Read Ma'anyan 2 KORINTUS 7 Bible Online

2 KORINTUS 7 - Ma'anyan bible

2 KORINTUS 7

¹Pulaksanai katuluh sa nasinta! Katuluh janji yiru natuju ma takam. Daya sabab yiru ware takam ngabarasis tenga takam teka kawan hal sa namere roh amirue tenga daging takam. Ware takam takut ma Alatalla, nampan takam tau welum hulung ma hanye anri paruna.

²Tarime sambut kami hawuang atei naun. Kami puang uweng kahalaen sunah anri erang kaulun, nelang kami puang suah nyanrugi ulun. Kami budas puang ngalap kauntungan teka hie-hie.

³Aku kaeau kalayiru, puang nampan ngampi hala naun. Daya, kala sa haut suah naeauku dahulu hie, kami tuu sinta naun, nelang takam samula sameh hengau welum matei.

⁴Penu aku parisaya ma naun. Likan aku tuu arai neu naun! Biar kami kaingkam wahai kasusahen, ateiku tarariu tuu daya naun. Ateiku tuu-tuu arai!

⁵Tawuk kami hampe hang Makedonia, kami budas puang sampat baranai. Teka tiap segi kami kaiyuh kasulitan: teka pihak lain pibantahan, nelang teka wuang atei kami kaingkam takut.

⁶Kude syukur, Alatalla saratang ngampi kansing atei ulun sa putus asa; hanye ngarariu atei kami anri pihawian Titus.

⁷Atei kami tarariu puang ekat daya hi Titus haut hawi, kude pada daya hanye haut iwara ma kami kewangun ateini haut tarariu daya naun. Hanye iwara ma kami sa naun kasungu tuu hamen panalu anri aku; naun manyasal neu panan gawian naun dahulu hie nelang itati rela mambela aku. Hal yiru ngulah aku labis arai lagi.

⁸Biar suratku ngulah atei naun mahanang, aku puang manyasal ngulah surat yiru. Sabujurni dami aku karasa suratku yiru ngulah naun mahanang atei-biar hanang atei naun yiru ekat erang pitus-aku sika manyasal pada.

⁹Kude itati ateiku sanang-puang daya gana atei naun mahanang, malengkan daya hanang atei naun yiru ngulah pidasaran naun balalu miubah. Sabujurni hanang atei naun yiru tuu manyu kabahumen Alatalla. Jari, kami puang nyanrugi naun.

¹⁰Daya hanang atei kalayiru ngulah piubahan atei sa nginsing ma salamat. Nelang ulun puang sagar manyasal daya hal yiru. Kabalikanni, hanang atei ekat manyu kabahumen murunsia ngulah pampatei.

¹¹Suba naun ninung inun hasilni hang naun daya hanang atei sa tuu manyu kabahumen Alatalla! Hasilni hanyeyiru naun tuu-tuu ngakali ngampi damai pirawekan! Naun balalu muar ma dosa, naun takut, naun kasungu, naun balalu basamangat, naun rela nukum sa hala! Hang katuluh parsualan yiti naun haut nantarang naun tuu puang uweng kahalaen.

¹²Jari, biar aku haut ngulah surat yiru, aku ngulah yiru puang daya gana ulun bakahalaen yiru. Puang pada daya ulun sa ngaret kahanangen gana kahalaen yiru. Aku ngulah surat yiru nampan hang hadapan Alatalla, naun raerai kaingkam leha hanteni parhatian naun nuju ma kami.

¹³Yiru sababni atei kami tarariu. Puang ekat tarariu, labis likan kami naampi arai daya kadinung kaaraien atei Titus; ateini tarariu daya gana naun katuluh.

¹⁴Aku samula haut iwawara neu naun ma hanye. Syukur, naun puang ngamangan aku. Katuluh sa suah naeau kami ma naun uras tuu. Kalayiru pada inun sa nawawara kami neu naun ma hi Titus bawilah tuu pada.

¹⁵Itati hanye magin sinta naun, daya hanye kaitung kewangun naun katuluhni hamen nuu pimpinanni nelang kewangun naun narime hanye anri hormat nelang ngalut nuu.

¹⁶Aku sanang tatuu, daya naun iyuh naparisaya hang katuluh hal.