Read Ma'anyan 1 KORINTUS 4 Bible Online

1 KORINTUS 4 - Ma'anyan bible

1 KORINTUS 4

¹Anggap kami yiti kawan palayan wat Kristus, sa batanggung jawab iwara kawan ransana Alatalla sa huan dunia karasa.

²Samambatang isa nalaku teka palayan sa kalayiru hanyeyiru, hanye harus satia ma tuanni.

³Ma aku, puang jari sual inun naun atawa hie-hie mamikir neu tenga diriku. Likan inun sa napikirku neu diriku raerai sika puang jari sual.

⁴Aku puang kaingkam naan kahalaen hang wahai masam hal, kude yiru puang iyuh jari bukti sa aku samula puang uweng kahalaen. Tuhan sa nukas inun aku naan kahalaen atawa puang.

⁵Daya yiru, amun huan hampe waktuni, ada naun hinang nukas ulun naan kahalaen atawa puang. Anrei hampe Tuhan hawi yati. Hanye sa sagar nguka katuluh rahasia sa padina hang piieng. Hanye sa sagar mungkar katuluh kunuan sa baidim hawuang atei murunsia. Hang tawuk yiru, wau tiap ulun narime pujian teka Alatalla sa patut natarimeni.

⁶Pulaksanai katuluh! Neu ma kapantingan naun, aku meat katuluh yiru ma hi Apolos nelang ma diriku pada. Tujuanni hanyeyiru anri isuntu kami naun kaiyuh paajar inun arati lengan yiti, “Tegei aturan sa naan.” Anri kalayiru puang uweng teka naun sa kaiyuh nawat erang kaulun, balalu ngampahe sa lain.

⁷Hie sa nyanyari naun labis teka ulun lain? Angneh kawan inun heneng natarime naun teka Alatalla? Jari, wuah inun naun hamen isasakah, yalah kawan inun sa naan hang naun yiru puang teka pangamian Alatalla?

⁸Samula naun puang mamerlu kawan inun heneng lagi! Naun haut tatau! Naun haut jari raja! Kude kami puang. Tuu leha kaehni amun naun haut tuu-tuu jari raja, nampan kami sameh-sameh anri naun kaiyuh marentah.

⁹Daya manurut pandapatku, kami kawan rasul, haut nasanyari daya Alatalla jari tuntunan hang hadapan murunsia anri kawan malekat. Kami kala kawan ulun sa hina sa nasanawu hukuman mati hang penah rama nelang nasurak-surak daya dunia.

¹⁰Daya Kristus, kami yiti ulun sa budu, nelang naun ulun Kristen sa pandai! Kami maleme, naun wigas gansang! Kami naampahe, kude naun natawat!

¹¹Hampe itati kami kaingkam kajuju nelang malah; kami ekat pakaian hang tenga; ulun nyiksa kami; kami puang uweng unengan manatap;

¹²kami mepai uat tulang ngantara nafakah. Amun kami nasapa, kami iwaleh makai berkat; amun kami nasiksa, kami sabar;

¹³amun ulun nangkurun kami, kami iwaleh makai anri lengan sa maeh. Kami puang labis teka rateh dunia yiti; hampe itati kami pagun naanggap yalah rateh dunia.

¹⁴Aku nulis yiti ma naun puang nampan ngamangan naun, kude pakai ngami nasehat ma naun yalah ma kawan anakku raerai.

¹⁵Daya aku sa jari ambah ma naun, samula tau pada yalah ulun Kristen, naun haut naan sapuluh ribu guru, kude puang uweng sa jari ambah naun. Hawuang pamelum naun kala kawan ulun jari isa anri Kristus, aku sa jari ambah ma naun, daya aku sa nginsing Kabar Maeh neu Kristus ma naun.

¹⁶Daya yiru aku ilaku tatuu nampan naun isuntu aku.

¹⁷Neu hal yiru aku haut ngutus hi Timotius nunung naun. Yalah ulun sa umba Kristus, hanye sameh kala anakku raerai sa nasintaku. Hanye anak sa tau naparisaya. Yati hanye sagar ngampi itung naun neu sara welum sa naalutku dami parisaya ma Kristus, hanyeyiru sara welum sa naajarku hang tiap ungkup hang awe-awe.

¹⁸Papire kaulun teka naun haut jari sakah, daya here minda aku puang sagar hawi nunung naun.

¹⁹Kude amun Tuhan nunyu, aku sagar hawi pada nunung naun puang lawah lagi. Hang tawuk yiru yati aku pada sagar ninung inun sa tau naulah daya kawan ulun sa sakah yiru; ada ekat makai paner here.

²⁰Daya amun Alatalla marentah pamelum ulun, hal yiru nabukti daya kakuaten pamelum ulun yiru, puang ekat papaneranni.

²¹Jari pidi inun sa labis nakahamenen naun! Inun naun hamen aku hawi nampan ngajar naun anri karas atawa aku hawi ngajar naun anri lemah lembut nelang ahi lelo?