Read Ma'anyan 1 KORINTUS 2 Bible Online

1 KORINTUS 2 - Ma'anyan bible

1 KORINTUS 2

¹Pulaksanai katuluh! Tawuk aku hawi nunung naun nelang iwara kabar neu ransana Alatalla sa huan suah dunia yiti karasa, aku puang makai kabijaksanaan dunia yiti atawa bapaner neu hal sa tamam.

²Daya aku haut nukas hawuang ateiku salawah aku naan baya naun, aku puang sagar iwara inun-inun, luar teka neu Yesus Kristus; ekat hulung neu hanye haut matei hang kayu balasangar.

³Tawuk aku naan baya naun, aku maleme nelang neter takut.

⁴Kabar sa natahampeku ma naun puang natahampe dayaku anri lengan sa maeh manurut kabijaksanaan murunsia. Kude aku nampe anri ngami bukti sa Roh Alatalla bakuasa.

⁵Aku ngulah kalayiru, nampan kaparisayaan naun ma Kristus puang itetei kabijaksanaan murunsia, kude itetei kabijaksanaan Alatalla.

⁶Kude biar kalayiru, hang penah kawan ulun sa pamelum rohanini haut lalem, aku samula bapaner neu kabijaksanaan. Kude kabijaksanaan yiti puang kabijaksanaan dunia, atawa kabijaksanaan kawan panguasa jaman yiti, sa kakuasaanni sagar wawai.

⁷Kabijaksanaan sa nawaraku yiru hanyeyiru kabijaksanaan teka Alatalla. Kabijaksanaan yiru puang dunia yiti karasa, kude Alatalla haut nyadia yiru ma kasanangen takam kapihuan dunia yiti nasanyari.

⁸Puang uweng sunah erang kaulun teka kawan panguasa dunia jaman yiti sa karasa neu kabijaksanaan yiru. Daya, paribasani here haut karasa, himat here puang sagar malasangar Yesus sa mulia yiru.

⁹Kabalikanni hal yiru kala sa nasurat hang Surat Barasis, “Inun sa puang suah nadinung atawa nasanrengei daya murunsia, nelang pada puang suah timbul hang pikiran murunsia, yiru sa nasadia Alatalla ma kawan ulun sa sinta hanye.”

¹⁰Kude Alatalla haut iwara hal yiru ma takam itetei Rohni. Roh Alatalla yiru nyalidik ala katantuluh, hampe ma kawan ransana Alatalla sa padina.

¹¹Daya sa karasa isi atei erang kaulun hanyeyiru roh ulun yiru raerai, angneh? Kalayiru pada neu Alatalla. Sa karasa isi atei Alatalla ekat Roh Alatalla yiru raerai!

¹²Ma takam puang naami roh dunia yiti, kude Roh teka Alatalla, nampan takam karasa katuluh inun sa naami Alatalla ma takam.

¹³Daya yiru, amun kami manarang kawan hal neu Alatalla ma kawan ulun sa naan Roh Alatalla, kami puang iwara manurut kabijaksanaan murunsia, malengkan manurut ajaran Roh Alatalla.

¹⁴Ulun sa puang uweng Roh Alatalla, puang kaiyuh narime inun sa nawara Roh yiru. Daya ma ulun yiru kawan hal sa kalayiru yalah isa kabuduen. Ulun yiru puang tau kataru, daya kawan hal yiru ekat tau ngakira sara rohani.

¹⁵Ulun sa naan Roh Alatalla tau ngakira ala katantuluh, kude puang uweng sunah erang kaulun sa naan hak ngakira hanye.

¹⁶Hawuang Surat Barasis naan nasurat, “Hie sa tau karasa pikiran Tuhan? Nelang hie sa tau ngami nasehat ma hanye?” Kude hang takam yiti naan pikiran wat Kristus!