Read Ma'anyan 1 KORINTUS 3 Bible Online

1 KORINTUS 3 - Ma'anyan bible

1 KORINTUS 3

¹Pulaksanai katuluh, sabujurni aku puang kaiyuh bapaner anri naun yalah anri ulun sa naan Roh Alatalla. Aku ekat kaiyuh bapaner anri naun yalah anri ulun sa pagun welum manurut kabahumen duniawi; yalah anri ulun sa lagi genda hang kaparisayaanni ma Kristus.

²Yari aku ekat kaiyuh ngami kutaen genda ma naun, puang kutaen ulun matueh; daya naun huan kaule narime kutaen yiru. Kude itati naun sika huan kaule narime kutaen yiru,

³daya naun pagun welum manurut pidasaran naun sara murunsia. Daya amun naun pagun bahiri nelang paut bantah isa anri sa lainni, angneh yiru buktini naun pagun welum manurut pidasaran murunsia, yalah kawan ulun sa puang kataru Alatalla?

⁴Amun naan sa kaeau, “Aku umba hi Paulus,” nelang sa lain kaeau, “Aku umba hi Apolos,” angneh yiru nantarang pidasaran naun kala pidasaran ulun dunia?

⁵Hie hi Apolos yiru sabujurni? nelang hie hi Paulus? Kami yiti ekat kawan palayan Alatalla, sa haut nginsing naun parisaya ma Kristus. Kami ekat nampalus pagawian sa natugas Tuhan ma kami maisasaan.

⁶Aku ngamule, hi Apolos nyiram, kude Alatalla sa ngulah amulean yiru tau welum.

⁷Jari sa penting hanyeyiru Alatalla, daya hanye sa nyamelum. Sa ngamule anri sa nyiram yiru puang penting;

⁸kararuehni sameh darajat. Maisasaan sagar narime upa manurut kauyuhenni.

⁹Kami hanyeyiru kawan ulun sa sameh-sameh bagawi ma Alatalla; nelang naun kala ume wat Alatalla. Naun katuluh pada kala gedung wat Alatalla.

¹⁰Anri kapandaien sa naami Alatalla, aku kala ahli bangunan haut ngami pondasi ma gedung yiru, nelang ulun lain sa mambangun gedung yiru hang ambau pondasi yiru. Tiap ulun harus mamparhati mamaeh kewangun hanye mambangun hang ambau pondasi yiru.

¹¹Daya Alatalla haut ngelah Yesus Kristus satu-satuni jari pondasi gedung yiru; puang uweng pondasi lain.

¹²Naan sa mambangun hang ambau pondasi yiru makai amas, naan pada makai perak, naan pada makai kawan watu parmata, naan pada sa makai kayu, rikut karing atawa riumi.

¹³Pakarajaan tiap ulun yiru sagar dinung hang tawuk Kristus hawi mulek. Daya hang anrau yiru apui sagar ngulah inun sa haut nakaraja daya katuluh ulun lalea dinung. Apui sagar nguji nelang nukas kakiraan teka pakarajaan yiru.

¹⁴Amun gedung sa naapinri ulun hang ambau pondasi yiru tahan kuta apui, ulun yiru sagar narime hadiahni.

¹⁵Kude amun pakarajaan ulun yiru rakit, hanye sagar rugi; hanye raerai sagar salamat, kude yalah ulun sa kaiyuh takia mitah lelap apui.

¹⁶Wuah naun karasa, naun hanyeyiru lewu Alatalla? Nelang Roh Alatalla muneng hawuang naun?

¹⁷Amun naan ulun sa nanrusak lewu Alatalla, Alatalla pada sagar nanrusak ulun yiru. Daya lewu Alatalla hanyeyiru ekat hulung ma Alatalla, nelang lewu Alatalla yiru hanyeyiru naun.

¹⁸Ada uweng sunah erang kaulun nipu dirini raerai. Amun naan ulun teka naun sa kaingkam dirini bijaksana manurut ukuran dunia yiti, ulun yiru harus jari budu, nampan hanye tuu-tuu jari bijaksana.

¹⁹Daya sa naanggap bijaksana daya dunia hanyeyiru ulun sa budu hang paninungan Alatalla. Hawuang Surat Barasis naan nasurat, “Alatalla hanjabak kawan ulun bijaksana hawuang kapintaren here raerai.”

²⁰Naan pada nasurat kalayiti, “Tuhan karasa kawan pikiran ulun bijaksana hanyeyiru pikiran sa puang bariran.”

²¹Daya yiru, ada sunah erang kaulun sa nawat murunsia, daya katantuluhni haut naami jari milik naun:

²²Hi Paulus, hi Apolos, hi Petrus, dunia yiti, pamelum anri pampatei, jaman itati atawa jaman sa nahadap yati, katuluhni milik naun.

²³Nelang naun milik Kristus, nelang Kristus milik Alatalla.