Read Ma'anyan 1 KORINTUS 15 Bible Online

1 KORINTUS 15 - Ma'anyan bible

1 KORINTUS 15

¹Itati, pulaksanai katuluh, aku hamen naun ngitung kamulek neu Kabar Maeh teka Alatalla sa haut nawaraku dahulu hie ma naun. Naun narimeni, nelang parisaya ma Kristus daya Kabar Maeh yiru.

²Amun naun kukuh itegei hang inun sa nawaraku yiru, batantu Kabar Maeh yiru nyalamat naun kasuali amun naun parisaya anri puang uweng kataruen.

³Inun sa natahampeku ma naun hanyeyiru sa haut natarime dayaku pada. Samambatang, kala sa haut nasurat hawuang Surat Barasis, aku nampe ma naun neu Kristus matei daya gana kawan dosa takam;

⁴hanye napasar, kude hang anrau sa katelu hanye nasamelum mulek. Yiru nasurat pada hawuang Surat Barasis.

⁵Aku iwara pada ma naun neu Kristus sa nasamelum mulek yiru nantarang tengani ma hi Petrus, udi hie ma kadua walas rasul.

⁶Udi yiru hanye nantarang tenga pada ma labis teka dime jatuh kaulun ulun sa umba hanye sinrah hang hinra tawuk. Karamaan teka here yiru itati pagun welum, ekat papire kaulun sa haut matei.

⁷Udi hie Kristus nantarang tengani pada ma hi Yakobus nelang udiyiru ma katuluh rasul.

⁸Pijumpuhanni hanye nantarang tengani pada ma aku-aku sa yalah genda sa nakayaan huan hampe pamulaanni.

⁹Aku hanyeyiru rasul Tuhan sa panga randah. Aku puang patut naantuh rasul, daya aku haut ngahanangen ungkup Alatalla.

¹⁰Kude daya pikaeh atei Alatalla aku jari kala wangunku itati. Nelang puang kawai Alatalla ngampun aku. Likan aku sa bagawi bahimat, labis teka kawan rasul sa lainni. Kude yiru sabujurni puang pagawianku; yiru pagawian Alatalla sa sinta aku nelang sa bagawi baya aku.

¹¹Jari, teka hie-hieleh naun narime Kabar Maeh yiru-inun yiru teka aku atawa teka kawan rasul sa lainni-yiru puang jari sual. Samambatang, hanyeyiru kami haut iwara Kabar Maeh yiru nelang naun parisaya.

¹²Amun sa nawara kami yiru hanyeyiru neu Kristus haut nasamelum mulek teka pampatei, wuah inun naan teka naun sa kaeau ulun matei puang sagar nasamelum mulek?

¹³Amun tuu ulun matei puang sagar nasamelum mulek, yiru baarati Kristus pada puang nasamelum mulek teka pampatei.

¹⁴Nelang atikala Kristus puang nasamelum mulek teka pampatei, himat puang uweng riranni kami iwara ala katantuluh nelang puang uweng riranni pada naun parisaya, daya kaparisayaan yiru budas puang uweng piharunganni.

¹⁵Labis teka yiru, tarang tuu kami ipusu neu Alatalla, daya kami iwara Alatalla haut nyamelum Kristus mulek teka pampatei, padahal Alatalla puang nyamelum hanye mulek-amun samula tuu ulun matei puang nasamelum mulek.

¹⁶Daya amun ulun matei puang nasamelum mulek, himat Kristus pada puang nasamelum teka pampatei.

¹⁷Nelang amun Kristus puang nasamelum mulek, kaparisayaan naun ekat kala upi naun tuu eleh yiru baarati naun pagun hang wuang kaadaan sa badosa nelang budas puang uweng harapan.

¹⁸Yiru baarati pada kawan ulun Kristen sa haut matei, pada puang uweng harapan.

¹⁹Amun kaharapen takam ma Kristus ekat hang pamelum takam hang dunia yiti, himat tuu teka katuluh murunsia hang dunia yiti, takam ulun sa tuu silaka hang dunia yiti.

²⁰Kude bawilah tuu Kristus haut nasamelum mulek teka pampatei. Iti isa jaminan ma kawan ulun sa haut matei sagar nasamelum mulek.

²¹Daya pampatei masuk mawuang dunia itetei erang kaulun, kala yiru pada welum kamulek teka pampatei naami ma murunsia pada itetei erang kaulun.

²²Kala katuluh murunsia matei daya tamasuk isa anri hi Adam, kalayiru pada katuluh sagar nasamelum, daya tamasuk isa anri Kristus.

²³Kude maisasaan nasamelum manyu giliranni. Samambatang Kristus; hanrian udiyati tawuk hanye hawi lagi, hampe giliran kawan ulun sa tamasuk milik Kristus.

²⁴Udi yiru balalu dunia Kiamat. Hang tawuk yiru Kristus sagar nyantalau kawan pamarentahan, katuluh kakuasaan anri katuluh kakuaten; balalu hanye sagar nyarah kakuasaanni yalah raja ma Alatalla, Ambah takam.

²⁵Kristus harus tatap marentah hampe Alatalla ngulah katuluh musuh Kristus talau anri Kristus.

²⁶Musuh sa pangalisanni sa harus nantalau hanyeyiru pampatei.

²⁷Hawuang Surat Barasis naan nasurat kala yiti, “Alatalla haut ngulah katantuluhni takluk ma hanye.” Tarang tuu sa namaksud anri “katantuluh” yiru puang tamasuk Alatalla, sa ngulah katantuluh yiru talau anri Kristus.

²⁸Kude udi katuluhni talau anri kapit pamarentahan Kristus, balalu hanye raerai, hanyeyiru Anak Alatalla, sagar nyarah dirini ma Alatalla sa haut ngulah katantuluhni talau hang ma hanye. Balalu Alatalla raerai sa sagar marentah katuluhni.

²⁹Amun ulun matei puang nasamelum mulek, wuah inun naan ulun sa nabaptis ma ulun matei? Ma inun here nampalus hal yiru? Amun bujur ulun matei budas puang sagar nasamelum lagi, ma inun here nampalus hal yiru?

³⁰Nelang ma inun pada kami hakun tiap tawuk nadap bahaya?

³¹Pulaksanai katuluh! Tiap anrau aku tahan ngaret kahanangen daya aku arai neu pamelum naun gana naun haut parisaya ma Kristus Yesus, Tuhan takam.

³²Amun yiru ekat teka pihak murunsia, inun untungni ma aku neu bajuang yalah nawan kawan eha maraat hang tumpuk yiti, hang Epesus? Amun bujur ulun matei puang nasamelum mulek, nah, labis maeh takam makai paribasa yiti: “Hayu takam kuman nguut nelang bararami, daya anrau keatuni takam sagar matei.”

³³Ada tatipu! Pargaulan sa puang maeh, nanrusak parangai sa maeh.

³⁴Ware naun kataru itati, nelang ada lagi ngulah dosa. Pipatutni naun harus umangan, daya hang penah naun naan sa huan kataru Alatalla.

³⁵Tau pada naan sa nunti, “Kewangun ulun matei nasamelum mulek? Tenga sa kewangun sa naami ma here, udi here nasamelum mulek?”

³⁶Tuu budu! Amun naun ngamule wini hang tane, wini yiru puang sagar welum, amun wini yiru huan matei dahulu.

³⁷Nelang wini sa naamule naun hawuang tane yiru-tau wini gandum atawa wini sa lainni-hanyeyiru ekat diki wini yiru, puang katuluh kakau amulean sa sagar welum yati.

³⁸Alatalla raerai sa sagar ngami ma wini yiru wangun kakau sa manyu paninungan Alatalla maeh ma amulean yiru. Ma katuluh masam wini, Alatalla ngami wangun amuleanni sa balain-lain.

³⁹Tenga kawan mahluk sa welum puang katuluhni sameh. Murunsia naan wangun tengani, kawan eha lain wangun tenga here; kawan wurung lain pada wangun tengani, kawan kenah lain pada wangun masam tengani.

⁴⁰Kalayiru pada anri wahai masam banda hang langit nelang kawan banda hang tane. Kawan banda hang langit uras naan wangun kaehni raerai, nelang kalayiru pada kawan banda sa naan hang ambau tane.

⁴¹Kaeh mate anrau lain teka kaeh wulan. Kawan wawahiang pada naan kaehni raerai. Likan kawan wawahiang yiru uras balain pada wangun kaehni.

⁴²Kalayiru pada halni yati anri kawan ulun matei sa nasamelum mulek. Tenga sa sanapasar yiru hanyeyiru tenga sa tau buruk, kude tenga sa nasamelum mulek, hanyeyiru tenga sa puang tau buruk.

⁴³Hang tawuk tenga yiru napasar, tenga yiru buruk nelang maleme; kude hang tawuk hanye nasamelum mulek, hanye jari tenga sa maeh nelang segah.

⁴⁴Hang tawuk tenga yiru napasar, tenga yiru tenga teka dunia yiti: kude dami tenga yiru nasamelum mulek, balalu tenga yiru tenga sa naami daya Roh Alatalla. Jari naan tenga sa teka dunia nelang naan tenga sa teka Alatalla.

⁴⁵Hawuang Surat Barasis naan nasurat kalayiti, “Murunsia sa palanungkai, hanyeyiru hi Adam, jari mahluk sa welum,” kude Adam sa hanrian hanyeyiru Roh sa ngami pamelum.

⁴⁶Sa hawi labis dahulu hanyeyiru tenga manyu daging, puang tenga samanyu roh. Sa manyu roh hawi hanrian.

⁴⁷Adam sa palanungkai nasanyari teka tane, kude Adam sa karueh asalni teka surga.

⁴⁸Kawan ulun dunia yiti hanyeyiru kala Adam sa palanungkai, sa nasanyari teka tane, kude kawan ulun surga hanyeyiru kala hanye sa hawi teka surga.

⁴⁹Yalah takam itati hanyeyiru kala hi Adam sa nasanyari teka tane, kude udiyati takam sagar jari kala hanye sa hawi teka surga yiru.

⁵⁰Maksudku, pulaksanai katuluh, hanyeyiru: tenga sa nasanyari teka ira nelang daging, puang kaiyuh masuk ma Dunia Wau wat Alatalla; nelang tenga sa tau matei puang tau jari tenga hampe ma kalalawah.

⁵¹Pantaru tatuu rahasia yiti: Puang katuluh takam sagar matei, kude takam katuluh sagar baubah wangun.

⁵²Hal yiru sagar jari anri salenga, hang erang kapungitup matei, tawuk tarompet naampeau hang pijumpuhanni yati. Daya hang tawuk naan rengei lengan tarompet yiru, kawan ulun matei sagar nasamelum mulek anri tenga hampe ma kalalawah, nelang takam katuluhni sagar naubah.

⁵³Tenga takam sa tau matei yiti harus naganti makai tenga sa puang tau matei, nelang tenga sa teka dunia yiti harus naganti makai tenga sa teka surga.

⁵⁴Amun tenga sa tau matei haut naganti makai tenga sa puang tau matei, nelang tenga sa teka dunia haut naganti makai tenga sa teka surga, hang tawuk yiru wau jari inun sa nasurat hawuang Surat Barasis, “Pampatei haut nasamawai; kamanangen haut nategei!”

⁵⁵“U pampatei, hang awe kamanangen nu? U pampatei, hang awe wisa nu?”

⁵⁶Wisa pampatei hanyeyiru dosa, nelang dosa nampalus kuasani itetei hukum agama.

⁵⁷Kude syukur ma Alatalla; hanye ngami ma takam kamanangen itetei Yesus Kristus Tuhan takam!

⁵⁸Daya sabab yiru, kawan pulaksanai sa nasinta, ware naun mansing nelang kukuh. Tatap bagawi ma Tuhan anri tuu-tuu, daya naun karasa ala katuluh inun sa nakaraja naun ma Tuhan, yiru puang sagar kawai tuu eleh.