Read Ma'anyan 2 KORINTUS 11 Bible Online

2 KORINTUS 11 - Ma'anyan bible

2 KORINTUS 11

¹Elahni aku ilalunga butit. Angneh iyuh?

²Aku kasungu anri naun, kala Alatalla pada kasungu naun. Naun hanyeyiru kala erang kaulun wawei bujang paruna sa haut najanjiku nampan naadu anri erang kaulun matueh upuni, hanyeyiru Kristus.

³Kude aku khawatir pikiran naun sagar tagoda nampan puang satia lagi ma Kristus, sameh pada kala hi hawa sadi tagoda daya tipu anipe.

⁴Daya wangunni naun sanang narime ulun sa hawi nunung naun nampan ngajar neu Kristus sa lain-puang Yesus sa nawara kami ma naun. Nelang naun hamen pada narime Roh anri “Kabar Maeh” sa budas balain anri Roh Alatalla nelang Kabar Maeh sa suah natarime naun teka kami.

⁵Aku budas puang kaingkam labis randah teka “kawan rasul” sa luar biasa yiru!

⁶Tau pada aku kurang pandai bapaner, kude neu pangatahuan, aku puang ulun sa budu. Yiru haut nabukti kami ma naun hawuang katuluh hal.

⁷Hang tawuk aku iwara Kabar Maeh teka Alatalla ma naun, aku puang ilaku naun nanggung biayaku sunah hena butit; balalu anri kalayiru aku nyanrandah diriku. Aku ngulah kalayiru nampan ngampi tamam naun. Inun yiru isa kahalaenku nadap naun?

⁸Hang tawuk aku malayanni naun, aku natanggung daya kawan ungkup lain. Iyuh naantuh aku nyanrugi kawan ungkup yiru nampan kaiyuh ngarawah naun.

⁹Amun hang tawuk yiru aku kakurangen, aku puang suah ngampi susah sunah erang kaulun teka naun. Katuluh inun sa naparluku uras nasadia daya kawan pulaksanai sa hawi teka Makedonia. Aku nyaga mamaeh nampan aku puang ngampi susah naun hang kawan inun heneng, nelang aku sagar tarus nyaga nampan hal yiru tatap kala yiru.

¹⁰Kaegahenku yiti puang iyuh naumpe hang awe-awe hang litar daerah Akhaya, daya ajaran Kristus sa bujur naan hang aku.

¹¹Wuah inun aku kaeau kala yiru? Inun daya gana aku puang sinta naun? Alatalla karasa aku sinta naun!

¹²Inun sa naulahku itati sagar tatap naulahku nampan “kawan rasul” sa lain yiru puang uweng tujuan neu iwawara tenga nelang kaeau here bagawi sameh kala kami.

¹³Kawan ulun kalayiru uras kawan rasul palasu. Here yiru kawan pakerja sa manunga ulun anri manyamar ngalut wangun kawan rasul Kristus.

¹⁴Samula puang wauh amun here ngulah kalayiru, daya Iblis pada manyamar kala malekat piraai!

¹⁵Jari puang mustahil pada amun kawan palayan Iblis manyamar kala wangun kawan palayan sa nampalus kabahumen lawulawini Alatalla. Akhirni here pada sagar narime balasan sa satimpal anri kawan pagawian here.

¹⁶Hinra lagi aku ngulek: ada hampe naan sa nganggap aku lunga. Kude amun naun sika nganggap aku kalayiru, elahni aku sa lunga yiti iwawara butit.

¹⁷Hang yiti aku sagar ngantuh inun sa nawawaraku, kude puang Tuhan sa nunyu aku ngeau yiru. Hawuang hal yiti aku tuu-tuu bapaner kala ulun lunga.

¹⁸Samula rama ulun sa iwawara neu kawan hal dunia, jari aku hamen pada iwawara.

¹⁹Naun anri sanang atei sabar nadap ulun lunga, daya naun kaingkam diri kala yiru pandai!

²⁰Naun saratang ngaret amun ulun nyamalah naun, atawa ngakal naun nelang ngalap kauntungan teka naun, atawa kaingkam diri here labis ambau teka naun nelang heei nampar naun.

²¹Aku amangan mangaku kami kajut maleme neu ngulah kala yiru. Kude amun ulun lain heei iwawara neu inun-inun, aku pada heei! (Aku bapaner kala ulun lunga)

²²Inun here ulun Ibrani? Aku pada ulun Ibrani. Inun here ulun Israel? Aku pada ulun Israel. Inun here katurunan Abraham? Aku pada kala yiru!

²³Inun here kawan palayan Kristus? Wangunni yalah aku haut puang uweng akal, kude aku samula palayan sa labis maeh teka here katuluh! Aku bagawi bahimat, aku labis gaha natamasuk mawuang panjara, aku labis wahai nasiksa nelang gaha bilang matei.

²⁴Haut dime kali aku nasiksa daya kawan ulun Yahudi nawalawas makai cambuk telumpulu suei kali.

²⁵Telu kali aku nawalawas daya kawan ulun Roma; suah pada aku napedak makai watu. Telu kali kapal sanatumpangku kayem hang laut, hinra aku gagampung hang laut salawah ruampulu epat jam.

²⁶Gaha tuu aku nampalus pakiaan sa babahaya: taansam daya ranu baah, bahaya teka kawan parampok, bahaya teka kawan ulun Yahudi atawa sa puang Yahudi, bahaya hawuang tumpuk, bahaya hang luar tumpuk, bahaya hang laut, nelang bahaya teka kawan ulun sa iwara diri here yalah pulaksanai Kristen padahal puang.

²⁷Aku mambanting tulang nelang bajuang bilang matei: gaha puang manre, puang kuman, puang nguut, gaha talantar hang kaadaan kalauan, karinginan daya kurang pakaian nelang puang uweng unengan muneng.

²⁸Luar hengka katuluhni yiru, tiap anrau aku kakunus gaer neu kaadaan katantuluh ungkup.

²⁹Amun naan sa maleme aku pada umba kaingkam maleme. Amun naan ulun sa lawu mawuang dosa, ateiku pada umba lenuh.

³⁰Nah, amun aku harus iwawara neu isa hal, yiru aku iwawara neu kawan hal sa nantarang kalemeenku.

³¹Alatalla, Ambah teka Tuhan Yesus karasa himat aku puang ipusu. Natawat ngaranni palus ma kalalawahni.

³²Tawuk aku naan hang Damsyik, gubernur sa bakuasa hang yiru hang kapit pamarentahan Raja Aretas, nunyu tantara nyaga pintu gerbang tumpuk yiru nampan nyamba aku.

³³Kude makai isa karanjang aku naului ma imbe mitah luwang pipik pagar. Anri kalayiru aku lapas teka tangan gubernur yiru.