Read Ma'anyan 2 KORINTUS 8 Bible Online

2 KORINTUS 8 - Ma'anyan bible

2 KORINTUS 8

¹Pulaksanai katuluh, kami hamen naun karasa pada neu kewangun kaehni Alatalla ma kawan ungkup hang Makedonia.

²Here haut nauji makai kawan kasusahen sa maweat. Kude hang penah kawan kasusahen yiru, here arai nelang puang engken neu ngami sumbangan pakai ngarawah kawan ulun lain, biar here paua tatuu.

³Aku kaiyuh mamastikan here ngami manyu kamampuan here, likan labis. Anri puang uweng ulun sa nunyu,

⁴here ilaku tatuu teka kami amun iyuh here umba ngarawah ngami sumbangan ma kawan ulun wat Alatalla hang Yudea.

⁵Here ngami labis teka sa naharap kami. Mulani here nyarah diri ma Tuhan, udi hie ma kami pada, manyu kala kabahumen Alatalla.

⁶Yiru sababni kami bahimat nunyu hi Titus-sa haut nuku gawian yiti-nampan hanye nampalus gawian sa maeh yiti pada hang penah naun.

⁷Naun segah hang katuluh hal: Naun segah hang hal perisaya, hang hal iwara pandapat, hang hal pangarasaen, hang katuluh masam gawian, nelang hawuang sinta naun ma kami. Daya yiru, ware naun pada segah hawuang gawian sa maeh yiti.

⁸Aku puang ngurayang yiru kala isa parentah. Kude anri nantarang kewangun giatni ulun lain ngarawah sasamehni, aku pada hamen karasa hampe awe lalem sinta naun.

⁹Daya naun batantu tuu karasa takam yiti nasinta tatuu daya Yesus Kristus Tuhan takam. Hanye tatau, kude hanye ngulah tengani jari paua neu ma kapantingan naun, nampan makai pipauani yiru, naun jari tatau.

¹⁰Manyu pandapatku, samula pipatutni naun nyanyumpuh inun sa haut natuku daya naun hang taun yari. Daya naun sa asalni mamikir nelang nuku gawian yiti.

¹¹Nah, itati patut naun nampalusni manyu kamampuan naun. Patut naun basamangat neu nyanyumpuh gawian yiru, kala naun dahulu hie pada basamangat maransanani.

¹²Amun naun rela ngami, himat Alatalla sagar narime pangamian naun yiru manyu inun sa naan hang naun, puang manyu inun sa puang uweng hang naun.

¹³Aku budas puang bamaksud nampan mambebas ulun lain teka tanggung jawab, nelang nyameat naun. Kude daya naun itati naan hawuang kaadaan sa saraba sukup, samula pipatutni naun nyansukup kakurangen here. Yati amun naun naan kakurangen, nelang here hawuang kaadaan saraba sukup, himat here sagar ngarawah naun. Anri kalayiru kararuehni sameh-sameh nalayanni.

¹⁵Hawuang Surat Barasis naan nasurat, “Ulun sa kaiyuh hasil wahai, puang bakalabihan, nelang ulun sa kaiyuh hasil butit, puang bakakurangen.”

¹⁶Kami basyukur ma Alatalla daya hanye haut ngulah hi Titus sameh giatni anri kami neu ngarawah naun!

¹⁷Daya hi Titus puang ekat rela mulur pilakuan kami, kude hanye pada kalayiru giat hamen ngarawah naun hampe makai kabahumenni raerai hanye ngalap kaputusan nampan tulak nunung naun.

¹⁸Sinrah baya hanye kami ngirim pada erang kaulun pulaksanai sa nahormat tuu hang katuluh ungkup daya gawianni iwara Kabar Maeh teka Alatalla.

¹⁹Kamulek, ulun yiru haut napidi pada nelang natukas daya kawan ungkup nampan nengau kami hang pakiaan kami. Daya kami sagar nampalus pakiaan neu ngatet sumbangan yiru, nampan Tuhan namulia nelang nampan naun kadinung kami tuu rela ngarawah.

²⁰Kami bahati-hati tatuu nampan ada uweng ulun ngampi hala kami hang hal nampe sumbangan sa hene yiti.

²¹Kami hamen bagawi anri jujur puang ekat hang hadapan Tuhan, kude pada hang hadapan murunsia.

²²Sinrah baya hi Titus anri pulaksanai yiru, kami pada ngirim erang kaulun pulaksanai sa lain. Kami haut nguji hanye papire kali nelang bawilah tuu hanye hamen ngarawah. Nelang itati, hanye hamen tuu ngarawah naun daya hante kaharapenni anri naun.

²³Neu hi Titus, hanye samula hengauku, sa bagawi baya aku neu ngarawah naun. Nelang neu rueh kaulun pulaksanai yiru, sa tulak sinrah hanye, here hanyeyiru kawan ulun sa nautus daya kawan ungkup nelang jari kaaraian ma Kristus.

²⁴Kami harap naun nantarang sinta naun ma here, nampan katuluh ungkup karasa naun sinta here nelang inun sa nakaaraien kami neu naun, yiru bujur.