Read Ma'anyan GALATIA 3 Bible Online

GALATIA 3 - Ma'anyan bible

GALATIA 3

¹Pulaksanai katuluh kawan ulun Galatia! Naun tuu lunga! Naun haut tapangaruh daya hie? Pampatei Yesus nabalasangar haut natarangku anri tarang tatuu ma naun!

²Suba wara ma aku isa hal yiti: Inun naun haut narime Roh Alatalla daya nampalus hukum agama, atawa daya naun karengei Kabar Maeh teka Alatalla nelang parisaya ma Kristus?

³Wuah inun naun kala yiru lunga! Naun haut nuku welum wau baya Roh Alatalla, kalaawe itati naun hamen kaiyuh piparunani makai kakuaten naun raerai?

⁴Inun uras mamus katuluh sa haut naingkam daya naun yiru? Puang mamus!

⁵Alatalla ngami Rohni ma naun nelang ngulah kawan kaajaiban hang penah naun. Inun Alatalla ngulah yiru daya naun nampalus hukum agama atawa daya naun karengei Kabar Maeh yiru nelang parisaya ma Kristus?

⁶Yiru sameh kala sa nasurat hawuang Surat Barasis neu hi Abraham-kala yiti, “Hi Abraham parisaya ma Alatalla, nelang daya kaparisayaanni yiru hanye natarime daya Alatalla yalah ulun sa ngampi sanang atei Alatalla.”

⁷Jari wuah naun karasa ulun sa tuu-tuu katurunan Abraham hanyeyiru ulun sa parisaya ma Alatalla.

⁸Surat Barasis haut labis dahulu kadinung Alatalla ngami tau pada kawan ulun puang Yahudi ikaeh kamulek anri Alatalla, amun here parisaya ma hanye. Kabar Maeh yiru labis dahulu nawara ma hi Abraham hawuang janji yiti, “Itetei hanyu, Alatalla sagar mamberkat katantuluh ulun murunsia hang ambau tane.”

⁹Hi Abraham parisaya, balalu hanye naberkat. Kalayiru pada katuluh ulun sa parisaya, sagar naberkat baya hi Abraham.

¹⁰Kawan ulun sa itegei ma hukum agama, katuluhni welum hang kapit sumpah. Daya hawuang Surat Barasis nasurat, “Ulun sa puang satia nampalus katuluh sa nasurat hawuang Buku Hukum Agama, nasumpah Alatalla!”

¹¹Puang sunah erang kaulun sa ikaeh anri Alatalla daya gana nampalus hukum agama. Hal yiru haut natantarang hawuang Surat Barasis, “Ekat ulun sa parisaya ma Alatalla, hampe hubunganni anri Alatalla jari maeh kamulek, sagar welum!”

¹²Kude hukum agama sa puang miandan hang kaparisayaan. Hawuang Surat Barasis nasurat, “ulun sa nampalus hukum agama, sagar welum daya hukum yiru.”

¹³Kude Kristus nyanepah takam teka sumpah hukum agama. Hanye nampalus yiru anri maladar dirini wuah sumpah daya gana takam. Daya hawuang Surat Barasis nasurat, “Wuah sumpah ulun sa matei nagagueng hang kayu balasangar.”

¹⁴Kristus nampalus kala yiru nampan berkat sa najanji Alatalla ma hi Abraham naami pada ma kawan ulun sa puang Yahudi. Anri kala yiru takam pada sa parisaya ma Alatalla, kaiyuh narime Roh sa najanji daya Alatalla yiru.

¹⁵Pulaksanai katuluh! Wuah aku makai suntu teka pangalaman tiap anrau. Amun ulun ngulah isa janji nelang janji yiru haut nasyah, himat puang sunah erang kaulun tau mambatal janji yiru, atawa nambah sunah butit hang janji yiru.

¹⁶Kawan janji Alatalla naulah daya Alatalla ma hi Abraham anri ma ulun katurunan Abraham. Hawuang Surat Barasis puang nasurat “anri ma kawan ulun katurunan Abraham”, sa baarati ulun rama. Sa nasurat hang yiru hanyeyiru “anri ma ulun katurunannu”, baarati ekat erang kaulun, hanyeyiru Kristus.

¹⁷Sa hamen nawaraku hang yiti hanyeyiti: janji Alatalla haut naulah nelang haut nasyah labis dahulu. Hukum agama sa naami 430 taun udi yiru puang kaiyuh mambatal nelang muhut janji Alatalla yiru.

¹⁸Daya amun pangamian Alatalla miandan ma hukum agama, himat yiru puang lagi pangamian sa najanji. Likan daya Alatalla haut bajanji ma hi Abraham, balalu Alatalla ngami yiru ma hanye.

¹⁹Amun kalayiru, ma inun hukum agama naami? Lengan tuingni kalayiti hukum yiru natambah pakai ngalalea palangaran murunsia. Hukum agama yiru bariran ekat hampe erang kaulun katurunan Abraham hawi, sa naantuh hawuang janji Alatalla ma hi Abraham. Hukum agama yiru natahampe daya kawan malekat itetei erang kaulun murunsia.

²⁰Nah, harus naan rueh pihak, wau parlu naan erang kaulun ulun helang. Kude Alatalla puang mamarlu ulun helang, daya hanye raerai batindak.

²¹Inun yiru baarati hukum agama balawanan anri janji Alatalla? Batantu tuu puang! Daya amun hukum agama naami pakai ngami pamelum ma murunsia, himat murunsia tau ikaeh anri Alatalla itetei hukum agama.

²²Kude hawuang Surat Barasis nasurat katantuluh ulun murunsia naan hang kapit kuasa dosa. Daya yiru, pangamian sa najanji miandan parisaya ma Yesus Kristus naami ma here sa parisaya.

²³Kapihuan hampe wayahni nampan parisaya ma Kristus, takam najaga rapat daya hukum agama; takam kala nakurung hampe imam yiru nalalea.

²⁴Anri kala yiru, hukum agama jari yalah manur takam hampe Kristus hawi nampan ngulah takam ikaeh kamulek anri Alatalla daya takam parisaya ma Kristus.

²⁵Itati, daya haut wayahni murunsia tau parisaya ma Kristus, balalu takam puang lagi namanuri daya hukum agama.

²⁶Daya naun parisaya ma Kristus Yesus, naun ibaya anri hanye; nelang daya gana yiru naun jari kawan anak Alatalla.

²⁷Naun katuluhni haut nabaptis hawuang ngaran Kristus, jari naun haut narime hang diri naun lagu-lampah Kristus raerai.

²⁸Hawuang hal yiti puang lagi naan pibalain kawan ulun Yahudi anri kawan ulun puang Yahudi, kawan walah anri kawan ulun bebas, kawan upu anri kawan wawei. Pulaksanai katuluhni jari isa gana Kristus Yesus.

²⁹Amun naun milik Kristus, naun hanyeyiru katurunan Abraham. Nelang naun sagar narime inun sa najanji daya Alatalla.