Read Ma'anyan 2 KORINTUS 5 Bible Online

2 KORINTUS 5 - Ma'anyan bible

2 KORINTUS 5

¹Daya kami karasa amun lewu-hanyeyiru tenga-sa nauneng takam hang dunia yiti nabungkar, Alatalla sagar nyadia ma takam erang kawua lewu hang surga, sa naulah daya Alatalla nelang sa tahan palus ma kalalawah.

²Hawuang lewu sa itati, takam iwada daya takam kakunus sindi tatuu muneng hawuang lewu takam sa hang surga yiru.

³Lewu yiru tenga takam sa wau.

⁴Salawah takam muneng hawuang lewu sa teka dunia yiti, takam iwada daya tanggungan takam maweat. Puang daya takam hamen lapas teka tenga takam sa teka dunia yiti, kude daya takam hamen makai tenga sa teka surga yiru, nampan tenga takam sa tau matei yiti nakuasa daya sa welum.

⁵Sa natap nyadia takam neu yiru hanyeyiru Alatalla, nelang hanye ngami Rohni ma takam jari jaminan.

⁶Daya yiru atei takam saratang kaingkam mansing. Kami karasa salawah kami pagun muneng hang tenga kami yiti, kami lawit teka lewu sa sagar nauneng kami baya anri Tuhan.

⁷Daya kami welum miandan parisaya ma Yesus Kristus, puang miandan inun sa tau nadinung,

⁸yiru sababni atei kami tabah. Kami tuu hamen lapas teka tenga kami yiti, nampan kaiyuh muneng baya Tuhan.

⁹Daya yiru kami ngakali tatuu nampan ngampi sanang ateini, hau tawuk kami pagun muneng hang lewu kami hang yiti, atawa hang yaru.

¹⁰Daya himat takam katuluh sagar nainsing ma hadapan pangadilan Kristus, nelang takam maisasaan sagar kaiyuh balasan satimpal anri pagawianni hang dunia yiti-pagawian sa maeh atawa sa jahat.

¹¹Kami karasa inun aratini takut ma Tuhan; yiru sababni kami ngakali ngampi yakin ulun neu diri kami. Alatalla kataru kami anri sagalis-galisni, nelang aku harap naun pada kataru kami hang wuang atei naun.

¹²Makai yiti kami puang ilaku nampan naun nawat kami. Kami ekat hamen ngami isa tujuan sa maeh ma naun nampan naun arai neu kami, nampan naun karasa kewangun naun harus nuing ma kawan ulun sa ninung wangun ulun, puang sa pidasaranni.

¹³Amun kami nadinung yalah ulun rapui, hal yiru hulung daya neu kapantingan Alatalla. Nelang amun kami nadinung yalah ulun waras, hal yiru numba daya neu kapantingan naun.

¹⁴Sinta Kristus sa marentah kami; nelang kami kataru amun erang kaulun haut matei ma ulun katuluh, yiru baarati katuluh ulun haut matei.

¹⁵Kristus haut matei ma ulun katuluh, nampan katuluh ulun sa welum, puang welum ma diri here raerai, malengkan ma Kristus sa haut matei nelang welum kamulek numba ma kapantingan here.

¹⁶Daya yiru, kami puang lagi ngakira ulun manyu ukuran murunsia. Samula kami suah ngakira Kristus teka segi murunsia, kude itati puang lagi.

¹⁷Ulun sa haut mira baya anri Kristus, budas haut jari murunsia wau. Sa lawah haut puang uweng lagi-katuluhni haut jari wau.

¹⁸Katuluhni yiru naulah daya Alatalla. Itetei Kristus Alatalla ngulah takam ikaeh mulek anri hanye, balalu ngami tugas ma takam nampan kawan ulun lain tau ikaeh pada anri Alatalla.

¹⁹Kami iwara anri itetei Kristus, Alatalla ngulah murunsia ikaeh mulek anri dirini. Alatalla nampalus hal yiru anri puang iwaleh kawan kahalaen sa haut naulah murunsia nadap dirini. Nelang kami haut kaiyuh natugas daya Alatalla nampan iwara kabar yiru.

²⁰Jari kami yiti uras kawan utusan wat Kristus. Itetei kami Alatalla raerai sa nampe pesenni. Hawuang Ngaran Kristus, kami ilaku tatuu, tarime sambut tangan Alatalla sanasurungni neu tau pada ma naun ikaeh mulek anri hanye.

²¹Kristus puang badosa, kude Alatalla sa ngulah hanye nanggung dosa takam, nampan takam ikaeh mulek anri Alatalla daya mira baya anri Kristus.