Read Ma'anyan 2 KORINTUS 3 Bible Online

2 KORINTUS 3 - Ma'anyan bible

2 KORINTUS 3

¹Inun yiti wangunni kakala kami itatawat tenga kami? Atawa tau pada kami parlu surat pujian ma naun, atawa teka naun, kala sa naparlu daya kawan ulun lain?

²Naun raerai surat pujian kami, sa nasurat hawuang atei kami, lentah taru nelang nabasa daya ulun katuluh.

³Here raerai kadinung naun yiti yalah surat sa nasurat daya Kristus, sa nakirim mitah kami. Surat yiru nasurat puang makai tintah, kude makai Roh Alatalla sa welum; puang pada hang ambau batu tulis, kude hang atei murunsia.

⁴Kami kaeau kalayiru daya kayakinan kami ma Alatalla itetei Kristus.

⁵Kami puang uweng sunah isa tujuan pakai nantarang kami samula sanggup nampalus pagawian yiti, kude Alatalla sa ngami kamampuan yiru ma kami.

⁶Hanye sa ngulah kami sanggup jari palayan janji wau; janji sa itegei hang Roh Alatalla, puang hang hukum sa nasurat. Daya sa nasurat yiru nginsing pampatei, kude Roh Alatalla yiru ngami pamelum.

⁷Hang tawuk janji sa nginsing pampatei yiru naulah nelang naukir hang bintap watu, sahaya Alatalla nyahaya maraai hang uruwawa Moses. Sahaya yiru tuu matalak hampe bangsa Israel puang sanggup nantau uruwawa Moses, biar sahaya hang uruwawani yiru haut rurup hang tawuk yiru. Nah, amun ngulah janji sa nginsing pampatei yiru naresmi makai sahaya matalak kalayiru tamam.

⁸batantu ngulah janji sa naami daya Roh Alatalla, naresmi makai sahaya matalak labis tamam lagi.

⁹Amun janji sa nukum murunsia yiru kalayiru tamam, batantu labis tamam lagi janji sa ngulah murunsia ikaeh anri Alatalla.

¹⁰Iyuh naantuh kawan sa dahulu yiru tamam, haut puang tamam lagi daya pitamam sa itati.

¹¹Amun ala isa ekat tahan erang pitus, kala yiru tamam, batantu ala isa palus ma kalalawah labis tamam lagi.

¹²Daya kami naan kaharapen kalayiru, balalu kami heei kaeau kalayiru.

¹³Kami puang yalah hi Moses sa nutup uruwawani makai sarudung nampan bangsa Israel puang kadinung sahaya Tuhan pare nelang wawai hang uruwawani.

¹⁴Pikiran here haut natutup. Nelang hampe hang anrau yiti sika pikiran here pagun tatutup anri sarudung hang tawuk here mambasa kawan buku neu janji sa uhang yiru. Sarudung yiru ekat tauka amun ulun mira baya anri Kristus.

¹⁵Itati pada, amun here mambasa kawan buku Moses, sarudung yiru pagun nutup pikiran here.

¹⁶Kude amun naan ulun hawi nunung Tuhan, sarudung yiru pada naidar teka uruwawa ulun yiru.

¹⁷Nah, Tuhan sa nabahum hang yiti hanyeyiru Roh. Nelang hang awe Roh Tuhan yiru naan, hang yiru pada naan kamerdekaan.

¹⁸Itati uruwawa takam katuluh puang natutup makai sarudung, nelang takam nantarang pihante mulia Tuhan Yesus. Nelang daya yiru takam saratang naubah jari sameh kala hanye; magin lawah takam magin batambah hante mulia. Pihante mulia yiru teka Roh, nelang Roh yiru hanyeyiru Tuhan.