Read Ma'anyan 2 KORINTUS 6 Bible Online

2 KORINTUS 6 - Ma'anyan bible

2 KORINTUS 6

¹Daya kami bagawi baya anri Alatalla, kami ilaku tatuu ada naun nyasia pikaeh atei Alatalla yiru.

²Hawuang Surat Barasis, Alatalla kaeau, “Hang wayah ahi lelo, aku haut nyanrengei hanyu, nelang pada hang anrau kasalamatan, aku haut ngarawah hanyu.” Itung mamaeh, itati wayah ahi lelo yiru. Anrau yiti hanyeyiru anrau kasalamatan yiru.

³Kami puang hakun palayanan kami naampihala. Daya yiru kami ngaheng puang ngami tujuan ma sunah erang kaulun nampan nampalus hal yiru.

⁴Kabalikanni, hang katuluh hal, kami nantarang kami yiti samula tuu kawan walah Alatalla. Daya, wahai masam kasusahen haut natarime kami anri sabar;

⁵kami nasiksa, napanjara, nelang nakarubut; kami bagawi bahimat, gaha puang manre nelang gaha pada puang kuman.

⁶Anri katulusen atei, bijaksana, sabar nelang maeh atei, kami nantarang kami yiti samula tuu walah Alatalla. Nelang pada anri itegei hang pangarawahen Roh Alatalla, nelang anri sinta sa tulus,

⁷nasinrah anri iwara Kabar teka Alatalla nelang anri kuasa Alatalla, kami nantarang kami yiti samula tuu kawan walah Alatalla. Kami itegei mansing hang kabahumen Alatalla yalah panrape kami pakai manyarang atawa mambela diri kami.

⁸Kami nahormat, kude pada nahina; natawat nelang pada napuntaka. Biar kami bujur, kami naantuh mapusu.

⁹Kami naanggap puang tawantar, kude ulun uras kataru kami. Kami napinda matei, kude bawilah itati kami pagun welum, biar kami nakasasah, kami puang matei.

¹⁰Biar atei kami mahanang, kude kami saratang arai. Kami nadinung paua, kude kami haut ngulah rama ulun jari tatau. Nadinung kami puang uweng inun-inun, kude sabujurni wat kami naan ala katantuluhni.

¹¹Pulaksanai katuluh sa nasinta hang Korintus! Kami haut iwara tarus tarang ma naun. Katuluh kunuan atei kami haut nalalea kami.

¹²Kami puang nutup atei ma naun, ekat naun sa nutup atei ma kami.

¹³Itati, elahni aku paner kala bapaner ma kawan anakku. Ware naun nguka atei naun ma kami.

¹⁴Ada naun hamen mira pakat anri kawan ulun sa puang parisaya ma Yesus; yiru budas puang susuk. Puang maka tau pikaeh bakumpul baya anri kajahaten! Puang tau pada piraai bagabung anri piieng.

¹⁵Puang tau pada Yesus mira pakat anri Iblis. Inun pisamehni kawan ulun Kristen anri ulun sa puang Kristen?

¹⁶Inun hubunganni lewu Tuhan anri lewu barhala? Takam yiti Lewu Tuhan, hanyeyiru Alatalla sa welum. Alatalla yiru kaeau, “Aku sagar muneng hang penah-penah here, nelang welum baya anri here. Aku sagar jari Alatalla here, nelang here sagar jari ulun watku.

¹⁷Daya yiru, tanan kawan ulun sa puang kataru Alatalla yiru, nelang tamparing tenga naun teka here, Ada budas bahubungan anri sa najis, himat aku sagar narime naun.

¹⁸Aku sagar jari Ambah naun, nelang naun sagar jari anakku, Kalayiru lengan Tuhan sa kuasani puang uweng tikas.”