Read Ma'anyan 2 KORINTUS 2 Bible Online

2 KORINTUS 2 - Ma'anyan bible

2 KORINTUS 2

¹Daya gana yiru aku haut nukas puang lagi hawi nunung naun amun gana pihawianku ngulah atei naun katuluh mahanang.

²Daya amun aku ngulah naun mahanang atei, hie sa sagar kaiyuh ngarariu aku, amun puang kawan ulun yiru jua sa haut mahanang atei dayaku?

³Yiru sababni aku nulis surat ma naun. Aku puang hamen nunung naun, balalu aku mahanang atei gana naun padahal naun saharus ngampi arai aku. Daya aku yakin amun aku arai, naun katuluhni pada arai.

⁴Aku nyurat ma naun anri maweat nelang mahanang atei nelang wahai nunrak riu matei. Ahengku puang nampan naun mahanang atei, kude nampan naun kataru aku tuu sinta naun.

⁵Amun naan ulun ngulah hanang atei, hanye ngulah yiru puang nuju aku, malengkan nuju naun katuluh atawa panga puang nuju mehe naun. Aku puang hamen kajut karas anri hanye.

⁶Ma ulun samasam yiru, hukuman sa naweat ma hanye daya naun rama, haut sukup.

⁷Itati naun harus ngampun hanye nelang ngami dorongan lagi ma hanye nampan hanye ada kajut mahanang atei hampe putus asa.

⁸Daya yiru aku ilaku, nampan naun nantarang kamulek ma hanye naun tuu-tuu sinta hanye.

⁹Aku nulis surat yiti ma naun anri maksud pakai nguji naun, inun naun saratang nuu ngalut kawan patitah teka aku.

¹⁰Amun naun ngampun ulun sa haut ngulah hala ma naun, aku pada himat ngampun ulun yiru. Daya kawan sa haut naampunku-amun samula naan sa parlu naampun-aku ngampun yiru hang hadapan Kristus ma pikaeh naun.

¹¹Aku ngulah kalayiru nampan Iblis ada ngalap kasampatan nguasa takam; daya takam karasa kawan ransanani.

¹²Tawuk aku hampe hang Troas ngunu iwara Kabar Maeh neu Kristus, Tuhan haut nguka lalan ma aku nampan bagawi hang yaru.

¹³Kude aku puang marauh daya puang panalu anri pulaksanai takam hi Titus hang yaru. Balalu aku ilaku teka kawan ulun hang unengan yiru nampan aku tulak ma Makedonia.

¹⁴Kude syukur ma Alatalla! Hanye saratang nganyak kami nampan umba hawuang pawai kamanangen Kristus daya kami welum mira baya anri hanye. Alatalla makai kami nampan kabar neu Kristus pahamur yalah enguh sa maringit nampur maawe-awe.

¹⁵Daya kami samula kala enguh kamanyan sa maringit, sa natutung daya Kristus ma Alatalla. Ma kawan ulun sa rahat nuju ma kahansuren, kami yiti yalah enguh pampatei sa munu; kude ma kawan ulun sa rahat nasalamat, kami yalah enguh maringit sa nginsing ma pamelum. Nah, hie sa tau nampalus tugas yiti?

¹⁷Kami puang kala rama ulun sa ngulah kabar maeh teka Alatalla yalah barang dagangan. Kawan tujuan kami barasis, daya kami natugas daya Alatalla. Nelang Alatalla raerai kadinung kami nampe kabar yiru kala kawan walah Kristus.