Read Ma'anyan 2 KORINTUS 9 Bible Online

2 KORINTUS 9 - Ma'anyan bible

2 KORINTUS 9

¹Sabujurni puang parlu lagi aku nyurat ma naun neu bantuan sa rahat nakirim ma ungkup Alatalla hang Yudea.

²Aku karasa naun hamen ngarawah, nelang aku haut iwawara neu naun ma kawan ulun hang Makedonia. Aku kaeau ma here, teka taun dahulu yari, kawan pulaksanai hang Akhaya haut sadia neu ngami sumbangan. Nelang samangat naun haut ngulah samangat ulun rama teka here magin malelap.

³Itati aku ngutus hi Titus anri karueh pulaksanai yiru ma naun nampan inun sa nakaaraien kami neu naun ada hampe jari kawai tuu eleh. Jari, naun ware haut basadia, daya aku kaeau ma here naun haut basadia neu hal yiru.

⁴Aku khawatir die salenga naan kawan ulun Makedonia sa umba aku tawuk aku hawi nunung naun. Nelang amun here kasasat naun huan basadia, wah bukan main amanganni kami die, daya kami haut kaeau kami perisaya tuu ma naun! Nelang naun pada sika sagar amangan.

⁵Yiru sababni aku parlu ngutus here yiru nunung naun labis dahulu nampan ngurus sumbangan sa najanji naun yiru. Aku ngulah kalayiru nampan die amun aku hawi, pangamian naun yiru haut sadia. Anri kalayiru, bawilah tuu pangamian naun yiru naami anri sanang atei, puang daya gana tapaksa.

⁶Itung naun! Ulun sa muau wini sameh butit sagar masi hasilni pada sameh butit. Kude ulun sa muau wini wahai sagar masi hasilni wahai pada.

⁷Tiap ulun harus ngami manyu karelaan ateini. Ada hanye ngami anri atei maweat atawa tapaksa, daya Alatalla sinta ma ulun sa ngami anri sanang atei.

⁸Alatalla bakuasa ngami ma naun berkat sa penu jubung, nampan naun saratang naan kawan inun sa naparlu daya naun; likan naun sagar bakalabihan nampan ngulah ala maeh nelang baamal.

⁹Hawuang Surat Barasis naan nasurat kalayiti neu Alatalla, “Hanye namur ma kawan ulun paua; pikaeh ateini palus ma kalalawahni.”

¹⁰Alatalla sa nyadia wini ma tukang puau nelang kutaen ma takam. Hanye pada nyadia nelang ngampi wahai inun sa napuau naun, nampan hasil pikaeh atei naun pada batambah.

¹¹Anri kalayiru naun sagar saraba sukup hang ala katantuluh hampe naun saratang kaiyuh ngami anri sanang atei. Nelang kawan pangamian naun sa nabagi kami, ngulah rama ulun batarima kasih ma Alatalla.

¹²Daya pagawian maeh sa naulah naun yiti puang ekat nyansukup kakurangen ulun wat Alatalla, kude pada sagar ngulah rama ulun batarima kasih ma Alatalla.

¹³Nelang teka pikaeh sa haut natantarang daya naun yiru, rama ulun Kristen hang Yudea sagar nawat Alatalla daya here kadinung kasatiaan naun anri Kabar Maeh neu Kristus sa naumba naun yiru. Pada here nawat Alatalla, daya naun tuu sanang ngami neu magi ma here nelang ma katuluh ulun lain inun sa naan hang naun.

¹⁴Himat here sagar badoa ma naun anri sinta nelang ahi lelo daya Alatalla tuu maeh atei ma naun.

¹⁵Ware takam basyukur ma Alatalla daya pangamian sa luar biasa yiru.