Read Ma'anyan 1 KORINTUS 12 Bible Online

1 KORINTUS 12 - Ma'anyan bible

1 KORINTUS 12

¹Itati neu kawan karunia roh sa naami Alatalla. Neu hal yiru, aku hamen naun katuluh karasa sa sabujurni.

²Itung hang tawuk naun huan kataru Tuhan, naun tapangaruh umba nyambah barhala sa muna.

³Naun harus karasa kawan ulun sa napimpin daya Alatalla puang tau kaeau, “Takutuk Yesus!” Kalayiru pada puang uweng sunah erang kaulun sa tau kaeau, “Yesus Tuhan!” amun ulun yiru puang napimpin daya Roh Alatalla.

⁴Naan wahai masam Karunia teka Roh Alatalla, kude katuluh yiru naami daya isa Roh.

⁵Naan wahai masam pagawian neu malayanni Tuhan, kude Tuhan sa nalayanni yiru, Tuhan isa yiru pada!

⁶Naan wahai masam sara nampalus pagawian Tuhan, kude sa ngami kakuaten nampalus yiru ma tiap ulun hanyeyiru Alatalla isa pada.

⁷Ma pikaeh takam katuluh, Roh Alatalla bagawi ma tiap ulun hang ulun yiru raerai.

⁸Ma sa isa, Roh yiru ngami kasanggupen nampan bapaner anri bapangaruh. Ma sa lain Roh isa yiru pada ngami kasanggupen nampan manarang neu Alatalla.

⁹Roh isa yiru pada sa ngami ma erang kaulun, kamampuan sa luar biasa nampan parisaya ma Kristus; nelang ma sa lain Roh yiru ngami kuasa nampan nyamare ulun.

¹⁰Ma erang kaulun naami kuasa nampan ngulah kaajaiban nelang ma sa lain naami karunia nampan iwara kawan ransana Alatalla. Ma sa lain lagi Roh yiru ngami kasanggupen nampan mambeda saawe karunia teka Roh Alatalla nelang saawe sa puang. Naan sa naami kasanggupen nampan bapaner anri wahai masam basa sa ajaib, nelang naan pada sa naami kasanggupen nampan manarang kawan arati teka kawan basa yiru.

¹¹Katuluh yiru nakaraja daya Roh isa yiru pada; tiap ulun naami karunia ma hanye raerai manyu kabahumen Roh yiru raerai.

¹²Kristus hanyeyiru kakala tenga murunsia; tenga yiru isa, kude naan wahai anggota. Katuluh anggota yiru, biar wahai, jari isa tenga.

¹³Kalayiru pada takam katuluh, hau ulun Yahudi atawa ulun sa puang Yahudi, kawan walah atawa kawan ulun bebas; takam katuluh haut nabaptis sameh anri Roh isa yiru, nampan takam jari isa hang tenga Kristus yiru. Takam katuluh haut kaingkam Roh yiru anri jubung.

¹⁴Daya tenga yiru puang ekat teka isa anggota, kude teka wahai anggotani.

¹⁵Amun pee kaeau, “Aku puang tangan, daya yiru aku puang anggota teka tenga,” yiru puang baarati sa pee yiru puang anggota teka tenga.

¹⁶Nelang amun silu kaeau, “Daya aku puang matei, aku puang bagian teka tenga,” yiru pada puang baarati sa silu yiru puang bagian teka tenga.

¹⁷Atikalani katuluh tenga yiru uras matei, kewangun tenga yiru tau karengei? Atawa amun katuluh tenga yiru uras silu, kewangun tenga yiru tau kaenguh?

¹⁸Takam kadinung Alatalla sa ngelah kawan anggota yiru hang tenga. Katuluhni naelah hang unenganni daya Alatalla manurut kabahumenni.

¹⁹Amun katuluhni ekat isa anggota, saawe sa iyuh naantuh tenga?

²⁰Jari samula naan wahai anggota, kude tenga ekat isa.

²¹Daya gana yiru, matei puang iyuh kaeau ma tangan, “Aku puang parlu anri hanyu!” atawa ulu kaeau ma pee, “Aku puang parlu anri hanyu!”

²²Kabalikanni kawan anggota tenga sa naanggap maleme yiru, parlu tatuu ma takam;

²³nelang kawan anggota sa naanggap daya takam kurang baharaga, likan hanyeyiru kawan anggota sa naami takam labis hante haragani. Kawan anggota tenga sa nadinung puang maeh, likan labis naparhati daya takam.

²⁴Kawan anggota tenga sa haut nadinung maeh, puang parlu laku parhatian takam. Alatalla haut nyusun tenga takam kala yiru wangun nampan kawan anggota sa kurang baharaga naami haraga labis hante.

²⁵Anri kalayiru tenga yiru puang tabagi; tiap anggota sameh mamparhati isa anri sa lain.

²⁶Amun isa anggota mahanang, katuluh anggota sa lainni pada umba mahanang; amun isa anggota natawat, katuluh anggota sa lainni pada umba natawat nelang arai.

²⁷Naun katuluhni hanyeyiru uras tenga Kristus nelang naun katuluh pada uras anggota teka tenga yiru.

²⁸Kalayiru pada hawuang ungkup, Alatalla haut nukas unengan ma tiap masam ulun: Palanungkai kawan rasul; karueh kawan nabi, katelu kawan guru, balalu here sa ngulah kawan kaajaiban, udi hie here sa naami karunia nampan nyamare ulun, atawa nampan ngarawah ulun lain, atawa nampan mamimpin, atawa nampan bapaner anri wahai masam basa sa ajaib.

²⁹Here puang katuluhni rasul, atawa nabi, atawa guru. Puang katuluhni sa naan kuasa nampan ngulah kaajaiban,

³⁰atawa nampan nyamare ulun, atawa nampan bapaner anri wahai masam basa sa ajaib, atawa nampan mantarjemah kawan basa yiru.

³¹Daya yiru, ware naun ngakali tatuu nampan ngaiyuh kawan karunia sa panga mambatang. Kude udi yiti aku nutui ma naun lalan sa panga maeh.