Read Ma'anyan 1 KORINTUS 16 Bible Online

1 KORINTUS 16 - Ma'anyan bible

1 KORINTUS 16

¹Itati neu kawan duit sa sagar nasumbang naun ma sasameh ulun Kristen, aku ngami gurayangku ma naun nampan naun nampalus yiru manyu kala patitah sa naamiku ma kawan ungkup hang Galatia.

²Hang anrau palanungkai tiap minggu, ware naun katuluh namparing duit, manyu kaiyuhenni. Simuh duit yiru hampe aku hawi, nampan hang tawuk yiru puang parlu nakumpul lagi.

³Yati amun aku hawi, aku sagar ngirim kawan ulun sa nakatuju daya naun. Nelang aku sagar ngami ma here surat pangantar, nampan here nginsing duit sumbangan yiru ma Yerusalem.

⁴Nelang amun wangunni aku penting tulak pada baya here, aku sagar tulak sinrah baya here.

⁵Aku sagar hawi nunung naun udi aku mitah Makedonia, daya aku ngaheng mitah tumpuk yiru.

⁶Hang Korintus aku sagar muneng baya naun erang pitus, tau pada salawah musim marisak. Udi yiru naun tau ngarawah aku nampalus pakiaanku ma unengan sa lain.

⁷Aku puang hamen ganta naun amun ekat tarie erang pitus. Amun Tuhan nunyu, aku hamen muneng lawah jua baya naun.

⁸Kude aku sagar muneng duluni hang Epesus, hampe udi hari raya Pentakosta.

⁹Daya hang yiti wahai kasampatan nampan ngaraja pakarajaan sa naan riranni, biar rama ulun sa puang katuju.

¹⁰Amun hi Timotius hawi, tarime hanye anri maeh nampan hanye tanyuh hang penah naun, daya hanye yalah aku pada bagawi ma Tuhan.

¹¹Ada hampe naan ulun sa ngampahe hanye. Karawah hanye nampan hanye kaiyuh nampalus pakiaanni mulek nunung aku anri salamat, daya aku nunup pihawianni sinrah baya kawan pulaksanai sa lainni.

¹²Neu pulaksanai takam hi Apolos, haut papire kali aku ngami gurayang ma hanye nampan hanye baya kawan pulaksanai sa lainni tulak nunung naun. Kude manyu hanye, itati huan parlu hanye tulak. Kude yati amun naan kasampatan, himat hanye sagar hawi.

¹³Ware naun hati-hati nelang mansing hawuang pamelum naun yalah ulun Kristen. Batindak anri heei nelang tatap mansing.

¹⁴Katuluh sa naulah naun, ulah yiru anri sinta.

¹⁵Naun himat kataru hi Stefanus anri kulawargani; here ulun sa palanungkai jari Kristen hang Akhaya. Here anri sagalis atei bagawi hulung neu malayanni ungkup Alatalla.

¹⁶Aku ngami nasehat anri tuu-tuu nampan naun ngalut nuu pimpinan kawan ulun sa kalayiru, anri kawan ulun lain sa bagawi nelang malayanni baya anri here.

¹⁷Aku sanang daya pihawian Stefanus, Fortunatus anri hi Akhaikus. Here hanyeyiru kawan ulun sa jari panganti naun ma aku.

¹⁸Here haut ngulah ateiku mihewu, kala here haut ngampi hewu atei naun. Kawan ulun sa kalayiru harus nahargai.

¹⁹Kawan ungkup hang Asia nampe tabe here ma naun. Hi Akwila anri hi Priskila anri ungkup sa bakumpul hang lewu here pada ngirim tabe Kristen sa hangat.

²⁰Katuluh pulaksanai sa naan hang yiti, nampe tabe ma naun. Ware naun ipanabe anri mesra kala pulaksanai Kristen.

²¹Aku nambah hang yiti tabe sanasuratku raerai: Tabe teka aku, hi Paulus.

²²Ulun sa puang sinta ma Tuhan, elah hanye takutuk! Maranatha-Tuhan kami, ware hanyu hawi!

²³Mudahan Tuhan Yesus Kristus mamberkat naun.

²⁴Nasinrah anri sinta ma naun katuluh sa jari isa anri Kristus Yesus. Hormat kami, Paulus