Read Ma'anyan GALATIA 4 Bible Online

GALATIA 4 - Ma'anyan bible

GALATIA 4

¹Kude parlu aku ngami kategasan: salawah erang kaulun ahli waris magun huan hampe umur, naan ulun sa mangawasi hanye nelang ngurus kawan kapantinganni hampe hanye sukup umur manyu sa natukas daya ambahni. Hanye naulah sameh kala erang kaulun walah, biar sabujurni hanye ampun katantuluh harta yiru.

³Kala yiru pada anri takam: Salawah takam magun huan dewasa, takam nasamalah daya kawan roh sa nguasa dunia yiti.

⁴Kude hang tawukni sa pas tuu, Alatalla ngutus Anakni ma dunia. Anakni yiru nakayaan daya erang kaulun wawei nelang welum hang kapit kuasa hukum agama.

⁵Anri kalayiru hanye nyanepah kawan ulun sa welum hang kapit kuasa hukum agama; nampan takam pada kaiyuh jari kawan anak Alatalla.

⁶Daya naun samula kawan anak Alatalla, Alatalla nunyu Roh Anakni masuk mawuang atei Pulaksanai anri ateiku, hanyeyiru Roh sa nanterau, “Ambah, u Ambahku.”

⁷Jari, naun puang lagi walah, malengkan anak. Nelang daya naun anak Alatalla, balalu Alatalla sagar ngami ma naun kawan ala katantuluh sa nasadiani ma kawan anakni.

⁸Dahulu hie naun puang kataru Alatalla, yiru sababni naun jari walah teka kawan kuasa sa naanggap yalah alah, kude sabujurni samula puang Alatalla.

⁹Kude itati naun haut kataru Alatalla, atawa labis pas tuu lagi, Alatalla kataru naun. Nah, wuah inun naun hamen mulek lagi ma kawan roh dunia yiti, sa maleme nelang paua? Wuah inun naun hakun nasamalah lagi daya kawan roh yiru?

¹⁰Naun maraya kawan anrau sa batantu, kawan wulan sa batantu nelang kawan taun sa batantu.

¹¹Aku gaer, takut die rara kapateiku gana naun kawai tuu eleh.

¹²Pulaksanai katuluh! Aku laku tatuu nampan naun sameh kala aku. Daya aku pada haut sameh kala naun. Naun puang ngulah sunah isa kahalaen nadap aku.

¹³Naun batantu magun kaitung teka asalni, inun ngulah aku iwara Kabar Maeh yiru ma naun. Sababni hanyeyiru daya aku sakit.

¹⁴Hang tawuk yiru naun budas puang ramanyi kabereen aku, biar kaadaan tengaku kala purija sa hante ma naun. Naun likan narime aku kala narime malekat Alatalla atawa kala narime Kristus Yesus raerai.

¹⁵Naun arai nelang sanang tuu tawuk yiru. Kude itati, hang awe kaaraien anri kasanangen yiru? Aku karasa hang tawuk yiru naun rela ngaruit diki matei naun raerai neu naami ma aku, jaka yiru tau natampalus.

¹⁶Inun naun itati haut nganggap aku yalah musuh, daya aku ngalalea sa bujur ma naun?

¹⁷Kawan ulun sa lain yiru anri penu samangat ngantilau naun, kude kawan bahum here puang maeh. Here ekat hamen nyamitus hubungan naun anri kami, nampan naun umba here anri penu samangat.

¹⁸Samula maeh basamangat hawuang kawan hal sa maeh, asal saratang kalayiru, ada ekat amun aku naan baya anri naun.

¹⁹Kawan anakku sa nasinta! Aku itati wuah kahanangen lagi daya gana naun. Aku wuah kahanangen kala erang kaulun ineh wuah kahanangen tawuk hanye ngayaan anakni. Aku sagar saratang nanggung kahanangen, amun lagu-lampah Kristus huan taamule hang diri naun!

²⁰Aku kakunus tuu kasungu muneng hang penah naun itati, nampan aku kaiyuh bapaner anri naun makai lengan sa lain, daya aku haut puang karasa inun lagi sa hamen naulah anri naun!

²¹Pulaksanai katuluh sa hamen welum hang kapit kuasa hukum agama, suba rengei eauku! Aku sagar iwara ma naun inun sa sabujurni nasurat hawuang Kitab Hukum Moses.

²²Hang yiru nasurat hi Abraham naan rueh kaulun anak: Ineh teka anak sa isa hanyeyiru erang kaulun walah, ineh teka sa lainni yiru hanyeyiru erang kaulun bebas.

²³Anak teka wawei sa jari walah nakayaan biasa daya kabahumen murunsia. Kude anak teka wawei sa bebas, nakayaan daya haut najanji Alatalla.

²⁴Yiti iyuh napakai yalah rarapisan. Rueh kaulun wawei yiru hanyeyiru ngararapisan rueh janji: sa isani baasal teka Gunung Sinai-sa yiru hi Hagar; kawan anakni nakayaan yalah walah.

²⁵Jari, hi Hagar yiru Gunung Sinai, hang tane Arab. Hanye pakai ngararapisan tumpuk Yerusalem anri katantuluh pandudukni sa itati haut jari walah.

²⁶Kude Yerusalem sa hang surga yiru hanyeyiru Yerusalem sa bebas, hanye ineh takam.

²⁷Daya hawuang Surat Barasis nasurat, “Hewu harui hanyu u wawei tamanang, sa puang suah kayaan! Hewu harui nelang surak-layau u hanyu sa puang suah kaingkam kahanangen daya kayaan! Daya wawei sa natanan matueh upuni sagar uweng labis rama anak hengka wawei sa welum baya matueh upuni.”

²⁸Pulaksanai katuluh! Naun raerai samula kawan anak Alatalla sa nakayaan daya janji Alatalla; naun sameh kala hi Ishak.

²⁹Hang tawuk yiru anak sa nakayaan manyu kabahumen murunsia, nyiksa anak sa nakayaan daya kabahumen Roh Alatalla. Kala yiru pada itati.

³⁰Kude inun sa nasurat hawuang Surat Barasis? Hang yiru nasurat kala yiti: “Unur wawei walah yiru baya anri anakni, daya anak teka wawei walah yiru puang sagar jari ahli waris baya anri anak teka wawei bebas yiru.”

³¹Jari, Pulaksanai katuluh, takam yiti puang jaka kawan anak teka erang kaulun wawei walah; takam hanyeyiru kawan anak teka wawei bebas.