Read Ma'anyan ROMA 5 Bible Online

ROMA 5 - Ma'anyan bible

ROMA 5

¹Itati takam haut ikaeh kamulek anri Alatalla, daya takam parisaya. Nelang daya gana yiru takam welum hawuang kadamaian anri Alatalla itetei Tuhan takam Yesus Kristus.

²Daya gana takam parisaya ma Yesus, balalu hanye ngami tau pada ma takam kaingkam sinta Alatalla, nelang anri sinta yiru takam welum itati. Daya yiru takam arai atei gana takam naan harapan sa takam himat sagar kaingkam kasanangen sa naami Alatalla.

³Nelang diwi teka yiru, takam pada arai hawuang kahanangen, daya takam karasa gana kahanangen ngulah ulun balalu mansing,

⁴nelang kakansingen sagar ngulah ulun tahan uji; yiti sa nimbul kaharapen.

⁵Kaharapen sa kala yiti puang sagar ngulah kasasalen takam, daya atei takam haut nahuang daya Alatalla makai sintani. Alatalla nampalus yiru anri itetei Rohni, sa haut naamini ma takam.

⁶Tawuk takam hawuang saraba puang uweng kakuaten, Kristus matei ma takam hang tawuk wayahni tangar tuu kala sa natukas daya Alatalla; padahal takam kawan ulun sa lawit teka Alatalla.

⁷Ma erang kaulun sa adil sika mahadin ulun hakun matei. Barangkali ma erang kaulun sa maeh, naan pada ulun sa heei matei.

⁸Kude Alatalla nantarang sintani ma takam tawuk Kristus matei ma takam hang tawuk takam magun ulun badosa.

⁹Itati takam haut ikaeh kamulek anri Alatalla itetei pampatei Kristus; daya yiru himat takam sagar nasalamat pada daya Kristus teka karikangen Alatalla.

¹⁰Amun hang tawuk takam bamusuh anri Alatalla, takam badamai anri hanye itetei pampatei Anakni, duan likan itati udi hubungan takam anri Alatalla maeh kamulek, batantu takam sagar nasalamat pada itetei pamelum Kristus.

¹¹Nelang diwi teka yiru, takam pada arai daya pikaeh Alatalla itetei Tuhan takam Yesus Kristus. Daya itetei Kristus, takam itati kaingkam hubungan takam sa maeh yiru anri Alatalla.

¹²Dosa masuk mawuang dunia itetei erang kaulun, nelang teka dosa yiru timbul pampatei. Gana yiru, pampatei nalei mihampit hang katantuluh ulun murunsia, daya katantuluh ulun haut badosa.

¹³Kapihuan hukum agama Yahudi naami, dosa haut naan hang wuang dunia. Kude dosa yiru puang nahukum, daya puang uweng hukum sa tau nalangar.

¹⁴Kude, teka jaman Adam hampe hang jaman Moses, pampatei nguasa katantuluh ulun murunsia. Likan kawan ulun sa puang ngulah palangaran anri sara sa sameh kala sa naulah daya Adam, kawan ulun yiru sika tamput pada nakuasa daya pampatei. Hi Adam hanyeyiru gambaran teka hanye sa sagar hawi hanrian.

¹⁵Kude kararuehni yiru puang sameh; daya pangamian Alatalla lawit labis hante amun nabanding anri palangaran sa naulah daya Adam. Palangaran daya erang kaulun ngulah rama ulun matei. Kude labis hante lagi gana lelo Alatalla anri pangamian kasalamatan sa naamini ma kala yiru rama ulun, itetei pikaeh atei erang kaulun, hanyeyiru Yesus Kristus.

¹⁶Lelo Alatalla pada lawit labis hante teka dosa ulun sa isa yiru. Daya udi erang kaulun ngulah palangaran, kaluar kaputusan “Bakahalaen”. Kude udi rama ulun ngulah dosa hawi pangamian teka Alatalla sa ngalalea, “Puang uweng bakahalaen”.

¹⁷Palangaran daya erang kaulun, pampatei nalei mihampit maaru-maati itetei ulun sa isa yiru. Kude labis hante lagi gana inun sa naulah daya erang kaulun sa lain, hanyeyiru Yesus Kristus. Itetei hanye, Alatalla ngami leloni ma kala yiru rama ulun, naami tuu eleh nampan ngami tau pada here ikaeh kamulek anri Alatalla; here sagar bakuasa hang dunia yiti itetei Kristus.

¹⁸Jari, kala wangun palangaran daya erang kaulun ngulah katantuluh ulun murunsia nahukum, kala yiru pada ulahan erang kaulun sa makai kabahumen Alatalla, ngulah katantuluh ulun nasanepah teka kahalaen palus naami pamelum.

¹⁹Nelang kala wangun rama ulun jari ulun badosa daya erang kaulun puang ngalut nuu, kala yiru pada rama ulun naami tau pada ikaeh kamulek anri Alatalla daya erang kaulun ngalut nuu ma Alatalla.

²⁰Sa ngami hukum agama Yahudi hanyeyiru Alatalla raerai. Kude magin murunsia ngakali nampan ngalut nuu ma hukum yiru, magin here malangarni balalu badosa nadap Alatalla. Kude magin murunsia ngulah dosa, Alatalla pada magin sinta here.

²¹Nah, takam harus matei daya takam ngulah dosa. Kude Alatalla sinta takam nelang ngami lalan ma takam nampan ikaeh kamulek anri hanye. Nelang daya hubungan takam anri Alatalla haut maeh kamulek, hanye ngami pada pamelum sajati palus kalalawah ma takam itetei Yesus Kristus, Tuhan takam.