Read Ma'anyan GALATIA 2 Bible Online

GALATIA 2 - Ma'anyan bible

GALATIA 2

¹Ampat balas taun udi yiru, aku mulek ma Yerusalem baya anri hi Barnabas, nelang nginsing hi Titus pada.

²Aku tulak ma Yerusalem daya Alatalla haut iwara ma aku aku harus tulak. Balalu hawuang isa kumpulan sa hulung anri kawan pamimpin hang yaru, aku manarang Kabar Maeh sa nawara dayaku ma kawan ulun puang Yahudi. Daya aku puang hamen kawan aku ngakali sa dahulu, atawa sa itati, kawai tuu eleh.

³Hi Titus, sa nengau aku, samula erang kaulun Yunani, kude hanye puang napaksa nampalus aturan sunat.

⁴Biar naan kawan ulun sa nasak neu hal yiru. Here samula kawan ulun sa suni-suni masuk mawuang golongan takam nelang pura-pura kakala pulaksanai. Here masuk anri suni-suni yiru nampan nyalidik kabebasan sa naan hang takam daya takam ibaya anri Kristus Yesus. Here hamen ngampulek takam ma kaadaan asal yalah walah.

⁵Kude kami puang sunah butit manyarah ma here, daya kami hamen nyaga nampan Kabar Maeh yiru tatap sajati ma naun.

⁶Kude biar kala yiru, puang uweng kawan hal-hal wau sa nalaku teka aku daya kawan ulun sa naanggap panga nahormat-ma aku puang uweng bedani amun here panga nahormat atawa puang, daya Alatalla puang ninung wangun ulun.

⁷Kabalikanni, kawan ulun sa naanggap panga nahormat yiru mangaku Alatalla haut nugas aku nampan iwara Kabar Maeh ma ulun puang Yahudi, sameh kala hanye haut nugas hi Petrus nampan iwara Kabar Maeh yiru ma ulun Yahudi.

⁸Daya Alatalla ngami ma hi Petrus kamampuan umak jari rasul ulun Yahudi, ngami pada ma aku kamampuan umak jari rasul ulun puang Yahudi.

⁹Hi Yakobus, hi Petrus anri hi Yohanes, sa wangunni jari kawan pamimpin ungkup, mangaku Alatalla haut ngami ma aku tugas hulung yiti. Balalu here bajabat tangan anri hi Barnabas pada anri aku yalah tanda parsahabatan. Balalu here anri kami sameh satuju kami sagar bagawi hang penah kawan bangsa sa puang Yahudi, nelang here hang penah ulun Yahudi.

¹⁰Ekat isa pilakuan here hanyeyiru nampan kami ngatawani ulun paua. Nelang aku samula sanang nampalus hal yiru.

¹¹Tawuk hi Petrus hawi ma Antiokhia, aku nawan hanye tarang-tarangan, daya tindakanni hala.

¹²Asalni hanye maharung kuman baya anri kawan pulaksanai sa puang Yahudi. Kude dami kawan ulun utusan Yakobus hawi, hanye nyanawit tenga teka kawan pulaksanai sa puang Yahudi balalu puang hamen lagi kuman baya here, daya takut anri kawan ulun sa hamen nampan katuluh ulun nasunat.

¹³Kawan pulaksanai Yahudi sa lain pada umba batindak pura-pura kala hi Petrus, hampe hi Barnabas pada tapangaruh umba batindak kala here.

¹⁴Dami aku kadinung here puang batindak manyu kala pibujur Kabar Maeh yiru, aku kaeau ma hi Petrus hang hadapan katuluh ulun sa naan hang yiru, “Amun pulaksanai yalah ulun Yahudi haut welum kala ulun puang Yahudi, wuah inun pulaksanai itati hamen maksa kawan ulun lain welum kala ulun Yahudi?”

¹⁵Bujur manyu kalahiran, kami samula ulun Yahudi, lain “ulun sa puang Yahudi sa badosa”.

¹⁶Biar kala yiru kami karasa ulun ikaeh kamulek anri Alatalla ekat daya parisaya ma Yesus Kristus, puang daya nampalus hukum agama. Kami raerai pada parisaya ma Yesus Kristus, nampan kami ikaeh anri Alatalla itetei parisaya kami yiru, puang daya kami nampalus hukum agama. Daya anri nampalus hukum agama, puang sunah erang kaulun tau ikaeh kamulek anri Alatalla.

¹⁷Kami ngakali ikaeh kamulek anri Alatalla itetei welum ibaya anri Kristus. Kude amun haut udi nampalus sa kalayiru, lalea tuu kami magun “kawan ulun badosa” sameh kala kawan ulun sa puang Yahudi, inun yiti baarati Kristus sa ngulah sabab kami badosa? Batantu tuu puang!

¹⁸Amun aku nuku lagi namuan piduduk hukum agama sa haut nasantumbang, baarati aku nantarang aku haut jari ulun malangar hukum.

¹⁹Kude aku haut matei ma hukum agama-nawunnu daya hukum yiru raerai nampan aku tau welum ma Alatalla. Aku haut nabalasangar sinrah Kristus.

²⁰Itati puang lagi aku sa welum, kude Kristus sa welum hawuang diriku. Pamelum yiti sa naingkamku itati hanyeyiru pamelum daya parisaya ma Anak Alatalla sa sinta aku nelang sa haut nyarah dirini neu aku.

²¹Aku puang ngampahe lelo Alatalla. Amun hubungan ulun anri Alatalla jari maeh kamulek daya nampalus hukum agama, yiru baarati pampatei Kristus puang uweng riranni!