Read Ma'anyan ROMA 7 Bible Online

ROMA 7 - Ma'anyan bible

ROMA 7

¹Pulaksanai katuluh! Naun katuluhni haut kataru hukum. Jari, naun karasa neu kuasa hukum hang ambau erang kaulun, ekat napakai salawah ulun yiru magun welum.

²Erang kaulun wawei sa badarangan, umpamani, taikat daya hukum ma daranganni ekat salawah daranganni magun welum. Amun daranganni matei, wawei yiru bebas teka hukum sa mangikat hanye ma daranganni.

³Amun wawei yiru welum baya upu lain hang tawuk daranganni magun welum, balalu wawei yiru naantuh ibela. Kude amun daranganni matei, sara hukum, wawei yiru haut bebas. Kude amun hanye kawin lagi anri erang kaulun upu lain, hanye puang ibela.

⁴Kalayiru pada halni anri naun, pulaksanaiku katuluh. Ma hukum agama Yahudi naun haut matei, daya naun haut natamaya anri tenga Kristus nelang jari ulun watni sa haut nasamelum kamulek teka pampatei. Hanye nasamelum teka pampatei nampan takam tuu bariran ma Alatalla hawuang pamelum takam.

⁵Daya dahulu hie takam welum manurut kawan pidasaran murunsia. Hang tawuk yiru kawan kabahirien sa badosa, sa timbul daya naan hukum agama, negei paranan hawuang diri takam. Yiru sababni takam nampalus kawan hal sa ngulah pampatei.

⁶Kude itati takam puang lagi taikat hang hukum agama Yahudi. Takam haut matei ma hukum sa dahulu hie haut marentah takam. Takam puang lagi jari walah kala sara sa uhang, manurut hukum sa nasurat. Itati takam jari walah manyu sara sa wau natutui daya Roh Alatalla ma takam.

⁷Amun kala yiru, inun sa tau naeau takam? Himat hukum agama Yahudi jahat? Batantu puang! Kude hukum yiru sa ngajar aku neu dosa. Aku puang sagar karasa pitis mungkir yiru inun, jaka hukum agama puang kaeau “Ada pitis mungkir.”

⁸Itetei hukum agama, dosa kaiyuh kasampatan neu ngampi hulet kawan masam kabahirien sa pitis mungkir hawuang ateiku; daya amun hukum agama yiru puang uweng, himat dosa pada matei.

⁹Sadi aku welum anri puang uweng hukum agama. Kude tawuk hukum agama naan, dosa mulai welum

¹⁰balalu aku matei. Kude hukum agama yiru, sa mulani nabahum nampan ngami pamelum, likan ngampi hulet pampatei ma aku.

¹¹Daya itetei hukum agama yiru, dosa ngalap kasampatan nipu nelang munu aku.

¹²Hukum agama asalni teka Alatalla, nelang tiap parentah hawuang hukum yiru hawi teka Alatalla, sa adil nelang maeh.

¹³Nah, inun yiti baarati sa maeh yiru ngendei pampatei ma aku? Batantu puang! Dosa sa ngendei pampatei yiru. Anri makai sa maeh, dosa ngendei pampatei ma aku, nampan kawan pagawian dosa lentah dinung. Itetei kawan parentah Alatalla, tabukti tuu leha jahatni dosa.

¹⁴Takam karasa hukum agama Yahudi asalni teka Roh Alatalla; kude aku yiti murunsia sa maleme. Aku haut naari nampan jari walah dosa.

¹⁵Daya aku raerai puang kataru pagawianku. Kawan hal sa hamen naulahku, yiru puang aku ngulah.

¹⁶Nah, amun aku ngulah hal sa balawanan anri kasindienku, yiru baarati aku mangaku hukum agama Yahudi yiru maeh.

¹⁷Jari, puang aku lagi satuuni ngulah yiru, malengkan dosa sa bakuasa hawuang diriku.

¹⁸Aku karasa himat puang uweng sunah isa sa maeh hawuang diriku; hanyeyiru hawuang pidasaranku kala murunsia. Daya naan kabahumen hang aku neu ngulah sa maeh, kude aku puang sanggup nampalusni.

¹⁹Aku puang ngulah sa maeh sa nakasinnienku ngulahni; kabalikanni aku ngulah kawan sa jahat, sa aku puang sindi ngulahni.

²⁰Amun aku ngulah kawan hal sa puang kasindienku ngulahni, yiru baarati puang aku sa ngulah kawan hal yiru, malengkan dosa sa bakuasa hawuang diriku.

²¹Jari, aku ngalap kasimpulan hukum yiti sa negei peranan: hanyeyiru amun aku hamen ngulah sa maeh, kude ekat sa jahat sa timbul hang aku.

²²Batinku katuju ma hukum Alatalla,

²³kude aku sadar hawuang diriku naan pada hukum lain sa negei peranan-hanyeyiru hukum sa balawanan anri hukum sa naakui daya atei akalku. Yiru sababni aku taikat hawuang hukum dosa sa negei peranan hawuang diriku.

²⁴Nah, kala yiti kaadaanku: aku ngalut nuu ma hukum Alatalla makai atei akalku kude makai pidasaran murunsia, aku nyangkapit dosa. Tuu leha silakani aku yiti hie sa tau nyalamat aku teka tenga yiti sa nginsing aku ma pampatei? Tarima kasih ma Alatalla! Hanye hamen nyalamat aku itetei Yesus Kristus.