Read Ma'anyan 1 KORINTUS 1 Bible Online

1 KORINTUS 1 - Ma'anyan bible

1 KORINTUS 1

¹Pulaksanai katuluh ungkup Alatalla sa naan hang Korintus! Naun haut naherau daya Alatalla nampan jari ulun watni daya naun milik wat Kristus Yesus, baya katuluh ulun hang awe-awe sa nyambah Tuhan takam Yesus Kristus, hanyeyiru Tuhan here nelang Tuhan takam pada. Aku, hi Paulus, anri pulaksanai takam hi Sostenes, harap nampan Alatalla Ambah takam anri Tuhan Yesus Kristus ngami berkat nelang kasanangen ma naun. Aku nulis surat yiti yalah rasul Kristus Yesus, sa naangkat daya Alatalla raerai nelang daya kabahumenni pada.

⁴Aku saratang batarima kasih ma Alatalla neu naun, daya naun haut narime berkat teka Alatalla itetei Kristus Yesus.

⁵Daya naun haut jari milik Kristus, balalu naun welum tatau hang kawan inun heneng. Pangarasaen naun neu kawan inun heneng tuu lalem, nelang naun pandai ngajar pangarasaen yiru.

⁶Yiru nantarang sa kabar neu Kristus haut tuu marasap hang wuang atei naun,

⁷hampe naun puang kakurangen sunah isa berkat, padingian naun nganrei Tuhan takam Yesus Kristus hawi nelang nadinung daya katuluh ulun.

⁸Kristus raerai sagar manjamin naun hampe palus ma kalalawahni; nampan hang tawuk hanye hawi mulek, naun puang uweng cacat celani.

⁹Alatalla tuu-tuu iyuh naparisaya. Hanye Alatalla sa nerau naun nampan jari isa anri anakni, hanyeyiru Yesus Kristus, Tuhan takam.

¹⁰Pulaksanai katuluh! Hawuang ngaran Tuhan takam Yesus Kristus, aku laku naun katuluhni welum mira pakat; nampan ada uweng pirawekan hang penah naun. Wuah naun mira pakat, mira kunuan nelang mira pikiran.

¹¹Daya kawan ulun teka kulawarga Kloë iwara ma aku naan pirawekan hang penah naun.

¹²Sa nabahumku hanyeyiru hang penah naun naan sa kaeau, “Aku umba hi Paulus,” nelang naan pada sa kaeau, “Aku umba hi Apolos,” sa lain kaeau, “Aku umba hi Petrus,” nelang naan pada kaeau, “Aku ulun sa umba Kristus.”

¹³Kristus puang tabagi-bagi! Hi Paulus puang matei nabalasangar ma naun! Kalayiru pada naun puang nabaptis nampan umba hi Paulus angneh kalayiru?

¹⁴Aku basyukur daya puang uweng sunah erang kaulun teka naun sa nabaptis dayaku, ekat hi Krispus anri hi Gayus.

¹⁵Daya yiru ada naan sa kaeau himat aku haut mambaptis hanye nampan hanye umba aku. (

¹⁶O Hiai, hi Stefanus anri kulawargani, samula aku sa mambaptis here. Kude luar teka yiru, manyu pangitungenku puang uweng lagi ulun lain sa haut nabaptis dayaku.)

¹⁷Kristus ngutus aku puang nampan mambaptis ulun, malengkan nampan iwara neu Kabar Maeh teka Alatalla; nelang hal yiru harus aku nampalusni anri puang makai kapandaienku bapaner sara murunsia, nampan kuasa teka pampatei Kristus hang kayu balasangar puang mamus tuu eleh.

¹⁸Daya ma kawan ulun sa nuju kabinasaan, kabar neu pampatei Kristus hang kayu balasangar yiru puang tuu. Kude, ma takam sa nasalamat daya Alatalla, kabar yiru hanyeyiru sara Alatalla nantarang kuasani.

¹⁹Daya hawuang Surat Barasis Alatalla naan kaeau, “Aku sagar nanrusak kabijaksanaan kawan ulun pintar, nelang nyamawai pangataruen kawan ulun pandai.”

²⁰Nah, inun gunani kawan ulun pintar yiru? Inun gunani here bailmu? Inun gunani kawan ahli pikir dunia yiti? Alatalla haut nantarang sa kabijaksanaan dunia yiti mamus tuu eleh.

²¹Daya biar kalaawe pandaini murunsia, hanye puang kaiyuh mantaru Alatalla makai kapandaienni raerai. Kude justru daya Alatalla yiru bijaksana, hanye sadia nyalamat kawan ulun sa parisaya ma hanye itetei kabar sa nawara kami sa naanggap puang bujur daya dunia.

²²Ulun Yahudi laku kaajaiban nampan jari bukti, nelang ulun Yunani nganggap mambatang kabijaksanaan dunia yiti.

²³Kude takam yiti ekat iwara Kristus sa matei hang kayu balasangar. Kabar yiru nyinggung pangingkaman kawan ulun Yahudi nelang naanggap puang bujur daya kawan ulun sa puang Yahudi. Kamulek kawan ulun sa puang Yahudi nganggap hal yiru isa kalungaen.

²⁴Kude ma kawan ulun sa haut naherau daya Alatalla-hau ulun Yahudi atawa kawan ulun sa puang Yahudi-kabar yiru hanyeyiru sara Alatalla nantarang kuasa nelang kabijaksanaanni.

²⁵Daya sa nadinung budu hang Alatalla, yiru labis bijaksana teka kabijaksanaan murunsia; nelang inun sa nadinung maleme hang Alatalla, yiru labis kuat teka kakuaten murunsia.

²⁶Pulaksanai katuluh! Suba naun ngitung kalaawe wangun naun hang tawuk Alatalla nerau naun. Butit teka naun sa bijaksana, atawa bakuasa, atawa naan kadudukan sa ambau manurut paninungan murunsia.

²⁷Daya samula Alatalla sangaja midi inun sa naanggap budu daya dunia yiti, nampan ngamangan kawan ulun sa pandai. Nelang Alatalla pada midi inun sa naanggap meleme daya dunia yiti, nampan kawan ulun sa wigas gansang jari amangan.

²⁸Alatalla midi sa naanggap imbe, hina, likan sa naanggap puang baarati ma dunia yiti, nampan Alatalla nyanenuh inun sa naanggap penting daya dunia.

²⁹Anri kalayiru puang uweng sunah erang kaulun sa tau ngampi tamam tengani hang hadapan Alatalla.

³⁰Daya Alatalla raerai sa ngulah naun hampe naun kaiyuh mira baya anri Kristus Yesus. Itetei Kristus, takam jari bijaksana. Nelang itetei hanye pada Alatalla ngulah takam mulek maeh anri hanye, nyanyari takam jari ulun watni sa hulung nelang ngampi bebas takam.

³¹Jari, kala sa naan nasurat hang Surat Barasis, “Ulun sa hamen iwawara, harus iwawara inun sa naulah daya Tuhan.”