Read Ma'anyan ROMA 9 Bible Online

ROMA 9 - Ma'anyan bible

ROMA 9

¹Inun sa sagar naeauku yiti samula tuu daya aku milik Kristus. Aku puang ipusu. Atei akalku sa naayak daya Roh Alatalla, ngampi yakin aku pada himat lenganku yiti tuu.

²Aku tuu tamuwe nelang ateiku mahanang

³daya kawan pulaksanaiku mira bangsa anri aku. Daya ma here, aku raerai rela nakutuk daya Alatalla nelang natampisah teka Kristus.

⁴Here samula ulun pidian, nelang Alatalla ngulah here jari kawan anakni raerai, nelang nantarang kuasani ma here. Hanye ngulah janji anri here nelang ngami ma here hukum agama. Alatalla iwara ma here kalaawe here harus baibadat nelang here haut narime pada kawan janjini.

⁵Here samula katurunan teka datu nini takam. Kristus manyu murunsia baasal teka bangsa here. Hanye labis ambau teka katuluhni. Tawat ma Alatalla hampe kalalawahni! Amin.

⁶Aku puang bamaksud kaeau janji Alatalla haut puang payu lagi; kude puang katuluh ulun Israel yiru ulun sa napidi daya Alatalla.

⁷Puang katuluh katurunan Abraham yiru kawan anak Alatalla. Daya Alatalla kaeau ma hi Abraham, “Ekat katurunan wat Ishak sa sagar naantuh katurunannu.”

⁸Yiru baarati katurunan Abraham sa jari kawan anak Alatalla, samula ekat katurunanni sa nakayaan daya gana janji Alatalla; kude puang katuluh katurunanni.

⁹Daya janji Alatalla yiru kala yiti, “Hang tawuk sa haut natukas, aku sagar mulek lagi, nelang hi Sarah sagar uweng erang kaulun anak upu.”

¹⁰Nelang yiti pada; hi Rebeka ngayaan rueh kaulun anak upu teka isa ambah, hanyeyiru hi Ishak datu nini takam.

¹¹Kapihuan rueh kaulun anak yiru nakayaan, Alatalla haut nukas pidianni ma kalalawahni. Pidian Alatalla yiru puang bagantung ma inun sa tau naulah daya murunsia, kude bagantung ekat ma panggilan Alatalla raerai. Daya hang tawuk karueh anak upu Rebeka yiru huan tau ngulah ala inun-inun sa maeh atawa sa jahat,

¹²Alatalla haut kaeau ma hi Rebeka, “Sa matueh sagar malayanni sa iya.”

¹³Hawuang Surat Barasis nasurat Alatalla kaeau kala yiti, “Aku sinta hi Yakub, kude aku muar hi Esau.”

¹⁴Inun kasimpulan takam itati? Inun Alatalla yiru adil? Batantu tuu Alatalla adil!

¹⁵Daya Alatalla kaeau ma hi Moses, “Aku sagar nantarang ahi lelo ma ulun sa aku hamen natarang ahi lelo. Nelang aku sagar nantarang kasih sayang ma ulun sa aku hamen nantarang kasih sayang.”

¹⁶Jari, kaputusan Alatalla yiru puang bagantung ma karelaan murunsia atawa ma ngakali murunsia, malengkan ekat ma pikaeh atei Alatalla nadap ulun sa napidini yiru.

¹⁷Daya hawuang Surat Barasis nasurat, “Alatalla kaeau ma raja Mesir, ‘Aku ngulah hanyu jari raja ekat ma isa tujuan yiti, hanyeyiru nampan makai hanyu, aku nantarang kakuasaanku nelang ngulah ngaranku tawantar hang litar dunia.’ ”

¹⁸Jari, Alatalla uweng ahi lelo ma hie-hie, amun Alatalla ngabahumen kala yiru. Nelang Alatalla ngulah sabab ma hie-hie nampan mape silu, amun Alatalla ngabahumen kala yiru pada.

¹⁹Nah, Naun sagar kaeau ma aku, “Amun kala yiru wuah inun Alatalla magun hamen ngampi hala murunsia? Inun naun karasa puang sunah erang kaulun kaiyuh namangking kabahumen Alatalla?”

²⁰Kude, Pulaksanai! Naun ekat murunsia. Nelang naun puang iyuh heei kaeau ma Alatalla! Inun tau pot wunge nunti ma ulun sa ngulah hanye, “Wuah inun hanyu ngulah aku kala yiti?”

²¹Inu naun karasa ulun sa ngulah pot wunge yiru naan hak nepe putak yiru manyu kabahumen ateini? Teka erang kagumpal putak, ulun yiru naan hak ngulah rueh masam pot wunge: isa sa maeh, anri isa lainni puang maeh.

²²Kala yiru pada neu inun sa naulah daya Alatalla. Hanye hamen ngaluar panyangitni nelang nantarang kuasani. Kude hanye sabar nadap here sa harus nahukum daya ngulah kawan kasangitenni.

²³Alatalla pada hamen nantarang ma takam kasanangen penu-jubung sa nahaluini ma takam sa nasintani. Takam haut nasadiani nampan narime kasanangen yiru.

²⁴Takam sa haut naherauni, puang ekat teka bangsa Yahudi, kude pada teka kawan bangsa lain.

²⁵Daya hawuang buku Nabi Hosea, Alatalla kaeau, “Kawan ulun sa puang ulun watku, sagar naantuhku ‘Ulun watku.’ Bangsa sa puang nasintaku, sagar naantuhku ‘Sanasintaku’.

²⁶Nelang hang unengan hang awe naeau ma naun, ‘Naun puang ulun watku,’ hang yiru kawan ulun yiru sagar naantuh kawan anak Alatalla sa welum.”

²⁷Anri bawilah Nabi Yesaya kaeau neu bangsa Israel, “Biar jumalah bangsa Israel kala wahai karasik hang laut, ekat butit sa sagar salamat;

²⁸daya Tuhan sagar hinang nyanawu hukuman ma isi dunia.”

²⁹Hi Yesaya kaeau kala yiti pada, “Umpamani Alatalla sa Puang uweng Tikas kuasa puang nanan ma takam katurunan, himat takam katuluh haut jari kala Sodom anri Gomora.”

³⁰Jari, kasimpulanni kala yiti: Kawan bangsa lain sa puang Yahudi puang ngakali nampan hubungan here anri Alatalla jari maeh kamulek. Kude daya here parisaya, balalu Alatalla ngulah hubungan here anri hanye jari maeh kamulek.

³¹Kabalikanni, kawan ulun Yahudi saratang ngakali nampalus parentah nampan hubungan here anri Alatalla jari maeh kamulek. Kude here budas puang bahasil.

³²Wuah inun here puang bahasil? Daya here nampalus yiru puang itetei parisaya ma Alatalla, malengkan itetei ngakali here raerai. Balalu here tumbang katapian hang “Watu Palangaran”.

³³Neu watu yiru hawuang Surat Barasis nasurat kala yiti, “Pantaru yiti: Hang Sion haut naelahku erang kabutup watu sa sagar ngulah ulun katapian; hanyeyiru isa watu hante sa sagar ngulah ulun tumbang. Kude ulun sa parisaya ma hanye puang sagar teun.”