Read Ma'anyan 1 KORINTUS 7 Bible Online

1 KORINTUS 7 - Ma'anyan bible

1 KORINTUS 7

¹Itati aku hamen bapaner neu hal sa eau naun hawuang surat naun. Amun erang kaulun upu puang kawin, yiru maeh.

²Kude nampan puang tagoda daya kawan hal sa puang patut, labis maeh amun tiap ulun upu naan matueh waweini nelang tiap ulun wawei naan matueh upuni raerai.

³Matueh upu harus nampalus kawajibanni ma matueh waweini, nelang kalayiru pada matueh wawei harus nampalus kawajibanni ma matueh upuni; maisasaan nampalus kawajiban isa ma sa lain.

⁴Matueh wawei puang bakuasa ma tengani raerai; sa bakuasa ma tengani hanyeyiru matueh upuni. Kalayiru pada matueh upuni puang bakuasa ma tengani raerai; sa bakuasa ma tengani hanyeyiru matueh waweini.

⁵Kala ulun ilaki wawei, ada bapisah pangalawit isa anri sa lain. Kude sika tau amun ma papire lawahni, asal kararuehni haut sameh-sameh satuju. Anri kalayiru maisasaan tau badoa anri puang taganggu. Kude udiyiru harus naun bakumpul mulek kala ulun ilaki wawei. Amun puang kalayiru, die naun tau tawang ngalut tantiring roh jahat, daya naun puang kaule nahan nafsu.

⁶Aku ngeau yiti puang parentah, kude nasehat.

⁷Sabujurni aku labis arai amun katuluh ulun jari yalah aku. Kude maisasaan haut narime karunia sa hulung teka Alatalla. Erang kaulun narime karunia kala yiti, sa lainni narime karunia kala yiru.

⁸Ma kawan ulun sa huan kawin nelang ma kawan wawei sa haut walu, aku ngami nasehat kalayiti: Labis maeh amun naun tatap welum raerai kala aku.

⁹Kude amun naun puangkaiyuh nahan nafsu, ware naun kawin. Daya labis maeh naun kawin teka naun puang kaiyuh nahan nafsu.

¹⁰Ma here sa haut kawin, aku ngami parentah: (Sabujurni puang aku sa ngami parentah yiti, kude Tuhan.) Erang kaulun wawei sa haut kawin ada nanan matueh upuni.

¹¹Kude amun hanye haut nanan, hanye harus tatap puang bamatueh upu, amun hanye puang ipaulek anri matueh upuni. Nelang matueh upu puang iyuh ngumpe, sarak anri matueh waweini.

¹²Ma kawan sa lainni, aku ngami nasehat kalayiti, amun erang kaulun Kristen narangan erang kaulun wawei sa puang parisaya ma Kristus, nelang matueh waweini yiru satuju welum baya hanye, ulun yiru puang iyuh sarak anri matueh waweini; nasehat yiti hawini teka aku raerai, puang teka Tuhan.

¹³Kamulek amun erang kaulun wawei narangan erang kaulun upu sa puang parisaya ma Kristus, nelang matueh upuni satuju welum baya hanye, hanye puang iyuh sarak anri matueh upuni.

¹⁴Daya matueh upu sa puang parisaya yiru natarime neu jari ulun wat Alatalla gana parkawinanni anri matueh waweini sa haut jari milik Alatalla. Kalayiru pada matueh wawei sa puang parisaya natarime neu jari ulun wat Alatalla gana parkawinanni anri matueh upuni sa haut jari milik Alatalla. Amun puang kalayiru, kawan anak tukui here batantu kala kawan anak kafir, padahal kawan iya yiru naanggap yalah ulun wat Alatalla.

¹⁵Kude amun ulun sa puang parisaya yiru nanan matueh waweini atawa matueh upuni sa Kristen, ada nahan hanye. Neu hal yiti wawei atawa upu yiru bebas, daya Alatalla hamen nampan naun welum anri ruhui rahayu.

¹⁶Daya naun yalah matueh wawei — sa haut parisaya ma Tuhan — kewangun naun tau karasa anri tuu batantu naun puang kaiyuh nyalamat matueh upu naun? Kala yiru pada naun yalah matueh upu Kristen, kewangun naun tau karasa anri tuu batantu naun puang kaiyuh nyalamat matueh wawei naun?

¹⁷Wuah tiap tenga ngatur pamelumni manurut kabahumen Tuhan kala sa haut natukas Alatalla ma hanye hang tawuk Alatalla nerau hanye nampan parisaya ma hanye. Yiru aturan sa naajarku ma tiap ungkup.

¹⁸Umpamani, amun erang kaulun sa haut nasunat hang tawuk hanye narime herauan Alatalla, ada ulun yiru ngakali ngumpe kawan siri sunat yiru. Kalayiru pada amun naan erang kaulun sa huan nasunat hang tawuk hanye narime herauan Alatalla, ada ulun yiru ilaku nasunat.

¹⁹Daya nampalus aturan sunat atawa puang nampalusni, kararuehni sameh-sameh puang baarati inun-inun. Sa mambatang hanye yiru nampalus kawan parentah Alatalla.

²⁰Wuah tiap ulun tatap welum hawuang kaadaan kala tawuk hanye narime herauan Alatalla.

²¹Amun hang tawuk naun naherau, naun erang kaulun walah, puang usah naun uyuh mamikir neu hal yiru. Kude amun yati naun kaiyuh kasampatan bebas, pakai kasampatan yiru.

²²Daya erang kaulun walah sa haut parisaya ma Tuhan, hanye ulun wat Tuhan sa bebas. Nelang erang kaulun sa haut bebas sa haut parisaya ma Tuhan, hanyeyiru walah Kristus.

²³Alatalla haut midi naun nelang haut bayarni punah. Daya yiru, ada naun nyarah tenga naun nampan jari walah murunsia.

²⁴Jari, pulaksanai katuluh, biar kewangun kaadaan naun hang tawuk naun naherau, ware naun tatap welum kala yiru baya anri Alatalla.

²⁵Itati neu kawan ulun sa huan kawin. Neu hal yiru, aku puang narime parentah inun-inun teka Tuhan. Kude yalah ulun sa daya pikaeh atei Tuhan iyuh naparisaya, aku hamen pada ngami nasehatku.

²⁶Ngitung kawan kasusahen sa mangansam itati, indaku labis maeh amun ulun tatap nampalus pamelum kala kaadaanni itati.

²⁷Amun naun haut naan matueh wawei ada naun ngakali lapas teka matueh wawei yiru. Amun naun huan uweng matueh wawei puang usah ngantara matueh wawei.

²⁸Kude amun naun kawin, yiru puang dosa. Kala yiru pada amun naan erang kaulun wawei bujang kawin, puang baarati hanye badosa. Ekatni, here sa kawin yiru sagar nadap wahai masam kasusahen. Nelang aku hamen naun puang wuah kawan kasusahen yiru.

²⁹Bahumku kalayiti, pulaksanai katuluh: Takam puang wahai waktu lagi. Mulai teka itati, tiap ulun sa haut naan matueh wawei ware hanye welum yalah hanye puang uweng matueh wawei;

³⁰ulun sa nungkau, ware hanye welum yalah hanye puang uweng kahanangen atei; ulun sa kakihi, ware hanye welum yalah hanye puang arai; ulun sa haut iwidian, ware hanye welum yalah hanye puang uweng ala inun-inun;

³¹nelang ulun sa sibuk hang kawan hal dunia yiti, ware hanye welum yalah hanye puang sibuk daya kawan hal yiru. Daya puang lawah lagi dunia yiti, hawuang kaadaanni itati sagar wawai.

³²Aku hamen nampan naun bebas teka kawan kasusahen. Ulun sa puang uweng matueh wawei sagar namulat pikiranni ma kawan hal neu Tuhan, daya hanye hamen ngampi sanang atei Tuhan.

³³Kude ulun sa haut naan matueh wawei sagar wahai mamikir kawan hal dunia yiti, daya hanye hamen ngampi sanang matueh waweini;

³⁴balalu akibatni pikiranni tabagi. Erang kaulun wawei sa puang uweng matueh upu, atawa erang kaulun wawei bujang, sagar wahai mamikir kawan hal neu Tuhan, daya hanye hamen nampan tenga amirueni jari milik Tuhan. Kude erang kaulun wawei sa haut naan matueh upu, namulat pikiranni ma kawan hal dunia yiti, daya hanye hamen ngampi sanang atei matueh upuni.

³⁵Aku nulis katuluh yiru neu ma pikaeh naun raerai, puang anri ngunu nguring yiti nelang nguring yiru. Sa naahengku hanyeyiru nampan naun nampalus inun sa bujur nelang sa patut, nelang nampan naun kaiyuh namulat pikiran naun ma Tuhan.

³⁶Amun erang kaulun kaingkam puang nampalus manyu pipatutni ma tunanganni, amun hanye puang kaiyuh nahan kabahirien, nelang amun hanye kaingkam parlu kawin anri wawei yiru, elahni hanye nampalus inun sa naingkamni maeh. Hanye puang badosa, amun here kawin.

³⁷Kude amun erang kaulun haut ngulah kaputusan hawuang ateini puang kawin anri tunanganni nelang kaputusan yiru puang tapaksa, ala sa natampalusni yiru maeh, asal hanye sanggup nampalusni.

³⁸Imbeni, ulun sa kawin yiru maeh, kude ulun sa puang kawin yiru labis maeh lagi.

³⁹Erang kaulun wawei sa haut kawin taikat ma matueh upuni ekat salawah matueh upuni welum. Amun matueh upuni haut matei, wawei yiru iyuh kawin lagi anri ulun sa nakabahumen dayani; asal here kawin sara Kristen.

⁴⁰Kude hanye labis bauntung amun hanye puang kawin lagi. Yiru pandapatku raerai, nelang aku kaingkam inun sa naeauku yiru hanyeyiru anri kuasa Roh Alatalla.