Read Ma'anyan GALATIA 5 Bible Online

GALATIA 5 - Ma'anyan bible

GALATIA 5

¹Takam itati bebas, daya Kristus haut mambebas takam! Daya yiru jaga kabebasannu, nelang ada hakun nasamalah lagi.

²Itung, amun naun laku nasunat, yiru baarati Kristus puang uweng riranni ma naun. Sa kaeau yiti hanyeyiru aku raerai, hi Paulus.

³Hinra lagi aku ngampi itung ma ulun sa laku nasunat, hanye wajib nampalus katuluh hukum agama!

⁴Amun naun ngakali ikaeh anri Alatalla itetei hukum agama, yiru baarati hubungan naun anri Kristus haut witus. Anri kala yiru naun welum hang luar lingkungan lelo Alatalla.

⁵Kude ma kami, kami harap anri pangarawahen Roh Alatalla nelang miandan kaparisayaan kami ma Kristus, Alatalla ngami tau pada kami ikaeh anri hanye.

⁶Daya amun takam haut ibaya anri Kristus Yesus, hal manurut atawa puang manurut aturan sunat puang jari sual lagi. Sa penting ekat parisaya ma Kristus, nelang yiru lalea hawuang sinta takam ma ulun lain.

⁷Dahulu hie naun bajuang anri maeh! Itati wuah inun naun puang ngalut nuu lagi ma kabahumen Alatalla? Hie sa haut ngajahujak naun?

⁸Himat sa ngulah yiru puang Alatalla sa haut nerau naun!

⁹“Ragi sa butit sagar ngampi kamer katuluh adonan,” eau ulun.

¹⁰Biar kala yiru aku magun parisaya himat naun puang sagar miupang negei pandirian lain, daya takam haut baya mira anri Kristus. Nelang aku yakin hie-hie sa ngasasaur pikiran naun, sagar nahukum daya Alatalla.

¹¹Neu aku, Pulaksanai katuluh, wuah inun aku saratang namusuhi amun aku magun iwara neu aturan sunat yiru parlu? Amun aku samula iwara kala yiru, balalu inun sa nawaraku neu balasangar Kristus puang nimbul parsualan.

¹²Labis maeh kawan ulun sa ngasasaur pikiran naun yiru palus irahinra nakaluar teka ungkup!

¹³Pulaksanai haut naherau nampan jari ulun sa bebas. Kude ada makai kabebasan naun yiru neu saratang nampalus inun sa nakabahumen daya naun. Kabalikanni, naun harus sameh ipasinta nelang sameh malayanni.

¹⁴Katuluh hukum agama nasimpul hawuang parentah isa yiti, “Wuah hanyu sinta sasameh murunsia kala hanyu sinta dirinu raerai!”

¹⁵Kude amun naun paut bantah pangaramut, awas, die naun sameh-sameh hansur.

¹⁶Bahumku kalayiti: Elahni Roh Alatalla nganyak naun nelang ada welum ngalut kabahumen pidasaran murunsia.

¹⁷Daya kabahumen murunsia ipanawan anri kabahumen Roh Alatalla, nelang kabahumen Roh Alatalla ipanawan anri kabahumen murunsia. Kararuehni ipanawan, hampe naun puang tau nampalus inun sa nakabahumen naun.

¹⁸Kude amun Roh Alatalla mamimpin naun, himat naun puang nakuasa daya hukum agama.

¹⁹Kabahumen pidasaran murunsia lalea hawuang kawan pagawian sa ibela, bere, nelang puang patut;

²⁰hawuang nyambah dewa anri alimu pitua; hawuang paut-bantah, babur, kadidit, hinang sangit, nelang ekat ngunu tenga ni raerai; pisah-bansai, nelang bapihak-pihak,

²¹nelang pibahiri, mahamui, pesta rami-rami anri wahai masam salainni. Neu katuluhni yiru aku ngampi itung naun itati kala aku haut ngampi itung naun dahulu hie, kawan ulun sa ngulah kawan hal kala yiru puang sagar jari ulun pidian Alatalla.

²²Kabalikanni, amun kawan ulun napimpin daya Roh Alatalla, hasilni hanyeyiru: Here ipasinta, here arai, here uweng pidamai atei, here sabar nelang maeh budi bisara, here maeh anri ulun lain, here satia,

²³here randah atei, nelang saratang sanggup nawan nyatalau diri raerai. Puang uweng hukum agama sa nguring kawan hal kalayiru.

²⁴Kawan ulun sa haut jari milik Kristus Yesus, kawan ulun yiru haut munu pidasaran murunsiani anri kawan nafsu kabahirienni.

²⁵Roh Alatalla haut ngami ma takam pamelum wau; daya sabab yiru hanye pada harus marentah pamelum takam.

²⁶Takam puang iyuh sakah, nelang sameh ngampi hanang atei, nelang kasiwa sa isa anri sa lain.