Read Ma'anyan 2 KORINTUS 12 Bible Online

2 KORINTUS 12 - Ma'anyan bible

2 KORINTUS 12

¹Samula puang uweng untungni neu iwawara. Kude aku hamen pada iwawara neu kawan hal sa natantarang Alatalla ma aku hawuang pangarinah atawa hawuang paninungan.

²Aku kataru erang kaulun Kristen ampat balas taun sa haut taitah naenat ma unengan sa pangaambau hang surga. (Aku puang karasa inun yiru tengani tuu-tuu taenat atawa yiru ekat isa paninungan-ekat Alatalla sa karasa.)

³Aku ngulek hinra lagi: Aku karasa himat ulun yiru naenat masuk ma Firdaus. (Aku puang karasa inun tengani tuu-tuu taenat atawa yiru ekat isa paninungen-ekat Alatalla sa karasa.) Hang yaru ulun yiru karengei kawan hal sa puang tau nawara daya murunsia nelang murunsia nauring, puang iyuh ngantuhni.

⁵Neu ulun yiru sa hamen nawawaraku, puang neu diriku raerai. Neu diriku, ekat kawan hal sa nantarang kalemeenku yiru sa nawawaraku.

⁶Atikala aku hamen iwawara neu isa hal, aku puang hamen jari tukang karadau ipusu; aku sagar iwara sa bujur. Kude aku nahan diriku, nampan puang uweng ulun sa nganggap aku labis teka wangun sa haut nadinungni naulahku atawa sa haut rengeini neu inun naeauku.

⁷Kude nampan aku ada kajut sakah daya kawan paninungan sa luar biasa yiru, aku naami kala masam panyakit hang tengaku sa jari pakakas Iblis. Panyakit yiru naami pakai nampar nibu aku, nampan aku puang jari ulun sakah.

⁸Telu kali aku badoa ma Tuhan nampan panyakitku yiru nasamawai teka aku.

⁹Kude Tuhan nuing, “Aku sinta hanyu nelang yiru haut sukup ma hanyu; daya kuasaku himat tuu mansing amun hanyu hawuang kaadaan maleme.” Yiru sababni aku labis sanang iwawara neu kawan kalemeenku, daya amun aku maleme, balalu himat tuu hang tawuk yiru aku kaingkam Kristus nyalindung aku makai kakansingenni.

¹⁰Jari aku arai neu kawan kalemeenku. Aku pada arai daya gana Kristus aku napuntaka, aku kaingkam wuah kasusahen, nasasah nelang aku kaingkam kahanangen. Daya amun aku maleme, balalu hang tawuk yiru justru aku magin mansing.

¹¹Kapinuuni aku haut jari kala wangun ulun lunga — kude samula naun sangulah aku jari kalayiru. Sabujurni naun sa harus nawat aku. Daya biar aku puang baarati inun-inun, aku budas puang talau daya “kawan rasul” sa luar biasa yiru!

¹²Kawan kaajaiban anri kawan hal sa luar biasa nelang kawan pagawian sa hante haut natantarang anri sabar ma naun pakai ngami buktini aku erang kaulun rasul.

¹³Hawuang hal inun naun kurang nakatawani, amun nabanding anri kawan ungkup sa lain? Amunni ekat hang hal yiti: hanyeyiru aku puang nyusah naun nea ngongkos aku. Maaf aku daya kahalaen yiru!

¹⁴Itati haut ma katelu kalini aku sadia nunung naun. Nelang aku puang hamen nyusah naun, daya sa nakahamenenku puang neu inun sa naan hang naun, malengkan diri naun. Daya puang kawan iya sa harus ngantilau nafakah ma ulun matuehni, kude ulun matueh sa harus ngantilau nafakah ma kawan iyani.

¹⁵Daya yiru, anri atei sanang aku rela ngurban kawan inun heneng ma naun, likan diriku raerai. Amun aku kalayiru sinta ma naun, inun maeh naun kurang sinta ma aku?

¹⁶Nah, naun katuju aku puang suah nyusah naun. Kude naan sa kaeau aku ngakal; aku kaiyuh kauntungan teka naun daya tipu dayaku.

¹⁷Puang tau pada! Inun itetei kawan ulun sa nautusku nunung naun yiru aku ngukut kauntungan teka naun?

¹⁸Aku haut nunyu hi Titus tulak nunung naun, nelang aku nunyu kawan pulaksanai Kristen sa lainni yiru tulak sinrah baya hanye. Inun hi Titus ngalap kauntungan teka naun? Kude kami rueh bagawi anri tujuan sa sameh nelang batindak anri sara sa sameh!

¹⁹Tau pada naun minda salawah yiti kami rahat ngakali mambela diri kami nadap naun? Hala tatuu naun! Alatalla karasa katuluh sa naeau kami yiru samula manyu kabahumen Kristus. Nelang katuluh sa naulah kami samula pakai mambangun pamelum rohani naun.

²⁰Aku hawatir amun hang tawuk aku nunung naun yati, aku kasasat naun puang kala sa naharapku. Takut die naan sa hampe babur, kasiwa, atei panas, mamentingkan diri raerai, ipamuntaka, ipangajik, ipanrujung, sakah nelang mamani.

²¹Aku takut amun hang tawuk aku hawi die Alatalla sagar nyanrandah aku hang hadapan naun nelang aku sagar nungkau daya rama teka naun badosa tawuk dahulu hie, puang miubah nelang puang taduh ngulah kawan gawian here sa ibela, bere nelang puang sanunuh.