Read Ma'anyan EPESUS 1 Bible Online

EPESUS 1 - Ma'anyan bible

EPESUS 1

¹Ulun pidian Alatalla hang Epesus, sa satia ma Kristus Yesus!

²Aku, hi Paulus, rasul Kristus Yesus daya kabahumen Alatalla, harap mudahan Alatalla Ambah takam Tuhan Yesus Kristus ngami berkat nelang kasanangen ma naun.

³Tawat ma Alatalla, Ambah Tuhan takam Yesus Kristus! Hanye mamberkat takam makai kawan berkat rohani hawuang surga, daya takam ibaya anri Kristus.

⁴Kapihuan dunia yiti nasanyari, Alatalla haut midi takam itetei Kristus anri maksud nampan takam jari milikni sa hulung nelang puang uweng nawada hang hadapan hanye. Daya sinta Alatalla,

⁵hanye haut nukas labis dahulu anri itetei Yesus Kristus, hanye sagar ngangkat takam jari kawan anakni raerai. Nelang samula yiru sa hamen naulahni.

⁶Tawat ma Alatalla sa hante, anri itetei Anakni sa nasinta hanye tuu-tuu sinta takam.

⁷Daya, gana pampatei Kristus, takam natewuh daya Alatalla, baarati hanye haut ngampun takam kawan ulun badosa.

⁸Hanye nampalus yiru daya hanye tuu-tuu sinta takam, nelang sinta yiru nahaluini ma takam anri penu kapintaren nelang kaharatien.

⁹Manyu kabahumenni raerai, Alatalla iwara ma takam rasia ransanani; hanye haut nukas ransanani yiru sagar nasanuput itetei Kristus.

¹⁰Ransana yiru kalayiti nampan ala katantuluh, hau sa hang surga hau sa hang ambau tane, jari isa anri Kristus sa yalah kapala. Nelang hal yiru sagar nasanuput daya Alatalla amun haut hampe wayahni.

¹¹Alatalla ngulah ala katantuluh manyu kabahumenni nelang kaputusanni raerai. Hengka mula asal hanye haut midi takam daya hanye hamen nampan takam jari ulun watni gana ibaya anri Kristus.

¹²Maraleh takam, sa samambatang harap ma Kristus, nawat Alatalla daya pihante muliani!

¹³Naun pada haut jari ulun wat Alatalla tawuk naun karengei pesen Alatalla, hanye yiti Kabar Maeh sa ngami salamat ma naun. Naun parisaya ma Yesus Kristus, daya yiru Alatalla ngami siri milikni ma naun, hanyeyiru Rohni sa najanjini.

¹⁴Roh yiru isa jaminan takam himat sagar narime inun sa haut najanji Alatalla ma ulun watni. Yiti ngami kayakinan ma takam himat Alatalla sagar newuh ulun watni. Tawat ma Alatalla daya pihante muliani.

¹⁵Daya yiru, dami aku karengei naun parisaya ma Tuhan Yesus, nelang naun sinta katuluh ulun wat Alatalla,

¹⁶Aku puang taduh haut batarima kasih ma Alatalla neu naun. Saratang aku ngantuh ngaran naun hang tawuk aku badoa.

¹⁷Aku ilaku nampan Alatalla Tuhan takam Yesus Kristus, Ambah sa mulia, ngami Rohni ma naun. Roh yiru sagar ngulah naun pintar maharati, nelang sagar ngalalea Alatalla ma naun hampe naun kataru hanye.

¹⁸Aku ilaku nampan Alatalla nguka pikiran naun hampe jari maraai; nampan naun kataru inun sa tau naharap teka Alatalla sa nerau naun. Pada nampan naun karasa kalaawe limparni kawan berkat sa maeh sa nasadia Alatalla ma ulun watni;

¹⁹nelang kalaawe tamamni Alatalla bagawi anri penu kuasa hang wuang takam sa parisaya. Kuasa Alatalla yiru sameh kala kuasa luar biasa

²⁰sa napakai tawuk nyamelum Kristus kamulek teka pampatei nelang ngami ma hanye kadudukan panga ambau baya Alatalla hang surga.

²¹Kadudukan Kristus yiru lawit labis ambau teka kadudukan kawan pamarentah, kawan panguasa, kawan pamimpin, kawan tuan-tuan nelang hie-hie pada sa haut naami kadudukan ambau; hau sa welum hang jaman yiti hau sa welum hang jaman hanrian udi ati.

²²Alatalla nyantalau katantuluhni ma kapit kuasa Kristus, nelang ngami Kristus ma ungkup jari kapala teka ala katantuluh.

²³Ungkup hanyeyiru tenga Kristus, naampiparuna daya hanye sa ngampi paruna ala katantuluh hang awe-awe.