Read Ma'anyan 1 KORINTUS 14 Bible Online

1 KORINTUS 14 - Ma'anyan bible

1 KORINTUS 14

¹Ware naun ngakali nampan sinta ma kawan ulun lain. Nelang ngakali pada nampan narime kawan karunia sa naami daya Roh Alatalla, samambatang tuu kasanggupen neu nampe kawan ransana Alatalla ma murunsia.

²Ulun sa bapaner makai basa sa ajaib, ulun yiru puang bapaner ma murunsia; hanye bapaner ma Alatalla. Puang uweng ulun sa kataru inun sa naeauni, daya Roh Alatalla sa ngulah hanye tau ngantuh kawan hal sa ekat Alatalla sa kataru.

³Kabalikanni ulun sa nampe kabar teka Alatalla, hanye nampe yiru ma murunsia; pakai ngampi kansing here, neu ngami samangat ma here nelang pakai ngarariu here.

⁴Ulun sa bapaner makai basa sa ajaib ekat ngampi kansing dirini raerai, kude ulun sa nampe kabar teka Alatalla ngarawah ungkup nampan maju.

⁵Leha kaehni amun katuluh naun tau bapaner anri wahai masam basa sa ajaib. Kude sa panga maeh hanyeyiru amun naun kaiyuh iwara kawan ransana Alatalla. Daya ulun sa nampe kabar teka Alatalla, labis hante teka ulun sa bapaner anri wahai masam basa sa ajaib; lain halni amun ulun sa bapaner makai wahai masam basa sa ajaib yiru kaiyuh manarang inun sa naeauni yiru, nampan bariran ma katuluh ungkup.

⁶Paribasani aku hawi nunung naun balalu aku bapaner makai wahai masam basa sa ajaib, inun riranni yiru ma naun? Budas puang uweng sunah butit riranni! Lain halni, amun aku iwara kabahumen Alatalla, atawa aku manarang hal neu Alatalla, atawa aku nampe kabar teka Alatalla, atawa aku ngajar.

⁷Kawan karangkapen musik sa puang bahewuk sunah butit, misalni suling anri kacapi, amun puang naampeau manurut nadani, kewangun ulun karasa lagu inun sa naampeauni?

⁸Suntu sa lain lagi: Amun tarompet naampeau babaran, hie sa sagar basadia neu paparangan?

⁹Kalayiru pada anri kasanggupen naun neu bapaner makai wahai masam basa sa ajaib. Amun naun anri kasanggupen yiru iwara kawan lengan sa puang tarang batantu, puang uweng ulun tau kataru inun sa napaner naun. Kawan lengan naun yiru sagar mitah budas puang bariran.

¹⁰Hang dunia yiti naan wahai masam basa, kude puang uweng sunah isa teka basa yiru sa puang uweng aratini.

¹¹Kude amun aku puang kataru basa sa naantuh ulun, balalu ulun sa makai basa yiru yalah ulun asing ma aku; kala yiru pada aku ma hanye.

¹²Neu naun, aku karasa naun hamen tatuu kaiyuh kawan karunia Roh teka Alatalla. Kude samambatang tatuu, naun harus ngakali makai kasanggupen naun ngarawah ungkup nampan maju.

¹³Yiru sababni ulun sa bapaner makai basa sa ajaib, harus ilaku teka Alatalla nampan hanye naami kasanggupen neu manarang inun sa naeauni yiru.

¹⁴Daya amun badoa anri basa sa ajaib, rohku samula badoa, kude pikiranku puang bagawi.

¹⁵Jari, inun sa harus naulahku? Sa sagar naulahku hanyeyiru: Aku sagar badoa makai rohku, kude aku sagar badoa pada makai pikiranku. Aku sagar manyanyi makai rohku, kude aku hamen manyanyi pada makai pikiranku.

¹⁶Daya amun naun ngantuh tarime kasih ma Alatalla ekat makai roh naun, nelang naan ulun lain sa puang kataru basa ajaib sa teka Roh Alatalla yiru, himat ulun yiru puang iyuh kaeau, “Aku satuju” ma doa syukurnu yiru; daya hanye puang kataru inun sa naeau naun yiru.

¹⁷Biar doa tarime kasih naun ma Tuhan yiru tuu maeh, kude doa yiru budas puang uweng riranni ma ulun lain.

¹⁸Aku batarima kasih ma Alatalla daya aku kaiyuh bapaner makai wahai masam basa sa ajaib labis teka naun katuluh.

¹⁹Kude, hawuang kawan kumpulan neu nyambah Tuhan, aku labis hamen makai dime lengan sa taru ulun teka makai baribu-ribu lengan makai basa sa ajaib. Aku labis hamen kalayiru nampan aku tau kaiyuh ngajar ulun.

²⁰Pulaksanai katuluh! Ada budas bapikir kala kawan iya. Hang wuang hal kajahaten, ware naun tatap yalah kawan iya rumis. Kude hawuang pamikiran, ware naun jari ulun sa haut dewasa.

²¹Hawuang Surat Barasis naan nasurat kalayiti, “Tuhan kaeau, ‘Anri itetei kawan ulun sa bapaner makai basa sa ajaib, aku sagar bapaner ma kawan ulun yiti. Likan anri itetei kawan ulun asing, aku sagar bapaner ma ulun pidianku; kude biar kalayiru, here puang hakun nyanrengei lenganku.’ ”

²²Jari karunia neu bapaner makai wahai masam basa sa ajaib hanyeyiru jari siri ma ulun sa puang parisaya, puang ma ulun sa parisaya. Kude karunia pakai iwara ransana Alatalla ma murunsia hanyeyiru siri ma ulun sa parisaya, puang ma ulun sa puang parisaya.

²³Daya yiru, paribasani hawuang kumpulan ungkup, katuluh ungkup bapaner makai wahai masam basa sa ajaib, balalu hawi papire ulun teka luar atawa ulun sa puang Kristen, himat kawan ulun yiru minda naun haut rapui katuluhni!

²⁴Kude amun katuluhni nampe kabar teka Alatalla, balalu hawi erang kaulun sa puang Kristen atawa ulun luar, balalu kawan hal sa nawara daya naun yiru katuluhni sagar nutui kawan dosa ulun yiru nelang ngulah hanye balalu kataru neu kawan dosani.

²⁵Kawan hal sa baidim hawuang atei nelang kunuanni sagar patantarang, hampe hanye balalu sagar ngampi randah tengani nelang balalu nyambah Alatalla. Hanye sagar mangaku himat Alatalla tuu-tuu naan hang penah naun.

²⁶Jari pulaksanai katuluh, inun aratini katuluh yiru? Amun naun bakumpul neu nyambah Tuhan, naan sa manyanyi, naan sa ngajar, naan sa iwara kabar teka Alatalla, naan sa bapaner makai basa sa ajaib nelang naan sa manarang inun sa naeau yiru. Kude katuluh yiru harus naulah pakai ngajar nelang neu ma pikaeh katuluhni.

²⁷Amun naan sa hamen bapaner makai basa sa ajaib, sukup rueh atawa panga rama telu kaulun baganti bapaner. Nelang harus naan isa pakai manarang inun sa naeau daya ulun sa bapaner yiru.

²⁸Amun puang uweng sa kaiyuh manarangni balalu kawan ulun sa bapaner makai basa sa ajaib yiru harus suni hawuang kumpulan yiru. Elahni here bapaner hawuang atei here ma Alatalla.

²⁹Rueh atawa telu kaulun sa uweng kabar teka Alatalla harus nampe kabar yiru balalu sa lain manimbang inun sa natahampe yiru.

³⁰Kude umpamani kabar teka Alatalla hawi pada ma ulun lain sa pada maharung hang kumpulan yiru, balalu ulun sa rahat bapaner yiru harus suni tarie bapaner.

³¹Anri sara kalayiru, naun katuluhni, isa mangisa, tau kaiyuh nampe kabar teka Alatalla; nampan katuluh tau kaiyuh narime pangajaran nelang magin batambah parisaya.

³²Karunia teka Roh pakai nampe kabar teka Alatalla tau nakamudi daya ulun sa nampe kabar yiru.

³³Alatalla hanyeyiru Alatalla sa hamen neu katartiban, hanye puang Alatalla sa hamen pirawekan. Kala sa napakai nelang natampalus hang katuluh ungkup Alatalla.

³⁴wawei harus suni hang tawuk kumpulan ungkup. Here puang nahuyu bapaner. Here puang iyuh negei pimpinan; yiru manyu kala hukum agama.

³⁵Amun here hamen karasa ala inun-inun here harus nunti yiru ma matueh upu here hang lewu. Tuu ngamangan amun erang kaulun wawei bapaner hang kumpulan ungkup.

³⁶Inun lengan Alatalla hawi teka naun? Atawa ekat ma naun lengan yiru natahampe?

³⁷Amun naan ulun sa kaingkam naan karunia neu nampe kabar teka Alatalla, atawa hanye naan karunia sa lainni teka Roh Alatalla, ulun yiru harus kataru kawan inun sa nasuratku yiti hanyeyiru parentah teka Tuhan.

³⁸Kude amun naan sa puang narime yiti, hanye ada nakatawani.

³⁹Daya sabab yiru, pulaksanai katuluh, ware naun ngakali neu nampe kabar teka Alatalla, kude ada nguring ulun sa hamen bapaner makai wahai masam basa ajaib.

⁴⁰Kude katuluhni harus naulah anri maeh nelang taratur.