Read Ma'anyan 2 KORINTUS 10 Bible Online

2 KORINTUS 10 - Ma'anyan bible

2 KORINTUS 10

¹Itati aku, hi Paulus, hamen nampe isa hal ma naun. Aku yiti, manyu eau ulun, lamah amun bahadapan anri naun, kude karas nelang heei amun ipanawit. Nah, daya kalamahan nelang pikaeh atei Kristus,

²aku ilaku tatuu ada hampe ngulah aku tapaksa nantarang kakarasen nelang kaheeienku nadap naun amun aku hawi yati. Daya bahumku sagar batindak tegas nadap kawan ulun sa kaeau kami bagawi neu ma tujuan duniawi.

³Kami samula pagun welum hawuang dunia, kude kami puang bajuang manyu tujuan duniawi.

⁴Kawan panrape sa napakai kami hawuang parjuangan kami, puang panrape dunia yiti, kude kawan panrape Alatalla sa bakuasa. Makai kawan panrape yiru kami nyanenuh kawan pertahanan; kami nangkis kawan pibantahan

⁵nelang nyantumbang kawan benteng kasakahen sa naampinri pakai nawan pangatahuan neu Alatalla. Kami narik pikiran ulun rama nelang ngulah here talau anri Kristus.

⁶Nelang amun naun haut ngalut nuu anri kapinuu-nuuni, kami sadia nampan nukum kawan ulun sa puang ngalut nuu.

⁷Ware naun kataru neu kaadaan sa sabujurni. Amun ulun yakin hanye milik Kristus, ware hanye ngampi itung dirini raerai nelang kataru himat kami pada milik Kristus kala hanye.

⁸Aku puang amangan amun aku harus labis wahai iwawara neu kuasa sa haut naami Tuhan ma kami, daya kuasa yiru naami pakai mambangun naun, puang pakai nyanenuh naun.

⁹Aku puang hamen naun kaingkam aku ngampi takut naun makai kawan suratku.

¹⁰Ulun kaeau, “Kawan surat Paulus yiru tegas nelang bapangaruh, kude amun hanye raerai naan hang penah takam, pribadini lamah nelang kawan lenganni budas puang baarati!”

¹¹Mudahan ulun sa kala yiru kataru amun kami naan hang penah naun, tindakan kami sameh kala inun sa nasurat hawuang kawan surat kami.

¹²Batantu kami puang heei mambanding atawa ngandak diri kami sameh darajat anri kawan ulun sa nganggap diri here ambau. Here tuu budu! Here ngulah ukuran raerai nelang ngakira diri raerai makai ukuran yiru.

¹³Kami puang kalayiru. Amun kami iwawara, kami puang lewat batas. Kami muneng hawuang batas-batas daerah pagawian sa haut natukas daya Alatalla ma kami. Nelang naun tamasuk hawuang daerah yiru.

¹⁴Jari, tawuk kami nunung naun nelang nginsing Kabar Maeh nau Kristus ma naun, kami sabujurni puang kaluar teka kawan batas pagawian kami.

¹⁵Kami puang itatawat tenga diri daya gana pagawian ulun lain sa naan hang luar batas sa natukas Alatalla ma kami. Kabalikanni kami tatap hawuang batas sanatukas Alatalla ma kami nelang harap naun magin parisaya ma Kristus, nampan kami kaiyuh nampalus pagawian sa labis hante hang penah naun.

¹⁶Anri kalayiru kami kaiyuh iwara pada Kabar Maeh yiru hang kawan daerah lain anri puang harus iwawara tenga gana pagawian sa haut natampalus hang daerah palayanan ulun lain.

¹⁷Hawuang Surat Barasis naan nasurat, “Ulun sa hamen iwawara isa hal, ware hanye iwawara neu inun sa haut naulah daya Tuhan.”

¹⁸Daya ulun sa natawat hanyeyiru ulun sa natawat daya Tuhan, puang ulun sa natawat tenga raerai.