Read Ma'anyan 2 KORINTUS 13 Bible Online

2 KORINTUS 13 - Ma'anyan bible

2 KORINTUS 13

¹Yiti ma katelu kalini aku hawi nunung naun. Hawuang Surat Barasis naan nasurat, “Tiap pakara harus nadukung daya kasaksian rueh atawa telu kaulun saksi, wau pakara yiru sah.”

²Kawan ulun sa hang tawuk dahulu hie haut ngulah dosa nelang katuluh ulun sa lain, haut natagurku tawuk aku nunung naun sa karueh kalini. Itati, teka lawit aku ngampi itung naun kamulek, amun aku hawi lagi, puang sunah erang kaulun teka here yiru sagar lapas teka hukuman.

³Naun die sagar kaiyuh katuluh bukti sa naantara naun hanyeyiru Kristus tuu-tuu bapaner itetei aku. Amun Kristus batindak ma naun hanye puang batindak anri lamah, kude kabalikanni hanye nantarang kuasani hang penah naun.

⁴Bujur hang tawuk hanye nabalasangar, hanye lamah, kude itati hanye welum daya kuasa Alatalla. Kami pada maleme hang pamelum kami sa mira baya anri Kristus, kude amun nadap naun, kami pada mansing baya Kristus daya kuasa Alatalla.

⁵Suba naun nguji diri naun raerai inun naun tuu-tuu miandan parisaya ma Kristus! Himat naun kataru Yesus Kristus naan hang wuang naun! — lain halni amun naun samula puang tuu-tuu parisaya.

⁶Aku harap naun kataru kami puang ulun sa puang tahan uji.

⁷Kami badoa ma Alatalla mudahan hanye hamen ngarawah naun nampan puang ngulah kahalaen. Puang nampan nantarang kami yiti samula sakap nampalus tugas, kude nampan naun nampalus inun sa nakabahumen Alatalla — biar wangunni kami kakala gagal, puang malu!

⁸Daya kami puang tau ngulah ala inun-inun sa balawanan anri sa benar; kami harus manurut sa benar.

⁹Kami sanang amun kami lamah, kude naun mansing. Kami pada badoa nampan naun jari paruna.

¹⁰Yiru sababni aku nulis surat yiti nganue aku huan naan hang penah naun. Anri kalayiru, amun aku die hawi, aku puang usah batindak karas anri naun makai kakuasaan sa naami Tuhan ma aku. Kakuasaan yiru naami nampan mambangun naun, puang nampan ngampi hansur.

¹¹Pijumpuhanni, Pulaksanai katuluh, ware naun arai, nelang ngakali nampan jari paruna. Tarime kawan nasehatku. Ware naun mira pakat nelang welum rukun. Alatalla Isa Pamaahi nelang pandamai yiru sagar nyinrah naun.

¹²Ware naun ipanabe anri mesra kala wangun pulaksanai Kristen. Katuluh ulun wat Alatalla ngirim tabe ma naun.

¹³Tuhan Yesus Kristus mamberkat naun, Alatalla sinta naun, nelang Roh Alatalla nyinrah naun katuluhni! Hormat kami, Paulus