Read Ma'anyan EPESUS 6 Bible Online

EPESUS 6 - Ma'anyan bible

EPESUS 6

¹O naun kawan anak! Yalah ulun sa umba Kristus, taati ulun matueh naun daya sa yiru sa patut natampalus.

²“Hormat ineh ambah naun” hanyeyiru parentah pertama teka Alatalla anri janji,

³hanyeyiru: “Nampan hanyu batuah nelang ambau umurnu hang dunia”.

⁴Kawan pulaksanai sa jari ambah! Ada naun ngampi hanang atei anak naun hampe ngulah here sangit. Kabalikanni, palihara nelang ajar here makai aturan nelang pangajaran Tuhan.

⁵Kawan pulaksanai sa jari walah! Tunduk parentah tuan naun sa hang dunia yiti. Tampalus yiru anri kaingkam hormat anri ngalut nuu nelang anri tuu-tuu yalah naun ngulah ma Kristus raerai.

⁶Ada ngulah kala yiru ekat hang tawuk naun najaga, ekat nampan kaiyuh natawat murunsia. Kude wuah naun ngulahni yalah walah Kristus sa rahat nampalus kabahumen Alatalla anri sagalis atei.

⁷Pagawian sa naulah naun kala walah yiru, wuah naun ngulahni anri atei sa arai yalah naun malayanni Tuhan, nelang puang ekat malayanni murunsia.

⁸Itung tiap ulun, hau walah hau ulun bebas, sagar narime walehan teka Tuhan manyu kawan ala maeh sa naulahni.

⁹Kawan pulaksanai sa jari tuan! Wuah naun anri tingkah laku maeh kala yiru pada nadap kawan walah naun. Ada lagi makai gatap atawa ansaman. Itung, naun anri kawan walah naun yiru, sameh uras naan isa ampu atawa majikan, hanyeyiru Tuhan sa hang surga. Hanye puang ninung uruwawa ulun.

¹⁰Pijumpuhanni, wuah naun tingkas anri makai katingkasen sa iyuh naun teka kuasa Tuhan, daya naun ibaya anri hanye.

¹¹Pakai katantuluh karangkapen paparangan sa naami Alatalla ma hanyu, nampan naun tatap kaiyuh nawan kawan akal jahat teka Iblis.

¹²Daya takam bajuang puang nawan murunsia, malengkan nawan kakuaten kawan setan sa nguasa jaman sa jahat yiti. Takam nawan kakuaten kawan roh jahat sa nguasa awan.

¹³Daya yiru, itati, pakai katantuluh karangkapen paparangan Alatalla, nampan hang anrau sa jahat naun sanggup nawan kawan sarangan musuh. Nelang nampan udi naun bajuang hampe jumpuh, naun magun wigas gansang.

¹⁴Wuah naun siap sadia. Pakai kasatiaan ma Alatalla yalah ikat pinggang, nelang katulusen yalah baju jatangnu.

¹⁵Ware karelaan neu iwara Kabar Maeh sa nginsing kasanangen jari sapatunu.

¹⁶Tiap tawuk pakai kaparisayaannu ma Tuhan yalah panrape panangkis; makai kaparisayaan yiru naun kaiyuh nampare katantuluh anak panah baapui teka hi jahat.

¹⁷Alap kasalamatan jari topi waja, nelang lengan Alatalla jari pedang Roh Alatalla.

¹⁸Ulah katantuluhni yiru anri badoa neu laku karawahen teka Alatalla. Hang tiap kasampatan, ware badoa nampan Roh Alatalla mamimpin naun. Wuah naun saratang siap sadia nelang ada manyarah. Saratang badoa ma katuluh ulun wat Alatalla.

¹⁹Nelang badoa ma aku pada, nampan hang tawuk aku bapaner, Alatalla ngami ma aku kawan lengan sa pas tuu. Nelang nampan aku anri heei tau iwara rasia Kabar Maeh yiru.

²⁰Daya Kabar Maeh yiru, aku jari erang kaulun duta, nelang itati naan hawuang panjara. Badoa nampan aku heei pantane neu Kabar Maeh yiru, manyu kala aku harus bapaner.

²¹Hi Tikhikus, pulaksanai takam nelang palayan sa satia hawuang pagawian Tuhan, sagar iwara ma naun kawan ala katantuluh neu aku, nampan naun karasa kaadaanku nelang pagawianku.

²²Yiru sababni aku ngutus hanye nunung naun nampan iwara kaadaan kami ma naun katantuluhni, nampan ngampi arai atei naun.

²³Mudahan Alatalla Ambah, anri Tuhan Yesus Kristus ngami tau pada ma katantuluh ungkup nampan ibaya nelang ipasinta nelang tatap parisaya ma Kristus.

²⁴Mudahan Alatalla mamberkat pulaksanai katuluh sa sinta Tuhan takam Yesus Kristus anri sinta sa puang tau pare. Hormat kami Paulus