Read Ma'anyan GALATIA 1 Bible Online

GALATIA 1 - Ma'anyan bible

GALATIA 1

¹Pulaksanai katuluh ungkup hang wilayah Galatia, Aku, hi Paulus, anri katuluh pulaksanai Kristen sa naan baya aku, harap mudahan Alatalla Ambah takam anri Tuhan Yesus Kristus ngami berkat nelang kasanangen ma naun. Aku jari rasul puang daya kahumen murunsia atawa naangkat daya murunsia, malengkan daya Yesus Kristus anri Alatalla Ambah takam sa haut nyamelum hanye kamulek teka pampatei.

⁴Daya ngalut nuu ma kabahumen Alatalla Ambah takam, Kristus nyarah dirini jari kurban gana kawan dosa takam, nampan takam nasalamat teka jaman sa jahat yiti.

⁵Tawat ma Alatalla hampe kalalawahni! Amen.

⁶Aku wauh neu kawan Pulaksanai! Naun naherau Alatalla daya gana lelo Kristus, kude itati naun kala yiru hinang namuku Alatalla palus umba “kabar maeh” sa lain teka Kabar Maeh sa teka Alatalla.

⁷Sabujurni puang uweng “kabar maeh sa lain”. Ekat naan kawan ulun sa iwara ma naun “kabar maeh” neu Kristus sa naputar balik here hampe ngampi daur naun.

⁸Ulun sa iwara “kabar maeh” sa lain teka Kabar Maeh sa haut nawara kami, elahni hanye nahukum daya Alatalla — biar ulun yiru kami raerai atawa malekat teka surga!

⁹Yari kami haut kaeau, itati aku ngeauni hinra lagi: Ulun sa iwara ma naun “kabar maeh” sa lain teka Kabar Maeh sa haut natarime naun teka kami, ulun yiru pipatutni nahukum daya Alatalla!

¹⁰Inun wangunni gana yiru kakala aku harap nampan naakui daya murunsia? Budas puang! Aku ekat harap pangakuan teka Alatalla. Inun aku ngakali ngatau atei murunsia nampan ulun sanang anri aku? Amun aku magun ngulah kala yiru, aku puang tuu walah Kristus.

¹¹Pulaksanai katuluh harus karasa Kabar Maeh sa nawaraku yiru asalni puang teka murunsia.

¹²Aku puang narime kabar yiru teka murunsia, nelang puang sunah erang kaulun sa ngajar aku makai kabar yiru. Yesus Kristus raerai sa iwara isi Kabar Maeh yiru ma aku.

¹³Batantu naun haut karengei neu pamelumku dahulu hie kala erang kaulun miupang negei agama Yahudi. Naun karasa kalaawe karasni aku ngahanangen ungkup Alatalla nelang kalaawe karasni aku ngakali ngampi hansurni.

¹⁴Hawuang hal nampalus agama Yahudi, aku labis teka rama ulun Yahudi sa paraian aku. Aku basamangat tuu hawuang kawan hal neu adat istiadat datu nini kami.

¹⁵Kude daya pikaeh atei Alatalla, hanye midi aku kalemah aku huan nakayaan palus nerau aku nampan malayanni hanye.

¹⁶Alatalla ngalalea Anakni ma aku nampan Kabar Maeh neu Anakni nawara dayaku ma kawan ulun puang Yahudi. Hang tawuk yiru aku puang tulak nunung sunah erang kaulun lepuh laku nasehat.

¹⁷Aku puang pada tulak nunung kawan ulun hang Yerusalem sa haut labis dahulu teka aku jari rasul. Kude aku tulak ma tane Arab, balalu teka yaru aku mulek ma Damsyik lagi.

¹⁸Telu taun udi yiru, aku tulak ma Yerusalem nampan pangataru anri hi Petrus. Aku muneng baya hanye ekat 15 anrau lawahni.

¹⁹aku puang panalu anri kawan rasul lain, ekat anri hi Yakobus, Pulaksanai Tuhan.

²⁰Inun sa nasuratku yiti uras bujur. Alatalla karasa himat aku puang ipusu!

²¹Udi yiru aku tulak ma kawan daerah hang Siria anri Kilikia.

²²Hampe hang tawuk yiru kawan ungkup Kristen hang Yudea magun huan kataru aku bahadapan.

²³Here ekat karengei ulun kaeau, “Ulun sa dahulu hie ngahanangen kami, itati iwara kaparisayaan sa tawuk hie hamen nasamawai dayani.”

²⁴Balalu here nawat Alatalla daya gana aku.