Read Ma'anyan 1 KORINTUS 11 Bible Online

1 KORINTUS 11 - Ma'anyan bible

1 KORINTUS 11

¹Ware naun isuntu aku, kala aku pada isuntu Kristus.

²Aku nawat naun daya naun saratang ngitung aku nelang makai pangajaran sa naamiku ma naun.

³Kude aku hamen naun karasa neu isa hal lagi, kalayiti, sa jari kapala ma kawan ulun upu hanyeyiru Kristus; nelang sa jari kapala ma kawan matueh wawei hanyeyiru matueh upu nelang sa jari kapala ma Kristus hanyeyiru Alatalla.

⁴Amun erang kaulun upu hang tawuk badoa atawa hang tawuk nampe kabar teka Alatalla hang hadapan ulun rama, makai panutup ulu, ulun yiru mahina Kristus.

⁵Nelang amun erang kaulun wawei hang tawuk badoa atawa hang tawuk nampe kabar teka Alatalla hang hadapan ulun rama, puang makai panutup ulu, wawei yiru mahina matueh upuni sa jari kapala ma dirini. Yiru sameh pada yalah ulu wawei yiru haut nakukur.

⁶Karana amun erang kaulun wawei puang hamen nutup uluni labis maeh amun wuluni nagunting. Kude amun erang kaulun wawei wuluni nagunting atawa uluni nakukur, yiru isa panghinaan ma hanye. Daya yiru labis maeh hanye makai panutup ulu.

⁷Upu puang parlu makai panutup ulu, daya hanye nantarang pribadi nelang pihante mulia Alatalla. Kude wawei nantarang pihante hormat ulun upu,

⁸daya ulun upu puang nasanyari teka ulun wawei, kude ulun wawei sa nasanyari teka ulun upu.

⁹Ulun upu puang pada nasanyari ma kapantingan ulun wawei, malengkan ulun wawei nasanyari ma kapantingan ulun upu.

¹⁰Daya yiru, pakai ngampi sanang kawan malekat, erang kaulun wawei harus makai sarudung nampan jari siri sa hanye hang imbe kakuasaan matueh upuni.

¹¹Kude biar kalayiru, hang pamelum takam kala ulun Kristen, ulun wawei puang minri raerai, lapas teka ulun upu, nelang ulun upu pada puang minri raerai, lapas teka ulun wawei.

¹²Samula ulun wawei pertama nasanyari teka ulun upu, kude udi hie ulun upu nakayaan teka ulun wawei; nelang alakatantuluh asalni uras teka Alatalla.

¹³Suba naun manimbang neu hal yiti: Inun maeh erang kaulun wawei badoa ma Alatalla hang hadapan ulun rama, anri puang makai sarudung?

¹⁴Teka pangalaman lana, naun haut naajar amun ulun upu bawulu ambau, hal yiru puang kajut patut.

¹⁵Kude ma ulun wawei, wulu sa naami ma hanye pakai nutup uluni nelang wulu ambau yiru kaaraien.

¹⁶Nah, amun naan sa hamen basual neu hal yiti, ekat isa tau aku kaeau hanyeyiru, hau takam atawa ungkup Alatalla salain, lanani ekat naan isa kabiasaan yiru hawuang ungkup; labis teka yiru puang uweng.

¹⁷Neu hal isa yiti lagi, aku puang nawat naun. Kumpulan sumbayang naun puang uweng hasil sa maeh, malengkan sa puang maeh.

¹⁸Samambatang aku karengei hang kawan kumpulan naun naan kawan golongan sa balain pandapat. Nelang kakiraku kabar yiru naan bujurni.

¹⁹Samula pipatutni pada timbul pirawekan hang penah naun, nampan die lentah dinung hie-hie ulun Kristen sajati.

²⁰Kude tawuk naun bakumpul, sa naulah naun yiru puang Parjamuan Tuhan.

²¹Daya tawuk ikuta, naun barabut ngalap kutaen ma hanye raerai, balalu naan sa puang kaiyuh inun-inun, kude sa lainni peda hampe mahamui.

²²Wuah inun kalayiru? Angneh naun naan lewu? Naun tau kuman, nguut hang yiru! Atawa naun hamen mahina ungkup Alatalla nelang ngamangan kawan ulun paua? Inun sa harus naeauku ma naun? Inun harus aku nawat naun? Puang! Aku budas puang sagar nawat naun.

²³Daya inun sa naajarku ma naun, yiru tarimeku teka Tuhan: hang malem yiru tawuk Yesus, Tuhan takam nakhianat, hanye ngalap rote,

²⁴dami udi hanye ngantuh tarime kasih ma Alatalla neu rote yiru, hanye miah rote yiru makai tanganni, balalu kaeau, “Iti tengaku sa nasarah ma naun. Tampalus hal yiti pakai ngitung aku.”

²⁵Kalayiru pada udi nguta rote yiru, hanye ngalap sangkir anggur, balalu kaeau, “Anggur yiti hanyeyiru janji Alatalla sa wau, nasantuhun makai iraku. Tiap kali naun nguut yiti, tampalus yiru pakai ngitung aku.”

²⁶Samula tiap kali naun nguta rote nelang nguut anggur yiti, naun iwara pampatei Tuhan, hampe hanye hawi.

²⁷Daya yiru, ulun sa nguta rote Tuhan atawa nguut anggur Tuhan anri sara sa puang patut, ulun yiru badosa ma Tuhan sa haut nyarah tenga anri irani.

²⁸Jari, tiap ulun harus dahulu mariksa dirini, wau hanye iyuh nguta rote atawa nguut anggur yiru.

²⁹Daya amun ulun nguta rote nelang nguut anggur puang karasa parjamuan yiru sameh yalah tenga Tuhan, ulun yiru nguta nguut nampan narime hukuman teka Alatalla ma dirini raerai.

³⁰Yiru sababni rama teka naun sa sakit nelang maleme, nelang naan pada sa matei.

³¹Kude amun takam labis dahulu mariksa diri takam, takam puang sagar nahukum daya Alatalla.

³²Kude amun takam nahukum Alatalla, hanye sagar meweh takam, nampan takam ada wuah hukuman sinrah baya dunia yiti.

³³Daya sabab yiru, kawan pulaksanaiku, amun naun bakumpul nguta Parjamuan Tuhan, naun harus ipanganrei.

³⁴Amun naan sa kajuju, hanye harus kuman dahulu hang lewuni. Amun naun makai hal yiti, kawan kumpulan sumbayang naun puang sagar nyanawu hukuman teka Alatalla ma diri naun. Neu kawan hal sa lain, aku sagar manarang ma naun, amun aku hawi die.