Read Ma'anyan 1 KORINTUS 10 Bible Online

1 KORINTUS 10 - Ma'anyan bible

1 KORINTUS 10

¹Pulaksanai katuluh! Wuah naun kaitung inun sa haut jari ma datu nini takam tawuk here umba hi Moses. Here katuluh nasalindung daya awan, nelang anri salamat nyabarang Laut Merah.

²Nampan jari ulun sa umba Moses, here katuluh nabaptis hawuang awan nelang hawuang laut yiru.

³Here katuluh nguta kutaen rohani sa sameh,

⁴nelang nguut uuten sa sameh. Here katuluh nguut teka gunung watu rohani sa nyinrah here; gunung watu yiru hanyeyiru Kristus raerai.

⁵Kude biar kalayiru, sika rama teka here sa puang nakatujuen Alatalla, daya sabab yiru rama here matei hang padang gurun.

⁶Katuluh yiru jari suntu ma takam, pakai ngampi itung takam nampan ada bahiri kawan hal sa jahat yalah here.

⁷Pada nampan takam ada nyambah barhala yalah sa naulah daya meheni teka here. Hawuang Surat Barasis naan nasurat, “Bangsa yiru nuku kuman nguut, nanrik nampak nyambah barhala.”

⁸Takam puang iyuh ngulah kawan hal sa murun kala sa haut naulah daya meheni teka here. Suah ruampulu telu ribu kaulun teka here matei hang erang anrau daya ngulah hal yiru.

⁹Takam puang iyuh nyunri Tuhan kala sa naulah daya meheni teka here sadi, hampe here matei patuk anipe bawisa.

¹⁰Takam puang iyuh bakutuk hawuang atei; kala sa naulah daya meheni teka here sadi, hampe here nawunu daya Malekat Pampatei.

¹¹Katuluh hal yiru jari ma here nampan jari suntu ma kawan ulun lain. Nelang katuluh yiru pada nasurat nampan jari pangitungen ma takam. Daya takam itati welum hang wayah pijumpuhan.

¹²Ulun sa minda hanye minri segah ware hanye mamaeh; ada hampe hanye tumbang.

¹³Tiap purija sa wuah ingkam naun hanyeyiru purija sa biasa wuah ulun murunsia. Kude Alatalla satia hang janjini. Hanye puang sagar maladar naun napurija labis teka kasanggupen naun. Hang tawuk naun wuah purija, hanye sagar ngami lalan ma naun nampan naun kaiyuh batahan mansing.

¹⁴Daya sabab yiru, Pulaksanai katuluh sa nasintaku, ware naun muar marikang neu nyambah barhala.

¹⁵Aku bapaner ma naun kala ma kawan ulun sa bijaksana. Ware naun raerai sa manimbang lenganku yiti.

¹⁶Hang tawuk takam nguut anggur anri ngantuh tarime kasih ma Alatalla, angneh yiru mambukti sa takam jari isa hawuang tenga Kristus?

¹⁷Daya ekat naan isa rote, nelang takam katuluh nguta rote isa yiru pada, balalu takam sa rama yiti jari yalah isa tenga.

¹⁸Suba dinung kawan ulun Yahudi. Here sa nguta kutaen sa haut nasarah hang ambau unengan nyarah parapah, kawan ulun yiru jari isa anri unengan yiru.

¹⁹Inun sana eauku neu kawan hal yiru? Barhala atawa kutaen sa nasarah ma barhala yiru budas puang uweng aratini.

²⁰Inun sa nasarah hang unengan parapah ma barhala puang nasarah ma Alatalla, melengkan ma kawan roh sa jahat. Nelang aku puang hamen naun jari isa anri roh sa jahat.

²¹Naun puang iyuh nguut teka piala anggur Tuhan, nelang sinrah pada teka piala anggur roh jahat. Naun puang iyuh ikuta hang meja Tuhan, nelang pada hang meja roh jahat.

²²Atawa takam hamen ngulah Tuhan bahiri? Inun takam labis teka Tuhan?

²³Eau ulun, “Takam iyuh ngulah inun sa nakabahumen takam.” Bujur! Kude puang katuluh sa nabahum takam yiru bariran. “Takam iyuh ngulah inun heneng sa nabahum takam” — kude puang katuluh sa nabahum takam yiru mambangun pamelum takam.

²⁴Ada naun bajuang ma kapantingan diri raerai. Tiap ulun harus bajuang ma kapantingan ulun lain.

²⁵Naun iyuh nguta inun heneng sa naari hang pasar daging. Puang usah naun mariksani dahulu, biar naan kabaratan hang atei naun.

²⁶Daya hawuang Surat Barasis naan nasurat, “Tane yiti anri katuluh isini hanyeyiru milik Tuhan.”

²⁷Amun naun naundang kuman daya erang kaulun sa puang Kristen, balalu naun narime undangan yiru, kutaleh inun sa nasurungan ma naun. Puang usah ngarasa teka awe hawini kutaen yiru, nampan puang uweng kawan kabaratan hang atei naun.

²⁸Kude amun naan sa kaeau ma naun, “Kutaen yiti haut nasarah ma barhala,” ada nguta kutaen yiru daya gana kapantingan ulun yiru nelang daya garak kunuan atei.

²⁹Nabahumku puang garak kunuan atei naun, kude garak kunuan atei ulun yiru. Tau pada naan sa nunti, “Ha, wuah inun kabebasanku harus nabatasi daya garak kunuan atei ulun lain?

³⁰Amun aku nguta kutaen anri batarima kasih ma Alatalla, wuah inun ulun mada aku gana kutaen yiru, kude aku haut batarima kasih ma Alatalla?”

³¹Inun kawan sa naulah naun — Naun kuman atawa nguut — tampalus katantuluh yiru pakai ngampi mulia Alatalla.

³²Ware naun welum anri mamaeh hampe naun puang jari sabab ulun lain ngulah dosa; inun here ulun Yahudi atawa puang Yahudi, atawa ungkup Alatalla.

³³Ware naun welum yalah aku. Aku ngakali ngampi sanang atei katantuluh ulun hawuang katuluh hal, anri puang uweng ngunu ma kapantingan diri raerai. Tujuanku hanyeyiru ekat nampan here katuluh kaiyuh nasalamat.