Read Ma'anyan ROMA 6 Bible Online

ROMA 6 - Ma'anyan bible

ROMA 6

¹Amun kala yiru, inun sa tau naeau takam? Inun harus takam magun ngulah dosa nampan Alatalla magin sinta takam?

²Batantu puang! Dosa puang lagi bakuasa hang ambau takam, jari haawe tau takam welum nelang saratang ngulah dosa?

³Inun naun karasa hang tawuk takam nabaptis yiru, takam natamaya anri Kristus Yesus? Yiti baarati takam natamaya anri pampateini.

⁴Makai baptisan yiru, takam napasar baya Kristus nelang umba matei sinrah hanye, nampan kala wangun Kristus nasamelum teka pampatei daya kuasa Ambah sa mulia, kalayiru pada takam tau welum hawuang pamelum wau.

⁵Amun takam haut jari isa anri Kristus daya takam umba matei sinrah hanye, takam sagar jari isa anri hanye pada daya takam umba nasamelum kamulek kala hanye.

⁶Takam karasa kawan pidasaran takam sa uhang yalah murunsia haut natampatei sinrah Kristus hang kayu balasangar nampan kuasa pidasaran takam sa badosa yiru nasanenuh; anri kalayiru takam puang lagi nasamalah daya dosa.

⁷Daya amun erang kaulun matei; ulun yiru nasanepah teka kuasa dosa.

⁸Amun takam haut matei baya Kristus, takam parisaya himat takam pada sagar welum baya hanye.

⁹Daya takam karasa Kristus haut nasamelum teka pampatei nelang hanye puang sagar matei lagi; pampatei haut puang lagi bakuasa hang ambau dirini.

¹⁰Pampatei sa wuah Kristus hanyeyiru pampatei ma dosa. Yiru jari ekat hinra ma kalalawahni. Nelang pamelum sa najalanini itati hanyeyiru welum ma Alatalla.

¹¹Naun pada harus nganggap diri naun matei ma dosa, kude welum hawuang hubungan sa rantep anri Alatalla itetei Kristus Yesus.

¹²Ada lagi maladar dosa nguasa pamelum naun sa ngihau nampan naun ada manurut kabahumen naun sa jahat.

¹³Ada pada naun nyarah anggota tenga naun ma kuasa dosa neu napakai ma kawan maksud sa jahat. Kude sarah diri naun ma Alatalla yalah ulun sa haut napinda teka pampatei ma pamelum. Sarah galis diri naun ma Alatalla nampan napakai neu nampalus kabahumen Alatalla.

¹⁴Dosa puang iyuh nguasa naun, daya naun puang lagi welum hang kapit hukum agama Yahudi kude hang kapit lelo Alatalla.

¹⁵Itati, inun kasimpulanni? Inun iyuh takam badosa, daya takam puang lagi hang kapit kuasa hukum agama Yahudi, malengkan hang kapit kuasa lelo Alatalla? Budas puang!

¹⁶Inun naun karasa amun naun nyarah diri ma erang kaulun nampan nampalus kabahumenni himat tuu naun walah ulun sa ngalut nuu naun yiru-hau walah dosa sa nginsing naun ma pampatei, atawa walah sa ngalut nuu ma Alatalla, balalu gana kalayiru ikaeh kamulek anri Alatalla.

¹⁷Kude tarima kasih ma Alatalla! Daya dahulu hie naun jari walah dosa, kude itati naun anri sagalis atei ngalut nuu ma pangajaran sa bujur sa haut naami ma naun.

¹⁸Naun haut nasanepah teka dosa, nelang itati jari walah ma kabahumen Alatalla.

¹⁹Daya naun puang murah kataru, aku makai kawan suntu neu walah nampan labis murah naun kataru. Dahulu hie naun nyarah diri naun sagalisni yalah walah ma kawan hal sa bere nelang sa jahat neu nampalus kabahumen jahat. Kala yiru pada itati, wuah naun nyarah diri sagalisni yalah walah ma kabahumen Alatalla neu nampalus kabahumen Alatalla sa hulung.

²⁰Tawuk naun nasamalah daya dosa, naun puang nakuasa daya kabahumen Alatalla.

²¹Hang tawuk yiru inun kauntungan sa natarime naun teka kawan hal sa itati naun umangan nampalusni? Kawan pagawian yiru ekat ngendei pampatei!

²²Kude itati naun haut nasanepah teka dosa, nelang jari walah Alatalla. Kauntungan naun hanyeyiru pulaksanai welum hulung ma Alatalla nelang yiru ngami pamelum sajati palus kalalawah.

²³Daya pampatei samula upa teka dosa; kude pamelum sajati palus kalalawah baya Kristus Yesus Tuhan takam samula pangamian sa naami tuu eleh daya Alatalla.