Read Ma'anyan EPESUS 4 Bible Online

EPESUS 4 - Ma'anyan bible

EPESUS 4

¹Yiru sababni aku — jari erang kaulun tahanan sa natahan daya gana malayanni Tuhan — ilaku tatuu anri naun: wuah naun welum manyu kala kadudukan naun yalah ulun sa haut naherau daya Alatalla.

²Wuah naun saratang randah atei, maeh lagu-lampah, nelang sabar. Tantarang sinta naun mitah ipangarawah isa anri sa lain.

³Kakali tuu-tuu nampan welum anri damai nampan pibayaan sa naulah daya Roh Alatalla tatap tapalihara.

⁴Ekat naan isa tenga, nelang isa Roh. Kala yiru pada naun naherau ma isa kaharapen sa sameh.

⁵Ekat naan isa Tuhan, isa kaparisayaan, isa baptisan,

⁶nelang isa Alatalla sa jari Ambah katantuluh ulun. Hanye Tuhan litar dunia sa bagawi itetei ala katantuluh, nelang bakuasa hawuang ala katantuluh.

⁷Tiap takam narime isa pangamian manyu kala sa naami daya Kristus.

⁸Hawuang Surat Barasis nasurat, “Tawuk hanye mambai maunengan sa panga ambau, hanye nginsing rama tawanan; nelang hanye ngami kawan pangamian ma murunsia.”

⁹Nah, amun naantuh “hanye mambai” baarati mulani hanye haut minau hampe ma unengan sa panga imbe hang ambau tane yiti.

¹⁰Nelang hanye sa haut minau yiru, hanye pada sa mambai ma unengan sa lawit labis ambau teka kawan langit hampe litar dunia katuluhni taisi anri pihawianni.

¹¹Hanye sa “ngami kawan pangamian ma murunsia”; mehe naangkatni jari rasul, sa lain jari nabi; sa lain lagi jari pambarita Kabar Maeh yiru, nelang sa lain kamulek naangkatni jari kawan guru anri pamalihara ungkup.

¹²Yiti naulahni nampan ulun wat Alatalla katuluhni penu napania nampan tau malayanni Tuhan nelang mambangun tenga Kristus.

¹³Anri kala yiru takam katuluh jari isa gana kaparisayaan sa sameh nelang kataruen sa sameh neu Anak Alatalla. Nelang takam jari kawan ulun sa dewasa sa magin lawah magin batambah paruna kala Kristus.

¹⁴Balalu takam puang jari kawan iya lagi sa guyang-gampah nelang tainsing maaru-maati daya kareh wahai masam pangajaran teka kawan ulun sa puang maeh atei. Here nyantawang ulun makai tipu daya here.

¹⁵Puang budas! Kabalikanni takam harus ngalalea kawan hal sa bujur anri atei sa penu sinta, hampe hawuang katuluh hal takam magin lawah magin paruna kala Kristus, sa jari kapala takam.

¹⁶Hang kapit pimpinanni, katuluh anggota tenga yiru tasusun maeh, nelang pasambung daya kawan kakulepanni maisasaan. Nelang amun tiap anggota yiru bagawi kala sa mustini, balalu katuluh tenga yiru sagar mihante jari dewasa nelang mansing itetei sinta.

¹⁷Daya yiru hawuang ngaran Tuhan, iti sa sagar naeauku anri tegas: ada lagi welum kala kawan ulun sa puang kataru Alatalla, nelang mamikir kawan hal sa puang bariran.

¹⁸Pikiran here haut maieng. Here puang kataru pamelum sa naami daya Alatalla, daya here budas puang uweng pangarasaen inun-inun neu Alatalla. Here kala yiru daya mape silu.

¹⁹Here haut puang uweng pangingkaman amangan lagi, hampe here mulur kawan kabahirien, nelang welum ibela manyu kabahumen ateini.

²⁰Kude Kristus Yesus sa taru naun yiru, puang kala yiru!

²¹Naun haut karengei neu hanye! Nelang yalah ulun sa umba hanye, naun haut ngajar pada neu kawan pidasaran Alatalla sa naan hang hanye!

²²Daya yiru umpe murunsia uhang anri piduduk pamelum uhang sa rahat natanrusak daya kawan kabahirienni sa ngampi tawang.

²³Wuah atei anri pikiran naun uras nasamau katuluhni.

²⁴Wuah naun welum yalah murunsia wau sa naulah manyu wangun Alatalla; hanyeyiru anri pidasaran sa mawitu bujur nelang barasis.

²⁵Daya yiru kawan pulaksanai katuluhni, ada lagi ipusu. Patut jujur isa anri sa lainni, daya takam katuluh hanyeyiru uras anggota tenga Kristus.

²⁶Amun naun sangit, ada maladar kasangiten yiru ngulah sabab naun badosa. Ada sangit hapus erang anrau,

²⁷nampan Iblis puang kaiyuh kasampatan.

²⁸Ulun sa patuh ngalat harus taduh ngalat. Kabalikanni hanye harus bagawi nampan kaiyuh napakahni anri jujur nelang kaiyuh ngarawah ulun sa bakakurangen.

²⁹Amun naun bapaner, ada makai kawan lengan sa murun. Pakai kawan lengan sa mambangun nelang ngami pangarawahen ma ulun lain. Kawan lengan kala yiru sagar nginsing pikaeh ma kawan ulun sa nyanrengeini.

³⁰Ada ngampi hanang atei Roh Alatalla. Naun haut namaterai makai roh, jari jaminan himat Anrau Pambebasan sagar hawi ma naun.

³¹Samawai kawan hanang atei, ngatei anri sangit. Ada lagi wawerei ikakehet lengan nelang nangkurun ngawawarah. Ada lagi naan kaingkam muar atawa kaingkam lain masam yiru.

³²Kabalikanni, wuah naun maeh atei nelang uweng ahi lelo isa anri sa lain, nelang ipangampun sameh kala Alatalla pada ngampun naun itetei Kristus.