Read Ma'anyan EPESUS 5 Bible Online

EPESUS 5 - Ma'anyan bible

EPESUS 5

¹Naun samula kawan anak Alatalla sa nasintani, daya yiru naun harus welum isuntu Alatalla.

²Wuah naun welum hawuang sinta, kala Kristus pada sinta takam. Hanye ngurban dirini ma takam, yalah isa parapah sa maringit nelang ngampi sanang atei Alatalla.

³Naun samula ulun wat Alatalla. Daya yiru, kawan pagawian isa ibela nelang sa puang sanunuh, atawa puang patut naan hang penah naun. Ada hampe ulun lain naan tujuan kaeau naun ngulah kawan hal sa kala yiru.

⁴Puang patut pada ma naun ngantuh kawan lengan sa murun, sa ibela nelang sa puang pantas. Kabalikanni wuah naun ngantuh tarima kasih ma Alatalla.

⁵Pantaru mamaeh: ulun sa bapidasan ibela, atawa puang sanunuh, atawa hamen hanrabut (pidasaran kala yiru sameh anri nyambah barhala), ulun yiru puang tau jari ulun pidian Alatalla sa naparentah daya Kristus anri Alatalla.

⁶Ada naun tatipu daya kawan papaneran sa ang bariran. Daya gana kawan hal yiti sa nimbul karikangen Alatalla nadap kawan ulun sa puang ngalut nuu ma hanye.

⁷Jari, ada budas mapakat atawa baya anri kawan ulun kalayiru.

⁸Naun raerai dahulu hie muneng hawuang piieng. Itati naun haut jari ulun wat Tuhan, naun muneng hawuang piraai. Daya sabab yiru naun harus welum hawuang piraai.

⁹Daya teka piraai yiru hulet kawan masam pagawian sa maeh, adil nelang mawitu bujur hang paninungan Alatalla.

¹⁰Wuah ngakali mantaru inun sa ngampi sanang atei Tuhan.

¹¹Ada ngulah kawan pagawian sa puang bariran sa naulah daya kawan ulun sa welum hawuang piieng. Kabalikanni, wuah naun merang ngalalea kawan hal masam yiru. (

¹²Daya kawan hal sa naulah here anri suni-suni yiru, neu napaner sika haut ngumangan.)

¹³Kawan ala katantuluh sa nasiai hawuang piraai, sagar dinung anri lentah.

¹⁴Daya ala katantuluh sa tau nadinung anri letah, samula maraai. Yiru sababni naan lengan, “Kaelan, u hanyu sa manre, nelang ambuan teka pampatei! Kristus sagar nyahaya hang ambau hanyu.”

¹⁵Daya yiru pantaru mamaeh sara pamelumnu. Ada welum kala kawan ulun lunga; welum kala kawan ulun maharati.

¹⁶Pakai anri mamaeh tiap kasampatan sa naan hang hanyu daya wayah yiti samula wayah sa jahat.

¹⁷Ada lunga, kude salidik inun sa nakabahumen Tuhan.

¹⁸Ada naun mahamui gana anggur, daya yiru sagar nanrusak naun. Kabalikanni, wuah naun nakuasa daya Roh Alatalla.

¹⁹Pakai kawan lengan teka mazmur, nyanyian tawat-hurumat nelang lagu rohani, hawuang kawan papaneran naun. Wuah naun anri atei sa arai manyanyi tawat-hurumat ma Tuhan.

²⁰Wuah naun neu ala katantuluh saratang ngantuh tarima kasih ma Alatalla Ambah, hawuang ngaran Yesus Kristus Tuhan takam.

²¹Nampan mahormat Kristus, ware naun tunduk isa ma sa lain.

²²Matueh wawei, patut tunduk ma matueh upuni, kala tunduk ma Tuhan.

²³Daya matueh upu hanyeyiru kapala ma matueh waweini, sameh kala Kristus jari kapala ma ungkup nelang hanye raerai pada Raja Panyalamat ma ungkup sa jari tengani.

²⁴Sameh kala ungkup tunduk ma Kristus, kala yiru pada hawuang ala katantuluh matueh wawei patut tunduk ma matueh upu.

²⁵Matueh upu, wuah sinta matueh waweini, sameh kala Kristus sinta ungkup nelang ngurban dirini neu ma ungkup yiru.

²⁶Kristus nampalus yiru nampan hanye kaiyuh ngabarasis ungkup yiru makai ajaranni anri itetei ranu baptisan, nampan hanrian anrau hanye kaiyuh nyarah ungkupni ma Alatalla.

²⁷Anri kala yiru Kristus ngulah ungkup yiru minri anri mulia nelang barasis hang hadapanni, anri puang uweng nawada atawa bere.

²⁸Kala yiru pada matueh upu patut sinta matueh waweini kala hanye sinta tengani raerai. Ulun sa sinta matueh waweini baarati hanye sinta dirini raerai. (

²⁹Puang suah naan ulun sa marikang tengani raerai. Kabalikanni, hanye malihara nelang nyagani kala Kristus pada malihara ungkupni.

³⁰Takam karasa yiru, daya takam samula kawan anggota tenga Kristus.)

³¹Hawuang Surat Barasis nasurat, “Daya yiru erang kaulun upu sagar nanan ineh-ambahni nampan mira baya anri matueh waweini, balalu kararuehni sagar jari isa.”

³²Ayat yiru uweng arati sa lalem. Nelang aku ngait yiru neu hubungan Kristus anri ungkup.

³³Kude ayat yiru naan hubunganni pada anri naun: Wuah tiap matueh upu sinta matueh waweini kala hanye sinta dirini raerai nelang ware tiap matueh wawei ngakali nampan mahormat matueh upuni.