanku ma Spanyol, aku harap tau panalu anri naun nelang erang pitus tau arai baya anri naun. Udi yiru aku harap naun tau ngarawah aku neu pakiaanku ma Spanyol yiru.

²⁵Kude itati aku hamen ma Yerusalem neu nginsing bantuan ma ulun wat Alatalla hang yaru.

²⁶Daya kawan ungkup hang Makedonia anri Akhaya haut satuju nampan ngami sumbangan ma kawan pulaksanai sa paua hang penah ulun wat Alatalla hang Yerusalem.

²⁷Anri sanang atei here nukas neu nampalus yiru. Samula satuuni here patut ngarawah kawan pulaksanai sa paua hang Yerusalem yiru; daya teka kawan ulun Yahudi yiru kawan ulun sa puang Yahudi haut narime kawan berkat teka Alatalla. Jari, kawan ulun puang Yahudi yiru patut pada ngarawah kawan ulun Yahudi makai kawan berkat barupa banda barang.

²⁸Amun aku haut nampalus tugasku yiti, nyarah sumbangan sa haut nakumpul yiru ma here sa hang Yerusalem yiru. Balalu aku sagar tulak ma negeri Spanyol mitah tumpuk naun.

²⁹Amun aku hawi nunung naun, himat aku hawi anri wahai berkat teka Kristus ma naun.

³⁰Demi Tuhan takam Yesus Kristus, nelang demi sinta sa naami daya Roh Alatalla, aku ilaku tatuu anri naun, mudahan naun umba badoa tuu-tuu sinrah anri aku ma Alatalla neu aku.

³¹Badoa nampan Alatalla napas aku teka tangan kawan ulun sa puang parisaya hang Yudea, nelang nampan tugasku neu nginsing sumbangan ma Yerusalem natarime anri sanang atei daya ulun wat Alatalla hang yaru.

³²Anri kala yiru, amun Alatalla ngabahumen, aku kaiyuh hawi nunung naun, anri arai atei. Nelang aku sagar kaingkam parariu hang penah-penah naun.

³³Mudahan Alatalla, sa ngami kasanangen ma murunsia, nyinrah Pulaksanai katuluhni. Amen.