Read Ma'anyan 2 KORINTUS 1 Bible Online

2 KORINTUS 1 - Ma'anyan bible

2 KORINTUS 1

¹Pulaksanai katuluh ungkup Alatalla hang Korintus anri katuluh ulun wat Alatalla hang litar Akhaya. Aku, hi Paulus, rasul Kristus Yesus, sa naangkat daya kabahumen Alatalla, baya anri pulaksanai takam hi Timotius,

²harap nampan Alatalla Ambah takam nelang Tuhan takam Yesus Kristus ngami berkat anri kasanangen ma naun.

³Tawat ma Alatalla, Ambah Tuhan takam Yesus Kristus. Hanye Ambah sa tuu maeh atei, nelang hanye Alatalla sa ngami kakuaten batin ma murunsia.

⁴Hanye sa ngampi kansing batin kami hawuang kawan kasusahen sa wuah kami, nampan makai kakuaten sa natarime kami teka Alatalla yiru, kami pada kaiyuh ngampi kansing batin katuluh ulun sa hawuang kasusahen.

⁵Kawan kahanangen sa naingkam daya Kristus haut wahai pada naingkam kami. Nelang itetei Kristus pada, batin kami tuu naampikansing.

⁶Amun kami wuah kasusahen, yiru nampan ngampi kansing batin naun, neu salamat naun. Amun batin kami naampikansing balalu naun pada umba naampikansing hampe naun tabah hawuang kawan kasusahen kala sa naingkam daya kami pada.

⁷Kami yakin tatuu nelang paung suah bembang neu naun, daya kami karasa himat naun pada umba nanggung kahanangen kami. Nelang daya yiru naun umba pada naampikansing sinrah anri kami.

⁸Pulaksanai katuluh! Kami hamen naun karasa neu kasusahen sa naingkam kami hang wilayah Asia. Kahanangen sa natanggung kami tuu maweat meat kami, hampe kami puang harap lagi tau kaiyuh welum;

⁹nanamni yalah haut nahukum anri hukuman mati. Kude hal yiru jari nampan kami ada mihanri ma kakuaten kami raerai, kude mihanri hang Alatalla sa nyamelum ulun matei.

¹⁰Hanye sa haut nyalamat kami teka bahaya pampatei sa hante yiru. Nelang hanye pada sa sagar nyalamat kami hanrian anrau sa sagar nahadap, daya kami ekat harap ma hanye.

¹¹Kami yakin daya gana kawan doa naun ma kami, Alatalla sagar nyalamat kami teka bahaya. Alatalla katuju mamberkat kami yalah pakai nuing wahai doa ma kami, nelang daya yiru pada rama ulun sagar ngantuh tarima kasih ma Alatalla.

¹²Kami arai, daya kunuan atei kami ngampi yakin kami neu pamelum kami hang dunia yiti samambatang neu hubungan kami anri naun-haut natampalus kami anri ikhlas nelang maeh. Kami nampalus yiru puang daya kabijaksanaan murunsia, kude makai kamampuan sa naami Alatalla.

¹³Sa nasurat kami ma naun hanyeyiru ekat neu kawan hal sa tau nabasa daya naun nelang sa taru naun. Itati naun puang kataru galis neu kami, kude aku harap yati naun sagar tuu-tuu kataru neu kami.

¹⁴Anri kalayiru, hang tawuk Tuhan Yesus hawi yati, naun sagar arai gana kami, kala kami pada arai gana naun.

¹⁵Daya gana kayakinan yiru aku mulani baransana lepuh nunung naun nampan naun kaiyuh berkat rueh kali lipat.

¹⁶Ahengku nunung naun hang pakiaanku ma Makedonia nelang tarie lagi hantek aku mudi mulek, nampan naun ngarawah aku nampalus pakiaanku ma Yudea.

¹⁷Kude aku haut ngubah niatku yiru; inun yiru nantarang neu pandirianku puang segah? Tawuk ngulah ransana, inun aku ngulah ransana yiru manyu kabahumenku raerai, sitaitu kaeau, “Hiai”, kude sitaitu lagi kaeau, “Puang”

¹⁸Demi Alatalla sa tau naparisaya, janjiku ma naun puang “Hiai” atawa “Puang”.

¹⁹Daya Yesus Kristus Anak Alatalla sa nawara ma naun daya Silas, daya Timotius, nelang dayaku raerai puang ulun “Hiai” atawa “Puang”. Kabalikanni hanye yalah isa jawaban “Hiai” teka Alatalla.

²⁰Daya itetei hanye Alatalla haut kaeau “Hiai” ma katuluh janjini. Miandan yiru takam ngantuh “Amen” ma Alatalla gana Yesus Kristus. Kami ngulah kala yiru nampan Alatalla natawat namulia.

²¹Alatalla raerai haut ngulah kami anri naun segah mira baya Kristus; hanye pada haut midi takam hulung ma hanye.

²²Neu ma yiru Alatalla haut nyantuhun takam jari milikni nelang ngami Rohni mawuang atei takam nampan jari jaminan sa hanye ngami ma takam katuluh inun sa haut najanjini.

²³Alatalla jari saksiku-daya hanye karasa hawuang ateiku aku puang jari tulak ma Korintus, daya aku puang hamen ngulah atei naun mahanang.

²⁴Aku puang maksa naun neu inun sa harus naparisaya naun, daya naun tuu haut parisaya ma Kristus. Aku ekat bagawi sameh-sameh baya naun nampan naun magin sanang.