Read Ma'anyan ROMA 2 Bible Online

ROMA 2 - Ma'anyan bible

ROMA 2

¹Daya sabab yiru, pulaksanai katuluh, hie naun hampe naun hamen ngampi hala ulun lain? Naun budas puang uweng tujuan sunah butit pakai ngaluntenga! Daya amun naun ngampi hala ulun lain, padahal naun raerai nampalus ulahan sa sameh kala here, yiru naun nyanawu hukuman ma ambau diri naun pada.

²Takam karasa amun Alatalla nyanawu hukuman ma ambau kawan ulun sa nampalus kawan ulahan sa kala yiru, kaputusan Alatalla yiru bujur.

³Kude naun, pulaksanai katuluh, ngulah pada kawan hal sa nawada naun hang kawan ulun lain! Inun naun minda naun kaiyuh lapas teka hukuman Alatalla?

⁴Atawa naun nganggap enteng lelo Alatalla anri pilapang atei nelang kasabarenni sa kala yiru hante? Himat naun karasa Alatalla nantarang pikaeh ateini daya hanye hamen nampan naun batobat teka kawan dosa naun.

⁵Kude naun mape silu nelang puang hamen miubah. Daya sabab yiru naun raerai sa ngulah hukuman naun batambah weat hang Anrau Kiamat, amun Alatalla ngalalea kasangitenni palus nyanawu hukuman sa adil.

⁶Daya Alatalla sagar iwaleh ma tiap ulun manyu kala pagawianni.

⁷Alatalla ngami pamelum sajati nelang kalalawah ma here sa utul ngulah maeh nampan kaiyuh sa mulia, anri hormat nelang sa kalalawah.

⁸Kude kawan ulun sa ekat ngunu tengani raerai nelang puang hamen ngalut nuu ma Alatalla malengkan umba sa jahat, kawan ulun yiru sagar jari kasangiten Alatalla.

⁹Tiap ulun sa rajin ngulah kajahaten sagar uyuh rara nelang wuah kahanangen; sa mambatang ulun Yahudi, kala yiru pada ma kawan ulun bangsa lain.

¹⁰Kude katuluh ulun sa rajin ngulah maeh sagar naami kamuliaan nelang kahormatan nelang kasanangen daya Alatalla; sa mambatang ma ulun Yahudi, kala yiru pada ma kawan ulun bangsa lain.

¹¹Daya inun sanatampalus Alatalla ma murunsia yiru sameh.

¹²Kawan ulun bangsa lain badosa anri puang karasa hukum agama Yahudi. Jari here nahukum hang luar hukuman yiru. Kude kawan ulun Yahudi badosa haut karasa hukum yiru; daya yiru here sagar naadili pada makai hukum yiru.

¹³Daya ulun ikaeh kamulek anri Alatalla, puang daya ulun yiru haut karasa hukum agama Yahudi, malengkan daya hanye nampalus inun sa naan hawuang hukum yiru.

¹⁴Kawan ulun bangsa lain puang kataru hukum agama Yahudi. Kude amun here daya kabahumen raerai nampalus inun sa naparentah daya hukum yiru, atei here raerai sa jari hukum ma here, biar here puang kataru hukum agama Yahudi.

¹⁵Kalakuan here nantarang kawan inun sa naparentah daya hukum yiru tasurat hawuang atei here. Atei akal here pada mambukti hal yiru, daya here raerai naan wayahni naampihala nelang naan wayahni nabenarkan daya kunuan here.

¹⁶Kalayiru sagar jari hanrian hang anrau sa haut natukas yiru. Hang anrau yiru-manyu Kabar Maeh sa nawaraku-Alatalla itetei Yesus Kristus, sagar mangadili katuluh rasia atei nelang pikiran katuluh ulun.

¹⁷Kude itati kala awe anri Pulaksanai katuluh? Pulaksanai mangaku ulun Yahudi. Naun itegei anri hukum agama Yahudi nelang pulaksanai arai gana hubungan naun anri Alatalla.

¹⁸Pulaksanai kaiyuh hawan patitah teka hukum yiru, hampe naun karasa kabahumen Alatalla nelang tau nukas saawe sa maeh.

¹⁹Naun yakin naun samula pamimpin ulun pehe nelang piraai ma here sa muneng hawuang piieng;

²⁰Naun guru ma kawan ulun sa puang bahadat, nelang guru kawan ulun sa budu. Naun yakin hawuang hukum agama Yahudi, naun naan pangatahuan anri ajaran sa bujur.

²¹Naun ngajar ulun lain; kude wuah inun naun puang ngajar diri naun raerai? Naun ngajar ulun nampan ada ngalat, padahal naun raerai ngalat!

²²Naun ngajar ulun nampan ada ibela, padahal naun raerai ibela! Naun muar anri barhala, padahal naun raerai ngalap kawan barang teka kawan lewu barhala.

²³Naun iwawara wat naun naan hukum Moses, padahal naun mahina Alatalla anri puang nampalus hukum Alatalla.

²⁴Hawuang Surat Barasis nasurat kalayiti, “Daya naun, kawan ulun Yahudi, ngaran Alatalla natangkurun hang penah kawan bangsa lain.”

²⁵Amun naun ngalut nuu ma hukum agama Yahudi, sunat naun naan riranni pada. Kude amun naun puang tau ngalut nuu ma kawan hal sa naparentah hawuang hukum yiru, sunat naun yiru budas puang bariran.

²⁶Amun erang kaulun puang Yahudi sa puang nasunat, nampalus hukum agama Yahudi, angneh Alatalla nganggapni kala ulun sa haut nasunat?

²⁷Nelang kawan ulun sa puang nasunat yiru sagar ngampi hala naun ulun Yahudi, daya naun uweng hukum agama Yahudi nelang naun nasunat, kude naun malangar hukum yiru. Here puang nasunat, kude likan here sa ngalut nuu hukum agama Yahudi.

²⁸Daya ulun Yahudi sajati puang ulun sa ekat ngaranni ulun Yahudi; nelang ulun sa tuu-tuu nasunat puang ulun sa nasunat ekat sara lahir.

²⁹Kabalikanni, erang kaulun Yahudi sajati samula ulun sa ateini bajiwa Yahudi; nelang sunat sa sajati samula sunat hang atei sa nakaraja daya Roh Alatalla, puang sa nasatat hawuang buku. Ulun sa kalayiru narime tawat teka Alatalla, puang teka murunsia.