Read Ma'anyan 1 KORINTUS 13 Bible Online

1 KORINTUS 13 - Ma'anyan bible

1 KORINTUS 13

¹Biar aku tau bapaner makai wahai masam basa murunsia, likan makai basa malekat, kude aku puang sinta ulun lain, sika kawan lenganku yiru ekat yalah lengan sa maeung puang uweng aratini.

²Biar aku pandai nampe kabar teka Alatalla nelang kataru katuluh hal anri salalem-lalemni, karasa ala katantuluh nelang parisaya tuu ma Alatalla hampe tau ngidar gunung, kude aku puang sinta ma ulun lain, sika aku puang uweng artini!

³Biar katuluh sa naan hang aku, nasadakahku ma kawan ulun paua, nelang aku nyarah tengaku nampan natutung, kude aku puang uweng sinta ma ulun lain, sika katantuluh yiru puang budas uweng riranni.

⁴Ulun sa sinta ma ulun lain, hanye sabar nelang maeh atei. Hanye puang ngadidit, puang ipusu, puang sakah.

⁵hanye puang namam tenga, puang kasar, puang maksa ulun lain nampan nuu kabahumenni, puang pada hinang tasinggung, puang ngatei.

⁶Ulun sa sinta, hanye puang sanang ma sa jahat. Hanye ekat sanang ma sa maeh nelang jujur.

⁷Hanye tahan nadap ala katantuluh nelang hamen parisaya ma sa maeh sa naan hang tiap ulun; biar hawuang kaadaan kalaaweleh ulun sa naan sinta yiru puang suah wawai kaharapenni nelang sabar nganrei alakatantuluh.

⁸Puang sagar suah naan wayahni ulun welum puang parlu ipasinta isa anri sa lain. Itati naan ulun sa pandai nampe kabar teka Alatalla, kude die hanye sagar tarie nampe kabar yiru. Itati naan sa pandai bapaner makai wahai masam basa ajaib, kude die hanye sagar tarie bapaner makai kawan basa yiru. Itati naan ulun sa karasa wahai hal, kude die inun sa rasa here yiru sagar puang here kaitung.

⁹Daya pangarasaen takam nelang kasanggupen takam neu nampe kabar teka Alatalla, magun huan sampuruna.

¹⁰Yati sagar hampe wayahni Alatalla ngulah katuluhni sampuruna nelang sa puang sampuruna yiru sagar wawai.

¹¹Tawuk aku lagi iya, aku bapaner yalah kawan iya, pangingkamanku yalah kawan iya rumis nelang aku bapikir yalah kawan iya rumis. Itati aku haut dewasa, pidasaran sa yalah kawan iya haut umpeku.

¹²Inun sa dinung takam itati hanyeyiru yalah amba sa kabus hang saramin. Kude yati takam sagar kadinung anri tarang. Itati aku huan karasa ala katantuluh, kude yati aku sagar karasa katantuluhni sameh kala Alatalla karasa katantuluhni neu diriku.

¹³Jari, hang wayah yiti naan telu hal sa harus tatap naulah takam: hanyeyiru parisaya, harap nelang ipasinta. Kude sa panga penting teka katateluni yiru hanyeyiru sinta kawan ulun lain.